ABŞ dünyanı qlobal dağıntı gücünə malik olan silahla hədələyir. Rusiyanın cavabı nə olar?
FaktXəbər-in məlumatına görə, rus ekspertləri bunu Rusiya üçün ən ciddi təhlükə kimi dəyərləndiriblər. İndi gəlin baxaq, Birləşmiş Ştatların bu nəhəng silahının təhlükəsi nədən ibarətdir.
Ölüm bir saata ərzində haqlayacaq
Silahın adı “Ani Qlobal Zərbə”dir (Prompt Global Strike). ABŞ bu qeyri-nüvə silahı ilə dünyanın istənilən nöqtəsini bir saat ərzində vura biləcəyindən xəbər verir.
Niyə qeyri-nüvə silahı? Çünki nüvə silahı ilə hücum edən hər hansı bir ölkə dərhal analoji cavabla üzləşə bilər. Bu hücum isə “humanist” bir hücumdur.
O silahdan necə qorunmaq olar?
Bir müddət əvvəl “Valday” klubunun üzvləri Rusiya prezidenti Vladimir Putinin görüşünə gələrəkən onlardan biri Vladimir Putinə ABŞ-ın 60 dəqiqə ərzində istənilən ölkəni diz çökdürə biləcək silaha malik olduğunu deyib. Sonra Rusiyanın prezidentinə, “siz ABŞ-ı 30 dəqiqə ərzində məhv edə bilərsizmi?” sualını verib. Putin isə bir müddət düşündükdən sonra soyuqqanlı şəkildə belə deyib: “Bəlkə ondan da tez.”
Xatırladaq ki, SSRİ-in zamanında Rusiya “Molodets” dəmiryol raket kompleksinə malik idi. Amma 2005-ci ildə rəsmi Moskva bu möhtəşəm silahını utilizasiya edib. Bununla da Rusiya Amerikanın ən qorxduğu silahla vidalaşıb.
ABŞ-ı sarsıdacaq cavab yox deyil
Rusiya da müasir qeyri-nüvə silahına malikdir. Və onun da öz ani qlobal zərbə endirməyə gücü var.
Həmçinin rusların ixtiyarında sualtı qayıqlar və hava üçün “Kalibr” və “X-555” tipli strateji qanadlı raketlər mövcuddur. Bir sıra KİV-lərin məlumatına görə, Rusiya silahlanmaya yeni “X-101” raketini də alıb. Bu raketlər isə ABŞ-ın raketlərindən heç də geri qalmır. Əksinə atəş məsafəsi baxımdan üstələyir.
ABŞ-dan bir baxış
“Bizim sistemimizin vəzifəsi münaqişə zamanı və ya fövqəladə vəziyyətdə dünyanın istənilən nöqtəsinə dəqiq və ani zərbə endirməkdir”.
Bu sözləri ABŞ Silahlı Qüvvələrinin Qərargah Rəisləri Komitəsinin sabiq rəhbərinin müavini Ceyms Kartray deyib.
Generalın sözündən məlum olur ki, amerikalı əsgər düşmənin hər hansı bir ərazisinə girməzdən öncə oradakı əsas müdafiə qüvvələrini, eləcə də idarəetmə və strateji obyektləri bu silah vasitəsi ilə dəqiq zərbələrlə məhv edə bilər.
Rusiyadan bir baxış
“Amerikalıların bu günə olan qeyri-nüvə, qlobal və ən effektiv zərbəyə malik olan “Trident II D5” raketləridir. Birləşmiş Ştatların “Falcon HTV-2” və “AHW” hipersəsli qanadlı raketlərinin sinağı çox uğursuz oldu. Onlar dəqiq zərbə endirmək üçün hələ ki, bu tipli raketin həddən artıq yüksək sürətini idarə edə bilmir.”
Bu sözləri rus polkovnik və texniki elmlər doktoru Vladimir Noçevniy deyib. Onun sözlərinə görə, ABŞ hazırda digər bir nəhəng silah hazırlayır. Polkovnik bildirib ki, uzunluğu 6 m eni 30 sm olan volfram oxları hədəfi 3500 m/s sürətlə vurmağa qadirdir və partlayışı 12 ton trotil ekvivalentə bərabərdir. Rusiyanın müdafiə nazirinin müavini Yuri Borisov bildirib ki, ABŞ volfram oxlarını 2017-ci ilə qədər hazırlayacaq. Onun sözlərinə görə, o vaxta kimi Rusiyanın da bu silaha layiqli cavabı olacaq.
Amerikanın ədası
Ruslar bildirirlər ki, amerikalıların silah aləmində inqilab kimi təqdim etdiyi istehsallarının çoxunun hazırlığı ilə Rusiya 80-ci illərdə məşğul olub. Məsələn, ABŞ-ın hipersəsli “X-51A” yeni nəsil raketi əslində rusların 1991-ci ildə hazırladığı “Xolod” raketinin analoqudur. O vaxtlar Rusiya iqtisadiyyati yox dərəcədə olduğu üçün ölkənin Müdafiə Nazirliyi “Xolod”un sınaq nəticələrini Birləşmiş Ştatlara satıb. Sən demə ABŞ-ın qlobal dağıntı gücünə malik olan müasir silahı rus beyninin ideyasıdır.
Bu yaxınlarda Rusiya parlamentində baş nazir müavini Dmitri Roqozin bildirib ki, hipersəsli raketlərimiz ABŞ raketlərini üstələyir: “Birləşmiş Ştatlarının əsas problemi öz yüksək sürətli raketlərinin idarə edə bilməməsidir. Əgər amerikalılar raketlərini hədəfə tuşlaya bilmirsə, onda hansı dəqiq və ani qlobal zərbədən danışmaq olar?”
ABŞ-ın volfram oxlarına gəldikdə isə bir sual ortaya çıxır. Maraqlıdır, Amerika çəkisi 10 tona yaxın olan oxları 3500 m/s sürətlə hədəfə necə tuşlayacaq. Düzdür, Pentaqon bu silahı kosmosdan atacağını deyib. Onda başqa bir sual yaranır: Pentaqon volfram oxlarını kosmosa necə göndərəcək? Hətta əgər bunun öhdəsindən gəlsə belə, Rusiya S-400 və S-500 kompleksləri ilə bu oxları asanlıqla məhv edə biləcəyini deyir.
Xəbərdən istifadə edərkən istinad etmək vacibdir.
