27 Sentyabr – Anım Günü ilə əlaqədar Sumqayıt Regional Mədəniyyət İdarəsinin tabeliyində olan Sumqayıt şəhərinin Tarixi Muzeyində "Azərbaycanın Sumqayıtlı Milli Qəhrəmanları” adlı tədbir keçirilib. Vətən Müharibəsi şəhidlərinin xatirəsinin bir dəqiqəlik sükutla yad edilməsi ilə başlanan tədbiri giriş sözü ilə muzeyin direktoru Aygün Zülfüqarlı açıb. O Ali Baş Komandan, Prezident cənab İlham Əliyevin uzaqgörən siyasəti, eləcə də Müzəffər Azərbaycan ordusunun şücaəti ilə əldə etdiyimiz qələbədən danışaraq, xalqımıza yalnız zəfər, bayram yaraşdığını qeyd edib. Muzeyin bələdçisi tərəfindən iştirakçılara "Azərbaycanın Sumqayıtlı Milli Qəhrəmanları” adlı mühazirə və mövzu əsasında hazırlanmış videoçarx təqdim olunub. Tədbirdə 44 günlük Vətən Müharibəsində 13 məzunu şəhidlik zirvəsinə ucalan Yüksək Texnologiyalar üzrə Sumqayıt Dövlət Peşə Təhsil Mərkəzinin müəllim və şagirdləri iştirak edib.
Sonda muzeyin "Şəhidlər Qalereyası” zalında sumqayıtlı şəhidlərin keçdiyi döyüş yolunu əks etdirən daimi ekspozisiya tədbir iştirakçılarına nümayiş olunub.
Xəbərdən istifadə edərkən istinad etmək vacibdir.
