Sumqayıt Regional Mədəniyyət İdarəsinə tabe olan Abşeron rayon Mehdiabad qəsəbə Diyarşünaslıq evinin kollektivi və Görədil kənd Folklor klubunun müdiri ll Qarabağ müharibəsi şəhidi Nurlan Etibar oğlu Ağakişiyevin Anım mərasimində iştirak ediblər.
Müəssisə əməkdaşları şəhidin ailəsi ilə onun xatirələrindən danışıb, maddi və mənəvi yardım göstərib.
Nurlan Ağakişiyev 2002-ci il iyulun 22-də Sumqayıt şəhərində l Qarabağ müharibəsi qazisi Etibar Ağakişiyevin ailəsində anadan olub. 2008-2017-ci illərdə Abşeron rayon Mehdiabad qəsəbə 3 nömrəli tam orta məktəbdə təhsil alıb. 2017-2019-cu illərdə isə Bakı İdarəetmə və Texnologiya Kollecində təhsil alıb.
Şəhidimiz 2020-ci ildən Azərbaycan Silahlı Qüvvələrinin "N" saylı hərbi hissəsində müddətli həqiqi hərbi xidmətdə olub. Azərbaycan Ordusunun əsgəri olan Nurlan 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsi zamanı sentyabrın 28-də Ağdam rayonu istiqamətində şəhidlik məqamına ucalıb. II Fəxri Xiyabanda dəfn olunub.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün ölümündən sonra Azərbaycan Respublikasının Prezidenti cənab İlham Əliyevin Sərəncamına əsasən Nurlan Ağakişiyev "Vətən uğrunda", "Ağdamın azad olunmasına görə" medalları ilə təltif edilib.
Xəbərdən istifadə edərkən istinad etmək vacibdir.
