Aprelin 4-də insanlar nadir fəza hadisələrindən olan "Qanlı Ay tutulması”nı izləyə biləcəklər. Ayın dünyanın kölgəsinə girməsi nəticəsində qırmızı rəngi əks etdirən "Qanlı Ay tutulması” 5 dəqiqədən də az müddəti əhatə edəcək.
XXI əsrin bu ən qısa Ay tutulması Tərəzi bürcündə baş verəcək. Adı ilə diqqət çəkən təbiət hadisəsi ən az Günəş tutulması qədər narahatlıq doğurur.
"Qanlı Ay tutulması” Şərqi Asiya, Yeni Zelandiya, Sakit okean, Qərbi və Şimali Amerika ölkələri ilə yanaşı, Avstraliyada, qismən də Türkiyədə izlənə biləcək.
Ayın tutulması zamanı qırmızı rəngin əks olunması "Qanlı Ay”, yəni "Blood Moon” adlandırılır. Aprelin 4-də baş verəcək bu hadisə 2014-2015-ci illər üçün üçüncü hadisə olacaq. Dördüncü bu cür hadisə isə sentyabrın 28-də reallaşacaq və beləliklə, 2014-2015 illərdəki Tetrad (Dördlü) ardıcıllığı tamamlanmış olacaq.
Astroloqlar həmin ərəfələrdə insanların digər günlərə nisbətdə daha çox maqnit dalğalarının təsirinə məruz qalacağını, zəlzələ kimi təbii fəlakətlərin də baş verə biləcəyini ehtimal edirlər. (azertag.az)