"Regional Sosial Təşəbbüslərə Dəstək” İctimai Birliyi , Azərbaycan Respublikasının Qeyri- Hökumət Təşkilatlarına Dövlət Dəstəyi Agentliyinin maliyyə dəstəyi ilə 1 sentyabr tarixindən "Orta ümumitəhsil məktəblərində antinarkomaniya tədbirlərinin təşkili” layihəsinin icrasına başlayıb.
Xeberle.com xəbər verir ki, layihə üzrə ilk təlim Sumqayıt şəhəri 4 nömrəli tam orta məktəbdə keçirilib. 50 nəfər yeniyetmənin iştirak etdiyi təlimi Sumqayıt şəhər 4 nömrəli tam orta məktəbin direktoru Səadət Məmmədova açaraq iştirakçıları salamlayıb və qeyd edib ki, narkomaniya ümumi bir bəladır, ondan uzaq olmaq üçün bilgi əldə etmək vacibdir.
Sonra layihə rəhbəri Vüsal Hüseynov layihə barədə şagirdlərə məlumat verib. O, vurğulayıb ki, layihənin əsas məqsədi Sumqayıt şəhərində fəaliyyət göstərən ümumtəhsil məktəblərində yeniyetmələr arasında narkomaniya ilə bağlı məlumatlılığının artırılması və bu barədə onların maarifləndirilməsidir: "Layihənin ümumlikdə Sumqayıt şəhərində 3 ay müddətində 9 məktəbdə icra olunması nəzərdə tutulub. Sumqayıt şəhərində yerləşən 9 orta məktəbin hər birində 1 maarifləndirici tədbir keçiriləcək, mövzu ilə bağlı 275 ədəd buklet hazırlanacaq və məktəbin yuxarı sinif şagirdlərinə paylanılacaqdır. Layihənin icrası yeniyetmələr arasında zərərli vərdişlərdən uzaq olmaq, onları bu bəlaya düçar olmaması üçün aparılan təbliğat kampaniyasıdır. Bununla yanaşı, mütəmadi olaraq bütün məktəb və universitetlərdə də maarifləndirmə tədbirləri təşkil ediləcək”.
Təlimçi Emil Maqalov şagirdlərə narkomaniya barədə, onun törətdiyi fəsadlar barədə geniş məlumat verib.
Qeyd edib ki, narkomaniya qlobal problem olaraq bütün dünyanı narahat edən məsələlərdən biridir: "Ölkəmizdə narkomaniyaya qarşı düşünülmüş və qətiyyətli mübarizə aparılır. Ancaq təəssüf ki, narkotik vasitələrdən istifadə halları getdikcə artır. Xüsusilə narkotik istifadəçilərinin yaş həddi riskli olaraq xeyli aşağı düşüb. Ona görə orta məktəbin yuxarı sinif şagirdləri əsas risk qrupları hesab olunur. Bunu nəzərə alaraq orta məktəblərdə narkomaniya ilə bağlı maarifləndirici tədbirlərin keçirilməsinə böyük ehtiyac var.
Sumqayıt şəhəri ərazisi və əhalisinə görə Azərbaycanın ən böyük şəhərlərindən biridir. "Regional Sosial Təşəbbüslərə Dəstək” İctimai Birliyi Sumqayıt şəhərində apardığı araşdırmalar nəticəsində 12-18 yaş arası yeniyetmə və gənclər arasında narkotik vasitələrdən istifadə hallarının kəskin artması müəyyən edilmişdir.
Rəsmi məlumatlara görə, 2020-ci ildə narkotiklərlə bağlı cinayət məsuliyyətinə 3105 nəfər cəlb edilib.
Onlardan 16-18 yaşadək 4 nəfər, 18-25 yaşadək 251 nəfər, 26-29 yaşadək 526 nəfər, 30 yaş və ondan yuxarı isə 2308 nəfər təşkil edir. Eyni zamanda, hüquq-mühafizə orqanları tərəfindən narkotiklərin qaçaqmalçılıq yolu ilə ölkə ərazisinə gətirilməsi ilə bağlı 198 fakt aşkar edilib, faktlar üzrə qanunsuz dövriyyədən ümumi çəkisi 2 ton 197,9 kiloqram müxtəlif növ narkotik vasitə, 6 kiloqram 501,4 qram psixotrop maddə, 2 kiloqram 651 qram prekursor çıxarılıb”.
Azərbaycan Respublikası Səhiyyə Nazirliyinin məlumatına əsasən 2020-ci il 31 dekabr tarixinə respublika üzrə narkomanlıq diaqnozu ilə qeydiyyatda olanların sayı 33788 nəfər təşkil edib”.
Sonda şagirdləri maraqlandıran sualları cavablandırıldı və onlara tövsiyələr verildi.
