Xidmət Sahələri üzrə Sumqayıt Dövlət Peşə Təhsil Mərkəzinin və Sumqayıt şəhər Heydər Əliyev Mərkəzinin birgə əməkdaşlığı çərçivəsində 27 sentyabr Anım Gününə həsr edilmiş "44 günlük tarix yazanlar..." adlı anım tədbiri keçirildi.
Tədbirin moderatoru - mərkəzin tarix müəllimi Akif Kazımov Azərbaycan Respublikasının Prezidenti, Ali Baş Komandan İlham Əliyevin 27 sentyabrın Azərbaycan Respublikasında Anım Günü qeyd edilməsi haqqında 2 dekabr 2020-ci il tarixli sərəncamını tədbir iştirakçılarının nəzərinə çatdırdı.
Tədbiri giriş sözü ilə açan mərkəzin direktoru Gülşən Ömərova çıxışında Ermənistanın Azərbaycana qarşı 2020-ci il sentyabrın 27-dən başlayan növbəti hərbi təcavüzünə cavab olaraq, Azərbaycan xalqının işğal altındakı əzəli torpaqlarının azad edilməsi məqsədilə Vətən müharibəsinə başlamasını və 44 gün davam edən Vətən müharibəsinin Ali Baş Komandan İlham Əliyevin rəhbərliyi, xalq-ordu birliyinin möhtəşəm Qələbə ilə başa çatmasının mahiyyətini vurğuladı. Ölkəmizin ərazi bütövlüyü uğrunda canlarından keçən əsgər və zabitlərin müqəddəs ruhu ehtiramla yad edildi.
Tədbirin bədii hissəsi tələbə Əlibala Həşimov və Nəzrin Nağıyevanın "Xudayar" təsnifi ilə başladı. Daha sonra şəhidlərin xatirəsinə həsr olunmuş şeir və çıxışlarla davam etdirildi. Heydər Əliyev Mərkəzinin direktoru Vüsalə Qurbanova və Xidmət Sahələri üzrə Sumqayıt Dövlət Peşə Təhsil Mərkəzinin müəllimi Fəridə Tağıyeva çıxış edərək, Vətən müharibəsində qazanılan möhtəşəm Zəfərdən, müqəddəs yolda canlarını fəda edən, ölkəmizə böyük Qələbəni yaşadan qüdrətli Azərbaycan Ordusunun keçdiyi çətin döyüş yolundan, xalqımızın vətənpərvər övladlarına göstərilən dövlət qayğısı və onlara olan ehtiramdan danışdılar.
Sonda şanlı ordumuzun işgaldan azad etdiyi torpaqlara həsr olunmuş videoçarx nümayiş olunaraq, tələbələrin ifasında "Bura vətəndir" mahnısının sədaları altında tədbir başa çatdı.
Xəbərdən istifadə edərkən istinad etmək vacibdir.
