Sumqayıt Bələdiyyəsi xalqımızın və bütün Türk dünyasının əziz bayramlarından olan Novruz bayramı münasibətilə şəhərin bir qrup müharibə əlilinə və aztəminatlı ailələrə bayram sovqatları hədiyyə etmişdir. 
Bələdiyyə tərəfindən "Qarabağ Müharibəsi Əlilləri, Veteranları və Şəhid Ailələri”, "Azərbaycan Çernobıl Əlilləri İttifaqı” İctimai Birliklərinin, Azərbaycan Gözdən Əlillər, Azərbaycan ƏIil Qadınlar, "Əlillərin beynəlxalq əməkdaşlığı uğrunda” cəmiyyətlərinin, II Dünya müharibəsi Veteranları Birliyinin Sumqayıt şəhər şöbələrinin daha çox ehtiyacı olan üzvləri və aztəminatlı ailələr, kimsəsiz, tənha adamlar üçün bayram süfrələrinin ət, yağ, un, çay, düyü, şirniyyat və s. ərzaqla təminatı məqsədilə bayram xonçaları bağışlanmışdır. 
Bayram sovqatları alan ailələr Novruz bayramını bütün xalqımızla birgə bol bayram süfrəsi ətrafında keçirmək imkanı yaradıldığına, göstərilən diqqət və qayğıya görə ölkə Prezidentinə dərin minnətdarlıqlarını ifadə etmiş, onun rəhbərliyi ilə Azərbaycanın daha da inkişaf edəcəyinə, xalqımızın daha firavan yaşayışının təmin ediləcəyinə inamlarını bildirmişlər.