A kişilər, bizim millət vəkillərinə dünyanın bütün mükafatları layiqdir. Gözünü yum və ağına-bozuna baxmadan ver mükafatları. Məsələn, Hadı müəllim Rəcəbliyə. Özüm qəsdən "müəllim" kimi müraciət elədim ki, acığına gəlsin. Axı müəllimin bir başqa adı da fəhlədir - Hadı Rəcəblinin təbirincə. Məzədir Rəcəbli deputat və haqlıdır da. Xeyir ola, müəllim gün ərzində 2-3 saat dərs deyəndən sonra gedib evdə kef çəkməlidir. Zəhmət çəksin "stroykalarda” daş daşısın, palçıq qarışdırsın. Və daş daşıyarkən də rəhmətlik Sabirin "Hop-hopnamə”sindən özünə aid şeirlərdən dodaqaltı zümzümə eləsin. Maraqlısı odur ki, müəllimə bunları layiq bilən millət vəkilinə müəllim deyə müraciət edəndə xətrinə dəymirmi? Heçmi ona dərs deyən müəllimləri yadına düşmədimi? Ona görə də Hadı müəllimə dərs olsun deyə, ona "Əməkdar müəllim” adı, öz təbiri ilə desək, "Əməkdar fəhlə” adı mükafat kimi verilsin.
Mükafata layiq deputatlardan biri də Fərəc Quliyevdir. Fərəc müəllim də müsəlmanın odəfəsində Birinci Avropa Oyunları ilə əlaqədar köhnə avtomobillərin paytaxtdan çıxarılmasını və yaxud rayondan gələn maşınların Bakıya buraxılmamasını təklif edib. Elə bu dəmdə sualı birbaşa verirəm: bununla nəyi gizlətməyə çalışırsınız? Fərəc müəllim və onun kimi düşünən şəxslər problemi beləmi həll etmək istəyirlər? Xatırlayırsınızsa, bu məsələ Eurovision zamanı da gündəmə gəlmişdi. Millət vəkilləri qədər də ağıllı olmasam da, mənim də bir sıra təkliflərim var. Məsələn, Bakının meri Hacıbala Abutalıbovu da göndərin məzuniyyətə, çünki o da köhnə avtomobillər kimi paytaxtın görüntüsünü pozur. Yeri gəlmişkən, köhnə avtomobillərdən savayı Bakıdan çıxarılası çox məmur var. Onları da kürüyüb atmaq və ya rayonlara sürgün etmək lazımdır. Lap müvəqqəti "mavi”lərlə də əvəz etmək olar. Qoy avropalı vətəndaş görsün ki, biz necə "abrazovonski”yik. Ona görə də Fərəc müəllimə də "Milli abrazovonski” mükafatını vermək yerinə düşər. Sonuncu mükafatçı isə Babəki anti-qəhrəman, az qala, vətən xaini çıxardan millət vəkili Fazil Mustafa bəydir. Zarafat deyil, deputat qırmız-qırmızı milyonlarla azərbaycanlının əsrlərdir qəhrəman kimi qəbul etdiyi Babəki az qala adi bir çapovulçu adlandırdı. Görəsən, bu millət vəkilləri nə yeyib-nə içirlər ki, bu cür əndrabadi fikirlər və təkliflər söyləyirlər. Xalqın tarixinə dəyərsiz bir çuval kimi təpik vuran, onun bir gün azadlıq üçün 22 il yorulmadan-usanmadan vuruşan-döyüşən qəhrəmanını aşağılayan şəxsə necə millət vəkili deyəsən axı?! Təklif edirəm ki, Fazil Mustafaya "Əkrəm Əylisli” mükafatını verək.

Elvin Babayev
Xeberle.com
P.S. Ay xalqım, ay millətim, bu vəkilləri siz seçmisiz, yoxsa Gülər Əhmədova?
P.S.S. Bu il də seçki ilidir. Milli Məclisə seçkilər keçiriləcək və yenə namizədlər öz platformalarını pafosla seçicilərinə açıqlayacaq. Görüşlər, debatlar, televiziyalarda namizəd qırğını-filan. Yəni noyabr ayında fısqırıq-həngamə qopacaq. Sadəcə xatırlatdım...