Sumqayıt Regional Mədəniyyət İdarəsinə tabeli Sumqayıt şəhərinin Tarixi Muzeyində "Sumqayıt” qəzetinin 70 illik yubileyi ilə əlaqədar redaksiya əməkdaşları ilə görüş keçirilib. Sumqayıt Regional Mədəniyyət İdarəsinin rəis müavini İlham Əhmədov görüşü giriş sözü ilə açaraq vurğulayıb ki, 1952-ci ildən nəşrə başlayan, Sumqayıt şəhərinin yaranma və yaşam tarixində özünəməxsus yeri və rolu olan "Sumqayıt” qəzeti uzun illərdir ki, öz fəaliyyətini uğurla həyata keçirir. O, redaksiya kollektivinə fəaliyyətlərinin uğurla davam etdirilməsini arzulayıb. Muzeyin direktoru Aygün Zülfüqarlı qeyd edib ki, Sumqayıt şəhər İcra Hakimiyyətinin başçısı Zakir Fərəcovun imzaladığı 29.09.2022-ci il tarixli Sərəncamı ilə şəhərdə ictimai fikri düzgün formalaşdırmaq funksiyasını uğurla həyata keçirən "Sumqayıt” qəzetinin 70 illik yubileyi geniş şəkildə qeyd edilir.
Qəzetin baş redaktoru Sübhan Quliyev çıxış edərək qəzetin tarixindən, fəaliyyət istiqamətlərindən söz açıb. Natiq çıxışında kollektivi adından göstərilən diqqətə görə öz təşəkkürünü bildirib. Görüş diskussiya şəklində davam etdirilib.
Xəbərdən istifadə edərkən istinad etmək vacibdir.
