Martın 16-da Sumqayıt Dövlət Universitetinin (SDU) rektoru Elxan Hüseynov və Türkmənistanın Azərbaycandakı səfiri Toyli Komekov arasında görüş keçirilib.
SDU-nun mətbuat xidmətindən bildirilib ki, rektor Elxan Hüseynov qonağa ali məktəbin yaranma tarixi, tədris prosesi və beynəlxalq əlaqələri barədə məlumat verib, ölkəmizdə təhsil sahəsində həyata keçirilən layihələrdən, dövlət proqramlarından söhbət açıb. 2002-2010-cu illərdə Azərbaycanın Türkmənistanda fövqəladə və səlahiyyətli səfiri işlədiyini xatırladan rektor ulu öndər Heydər Əliyevin ölkələrimiz arasında siyasi, iqtisadi, mədəniyyət sahəsində əməkdaşlığa böyük önəm verdiyini, bu gün həmin siyasətin Prezident İlham Əliyev tərəfindən davam etdirildiyini vurğulayıb. E.Hüseynov təhsil sahəsində əməkdaşlığın genişləndirilməsi üçün mütəxəssislərin, müəllimlərin və tələbələrin mübadilə proqramlarının həyata keçirilməsinin, təhsil sərgilərinin təşkil olunmasının, hər iki ölkənin ali təhsil ocaqları arasında əlaqələrin qurulmasının, müqavilə-hüquq bazasının genişləndirilməsinin önəmini qeyd edib.
Səfir Toyli Komekov Azərbaycan və Türkmənistan prezidentlərinin dostluq və qardaş münasibətləri sayəsində ölkələrimiz arasında münasibətlərin hərtərəfli inkişaf etməsindən, əlaqələrinin yüksək səviyyədə olmasından danışıb. Təhsil sahəsində əməkdaşlığın əhəmiyyətini qeyd edən səfir SDU ilə Türkmənistan universitetləri arasında əlaqələrin qurulmasına böyük önəm verdiyini vurğulayıb.
Sonra türkmənistanlı diplomat universitetdə yaradılmış Heydər Əliyev Mərkəzi ilə tanış olub.  (azertag.az)