Sumqayıtda şəhid Quliyev Ramil Elşən oğlunun adı verilmiş küçənin açılışı olub.
Xeberle.com xəbər verir ki, açılış mərasimində şəhidin ailəsi, Sumqayıt şəhər İcra hakimiyyətinin nümayəndələri, Milli Məclisin deputatı Müşfiq Məmmədli, Sumqayıt Sukanal İdarəsinin rəisi Xalid Quliyev və əməkdaşları iştirak ediblər.
Bildirilib ki, Ramil Quliyev 1991-ci il yanvarın 4-də Qubadlı rayonunda anadan olub. 1997-ci ildə Sumqayıt şəhər 14 nömrəli tam orta məktəbin 1-ci sinfinə daxil olub və 2008-ci ildə şəhərin 35 nömrəli məktəbin məzunu olub. O, 2015-ci ildə Kiyevdə Personalın İdarəetməsinin Regionlararası Akademiyasının Menecment fakültəsinin məzunu olub.
Hərbi xidmətdə olduğu müddətdə Lələtəpə uğrunda gedən döyüşlərdə iştirak edib və 2016-cı ilin iyul ayında hərbi xidmətini başa vurub.
Açılış mərasimində iştirak edən onun haqqında fikirlər səsləndirərkən qeyd ediblər ki, ötən il sentyabrın 29-da Ramil də bir çox oğullarımız kimi, torpaqlarımızın ərazi bütövlüyünün bərpası üçün müharibəyə yollanıb. Ramil müharibədə rəşadətlə vuruşub. Hadrut uğrunda gedən döyüşlərdə verilən tapşırığı yerinə yetirərkən düşmənin snayper gülləsinə tuş gələrək qəhrəmancasına şəhid olub.
Xəbərdən istifadə edərkən istinad etmək vacibdir.
