Corc Sorosun maliyyələşdirdiyi "Açıq cəmiyyət” Fondu Budapeştdə regional mərkəzini bağlayır və Berlində yeni mərkəz açır.
Bu barədə "Die Presse” nəşri məlumat yayıb.
Macarıstanın "444.hu” portalının məlumatına görə, Budapeştdəki filial avqustun 31-də bağlanacaq. Regional mərkəz Berlinə tam köçürülməzdən əvvəl Vyanada müvəqqəti ofis yaradılacaq. Soros Fondunun Budapeştdəki mərkəzində təxminən 100 nəfər işləyir, onlardan 60-ı yerli əməkdaşlardır.
Macarıstanın Baş naziri Viktor Orban aprelin 20-də yerli radioya müsahibəsində regional mərkəzin Budapeştdə bağlanmasından məyus olmadığını bildirib.
Avropada Soros Fondunun, həmçinin Vyana, Brüssel, Paris və Londonda filialları var. "Açıq cəmiyyət” fondu Macarıstanda 1984-cü ildən fəaliyyətə başlayıb. "444.hu” portalı yazır ki, fondun xaricdə təhsil almaq üçün verdiyi təqaüdləri iqtidar partiyasının – "FİDES – Macarıstan Vətəndaş İttifaqı”nın əsasını qoyan bir neçə adam, o cümlədən indiki Baş nazir Viktor Orban da vaxtilə alıb.
Macar-yəhudi əsilli amerikalı milyarder, 87 yaşlı Corc Soros Viktor Orbanı sərt tənqid edən hesab olunur. Öz növbəsində FİDES partiyası Sorosa qarşı kampaniya aparır. 2017-ci ilin iyulunda Macarıstan parlamenti xaricdən maliyyələşən qeyri-hökumət təşkilatları üzərində dövlət nəzarətini gücləndirən qanun qəbul edib. Qanun ilk növbədə Soros tərəfindən maliyyə dəstəyi alan təşkilatlara yönəldilib və onların üzərinə hər il ən vacib xarici sponsorlarının siyahısını vermək və "xarici maliyyədən səmərə əldə edən təşkilat” kimi qeydiyyatdan keçmək öhdəliyi qoyur.(Azertac)

Xəbərdən istifadə edərkən istinad etmək vacibdir.