"Regional Sosial Təşəbbüslərə Dəstək" İctimai Birliyi Qeyri Hökumət Təşkilatlarına Dövlət Dəstəyi Agentliyinin dəstəyi ilə Sumqayıt şəhərində "Orta ümumtəhsil məktəblərində Antinarkomaniya tədbirlərinin təşkili" adlı layihə həyata keçirəcək.
Bu barədə Xeberle.com-a ictimai birliyin sədri, narkomaniya üzrə ekspert Emil Maqalov deyib.
E. Maqalov bildirib ki, layihə əsasən narkomanların çox olduğu ərazilərdəki məktəbləri əhatə edəcək: "Ümumi 300-ə yaxın şagirdi əhatə edəcək. Hər birində 50 çətin tərbiyə olunan şagird olmaqla 10 təlim keçiriləcək".
Ekspert mövcud vəziyyəti təhlil etdiyini və belə bir layihəyə ehtiyac olduğunu vurğulayıb:
"Yay aylarında uşaqlar tətildə olduqlarından asudə vaxtları çox olur, bu səbəbdən də neqativ hadisələrlə çox rastlaşırlar. Belə olduğu halda tətildən sonra məktəbdə abu hava pis olur. Bunu düşünərək məktəblərdə belə bir layihə həyata keçirməyi planlaşdırdım. Əvvələr də, mən məktəblərdə şagirdlərlə görüşüb, onların anlayacağı dildə diskussiyalar apararaq təlimlər keçmisəm. Bu dəfə isə, QHT-lərə Dövlət Dəstəyi Agentliyi təklif etdi ki, onların adından belə təlimlər keçirilsin".
Birlik rəhbəri bu sahədə olan fəaliyyətindən də danışıb: "Adətən keçirilən tədbirlərin çoxunda tərbiyəli, pis vərdişlərə meyilli olmayan şagirdlər iştrak edir. Həmin şagirdlər artıq bu haqda məlumatlıdır, həm də onların belə vərdişlərə marağı yoxdur. Ona görə də, tərbiyəsində çətinliyi olan, pis vərdişlərə daha yaxın olan uşaqlara təlim keçirəm. Çünki onların əhatə dairəsi daha genişdir. Və həmin şagirdləri öz problemlərini danışmağa çağırıram. Onlar özlərində olan problemlərdən problem deyilmiş kimi danışırlar, çünki bu vərdislərin fəsadlarını bilmirlər. Uşaqlarla danışaraq onları pis vərdişlərdən çəkindirirəm".
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
