Azərbaycan Demokratik Tələbə Gənclər Təşkilatı (ADTGT) Avropa Parlamentinin saxta, uydurma erməni soyqırımının tanınması və bunun Avropada anılması haqqında ədalətsiz qərarına etiraz olaraq bəyanat yayıb.
Bəyanatda Avropa Parlamentinin bu qərarının uğursuz olduğu bildirilir: "AP-nin bu qətnaməsi regionda sabitliyi pozmaq istiqamətindəki bir cəhddir. Bu, ondan irəli gəlir ki, AP rəsmiləri və üzvləri tarixlə bağlı məlumatlı deyillər. Onlar bir əsr əvvəl Osmanlı dövlətində baş vermiş hadisələrlə bağlı ermənipərəst mövqe tutublar. AP-nin araşdırılmamış faktlarla bağlı qərar qəbul etməsi heç bir halda haqlı sayıla bilməz. Həm Ermənistan, həm də əksər Avropa ölkələrində hadisələrə dair arxivlər hələ də bağlıdır və açıq-aydın görünür ki, arxivi açmaqdan imtina yalnız həqiqəti ermənilərə daha uyğun formada dəyişməyə dəlalət edə bilər."
ADTGT-nın bəyanatında AP-dən qəti şəkildə bu qətnamənin geri götürülməsi tələb edilir: "Bu qərar ikili standartların nümayiş etdirilməsinin bariz nümunəsidir. AP bununla ermənilərin maraqlarını açıq şəkildə müdafiə etmiş olur.
Ermənistan təcavüzkar ölkədir. 20 ildən artıqdır, Azərbaycan ərazilərini işğal altında saxlayır. Ermənistan qoşunları bütövlükdə Azərbaycan xalqına qarşı sübut olunmuş soyqırımı törədib. AP faktiki olaraq 1992-ci il Xocalı hadisələrini heç bir formada tanımır.
Bu, Azərbaycana və ümumiyyətlə, türk dünyasına qarşı bir haqsızlıqdır. Biz 15 apreldə AP-nin Brüsseldə keçirilmiş plenar iclasında qondarma erməni soyqırımının 100 illiyinin Ümümavropa anımına dair qətnaməsini qəti şəkildə pisləyir və bu əsassız qərarın ləğv olunmasını tələb edirik."
Xəbərdən istifadə edərkən istinad etmək vacibdir.
