"Rusiyanın Ermənistanla dostluq münasibətlərini qurması onun Türkiyəyə qarşı müharibə etməsi demək deyil. Türkiyə Rusiya üçün geosiyasi, iqtisadi məsələlərdə əhəmiyyətli partnyordur”.  

Bunu Beynəlxalq Avrasiya Hərəkatının lideri, politoloq Aleksandr Duqin Ermənistanın 1in.am analitik portalına müsahibəsində deyib. 

O, Rusiya prezidenti Vladimir Putinin qondarma erməni soyqırımı günü Yerevana səfərinin Türkiyə ilə münasibətlərə təsiri perspektivi barədə danışarkən söyləyib ki, Kreml rəsmi Ankara ilə əlaqələrin inkişaf etdirilməsində maraqlıdır. 

Ekspert bildirib ki, 24 apreldə Qazaxıstan və Belarus da Ermənistanla birgə olmalıdır.

Politoloqun fikrincə, bəzi qüvvələr Avrasiya İqtisadi İttifaqına daxil olan Belarus, Qazaxıstan və Ermənistanın arasını vurmağa çalışır. 

Aleksandr Duqin qazaxların erməniləri sevməməsi ilə bağlı məsələyə də toxunarkən belə deyib:  

"Məsələ ondadır ki, müxatılif qazax politoloqları Rusiyanı, ümumiyyətlə Avrasiya İttifaqını çox sərt şəkildə təndiq edirlər. Rusiya əleyhinə olan erməni politoloqlar da var. Ancaq bunlar rəsmi mövqedən uzaqdır.  Mən heç vaxt Nursultan Nazarbayevin Azərbaycanla dost olmağına baxmayaraq onun adından ermənilərin hüquqlarını təhqir edən açıqlama eşitməmişəm”.  

Qeyd edək ki, Aleksandr Duqin Rusiyanın millətçi politoloqlarından biridir. O, Kremlin imperiyapərəst ideoloqu kimi mütəmadi olaraq postsovet məkanında yerləşən dövlətləri, Qərbi hədələyən və tənqid edən açıqlamalar verir.  (Modern.az)