Fransanın Anqulem şəhərinin hakimiyyəti evsizlərlə mübarizə məqsədilə Mars çölündə yerləşən meydandakı skamyaları dəmir çəpərə alıb.Skamyalar dəmir çəpərə alındığından əhəmiyyətlərini itirib. Çünki artıq oturacaqlara kiminsə yaxınlaşması qeyri-mümkündür.

Hasarların fotoşəkilləri internetdə yerləşdirildikdən sonra şəbəkə istifadəçiləri bu qaydanın əleyhinə mülahizə yürütməyə və hakimiyyətdən metal konstruksiyaların sökülməsini tələb etməyə başlayıblar.

Şəhərin meri K.Bonnefort və onun müavini L.Qvitton buna cavab olaraq bildiriblər ki, həmin oturacaqlardan yalnız müntəzəm şəkildə alkoqoldan istifadə edən adamlar faydalanırdılar. Məmurlar həmin şəxslərin şəhərin mərkəzində yatmalarına son qoymaq üçün hasar çəkildiyini qeyd ediblər.

Bir qədər sonra Şəhər Şurası internet istifadəçilərinin rəyini nəzərə alıb və çəpərlər sökülüb. Bununla yanaşı, K.Bonnefort bəyan edib ki, yekun qərar hələ qəbul edilməyib və şəhər hakimiyyəti problemin müzakirələrinə gələn ilin əvvəlində başlayacaq. (trend.az)