Bələdiyyə fəallarının, məhəllə komitələri üzvlərinin, ictimai və qeyri–hökumət təşkilatlarının nümayəndələrinin iştirakı ilə muzeyin akt zalında keçirilən tədbirdə Sumqayıt Bələdiyyəsi özünün 2014-cü ildə fəaliyyətinin nəticələri ilə bağlı geniş hesabat vermişdir.

Sumqayıt Bələdiyyəsinin sədri professor Əbülfəz Babayev şəhərin yerli özünüidarəetmə orqanının ötən ildəki fəaliyyəti barədə toplantı iştirakçılarına məlumat verərək bildirmişdir ki, Azərbaycan Prezidenti İlham Əliyevin diqqət və qayğısı sayəsində respublikamızın bütün regionlarında olduğu kimi, Sumqayıtda da böyük abadlıq-quruculuq işləri aparılmaqdadır. Sumqayıt şəhər İcra Hakimiyyəti son illərdə şəhərin memarlıq görkəminin müasir tələblərə və standartlara uyğun olması üçün bütün potensial imkan və resurslardan səmərəli istifadə edilməsi istiqamətində ciddi tədbirlər həyata keçirir. 

Qeyd olunmuşdur ki, ölkə rəhbərinin uğurlu daxili və xarici siyasəti nəticəsində Azərbaycan dünya dövlətləri arasında öz layiqli yerini tutmuş, qeyri-neft sektorunun inkişafının sürətlənməsində, sahibkarlığın və regionların inkişafında, əhalinin rifahının daha da yüksəlməsində yeni nailiyyətlər əldə edilmiş, iqtisadiyyatın dinamik inkişafına nail olunmuşdur. Belə ki, respublika iqtisadiyyatı 3 faizə qədər yüksəlmiş, qeyri-neft sektorunda artım 7 faiz olmuş, əhalinin pul gəlirləri isə orta hesabla 4,8 faiz çoxalmışdır. İl ərzində ölkə iqtisadiyyatına yönəldilmiş 27 milyard dollarlıq sərmayənin 16 milyardı daxili sərmayənin hesabına olmuşdur. Təqdirəlayiqdir ki, Sumqayıtın  sənaye müəssisələrində də məhsul istehsalı 18 faiz artaraq, 460 milyon manat təşkil etmişdir. Sənayenin ayrı-ayrı sahələri üzrə də uğurlar əldə edilmişdir. Kimya sahəsində artım 31,6, yüngül sənayedə 25,0, yeyinti sənayesində isə 73,4 faiz olmuşdur. Ən əsası isə işçilərin orta aylıq əmək haqqı 480 manat səviyyəsinə qədər yüksəlmişdir.

Son bir ildə şəhərin sosial-mədəni, ictimai həyatında iştirakını daha səmərəli quraraq genişləndirən Sumqayıt Bələdiyyəsi öz fəaliyyətini Sumqayıt şəhər İcra Hakimiyyətinin şəhərin sosial–iqtisadi inkişaf proqramı, Azərbaycan Şəhər Bələdiyyələri Milli Assosiasiyasının tövsiyələri, həmçinin yerli sosial müdafiə, sosial və iqtisadi inkişaf, ekoloji və xarici əlaqələr proqramları çərçivəsində həyata keçirmişdir.

Toplantıda belə bir fakt da diqqətə çatdırılmışdır ki, şəhər ərazisində Sumqayıt Bələdiyyəsinin bütün mikrorayon və məhəllələri əhatə edən 135 məhəllə komitəsi fəaliyyət göstərir ki, onlardan da 37-si öz funksiyalarını bilavasitə mənzil-istismar sahələri olmayan ərazilərdə yerinə yetirir və vətəndaşların yerli problemlərlə bağlı müraciətlərinin həlli sahəsində müvafiq iş aparır. 2014-cü ildə Sumqayıt Bələdiyyəsinin məhəllə komitələri əhalini narahat edən məsələlərlə bağlı müvafiq ərazilərdə 227 layihə həyata keçirmişdir.

Fəaliyyətini şəhərin yeni inkişaf və quruculuq planlarına uyğun şəkildə davam etdirən Sumqayıt Bələdiyyəsi hesabat dövründə yerli problemlərin həlli məqsədilə mikrorayon və məhəllələrdə 55 iri həcimli layihə reallaşdırmışdır.

Xüsusilə mühümdür ki, yerli özünüidarəetmə qurumu olan Bələdiyyənin işində əhalinin bilavasitə iştirakının təmin edilməsinə və genişləndirilməsinə, öz fəaliyyətində aşkarlığın, şəffaflığın artırılmasına, demokratik prinsiplərin inkişaf etdirilməsinə daim önəm verilmiş, "demokratiya həftəsi” zamanı şəhərin mikrorayon və məhəllə sakinlərinin bilavasitə iştirakı ilə keçirilən görüşlərdə məhəllə komitələrinin hesabat-seçki yığıncaqlarında və bələdiyyələrə seçki kampaniyalarında Bələdiyyənin gördüyü işlər barədə hesabatlar verilmiş, sakinlərin rəy və təkliflərini nəzərə alan perspektiv fəaliyyət planları müəyyən edilmişdir.  

Hesabat ətrafında çıxış edənlərdən İndira Şəmsivari 1 saylı məhəllə komitəsinin sədri olduğu 30-cu məhəllədə həyata keçirilmiş layihələrdən, vətəndaşların kompüter savadının artırılması üzrə xüsusi layihə hazırlanmasının vacibliyindən danışmışdır.

Sumqayıtın Kimyaçılar qəsəbəsi və Maralgöl üzrə 1 saylı məhəllə komitəsinin sədri Solmaz Zeynəddinova məhəllələrdə icma işinin qurulması və sakinlərin bir struktur ətrafında cəm olaraq fəallıqlarının artırılması, gənclərə liderlik xüsusiyyətlərinin aşılanması, məhəllədaxili yolların və yataqxanaların təmiri ilə bağlı fikir və təkliflərini bildirmişdir.

Sarıqaya ərazisi üzrə 1 saylı məhəllə komitəsinin sədri Aygün Kərimova, 4-cü və 16-cı məhəllələr üzrə 1 saylı məhəllə komitəsinin sədri Şahlar Vəliyev məhəllə ərazilərində görülmüş işlərdən danışmış, Sumqayıtın hərtərəfli inkişafına göstərdiyi diqqət və qayğıya görə ölkə rəhbərinə minnətdarlıqlarını ifadə etmişlər.

Çıxış edənlər şəhər İcra Hakimiyyətinin və Bələdiyyənin ayrı-ayrı məhəllə və mikrorayonlarda apardığı abadlıq işlərindən məmnunluqlarını bildirmiş, Sumqayıt Bələdiyyəsinin ötənilki fəaliyyətini müsbət qiymətləndirmişlər.

Toplantının işində Sumqayıt şəhər İcra Hakimiyyətinin şöbə müdiri Coşqun Cəbrayılov iştirak etmişdir.

Rəhman ORXAN
Azpress.com