Qabil Hüseynli: "Azərbaycanda onlara simpatiyası olanlar var və lazım gəlsə, tapşırıq yerinə yetirərlər, Səudiyyə Ərəbistanının ölkəmizdə əlaqələri zəiflədilməlidir”
Dünya terror şəbəkəsi olan "İslam dövləti” artıq iki müstəvidə təhdidə başlayıb. İŞİD qüvvələri neft buruqlarını partlatmaq və medianı məhv etməklə dünyanı qorxutmağa başlayıb. Fransada jurnalistlərin qətli, Azərbaycanda isə neft buruqlarının məhv ediləcəyi haqda səslənən hədələr belə düşünməyə əsas verir.
Belə fikirlər səslənir ki, İŞİD Azərbaycana ayaq basıb. Hətta Türkiyə mətbuatı da MTN-in keçirdiyi əməliyyatları nümunə gətirib ölkədə təhlükəsizlik tədbirləri görülməyə başladığını yazıb. Bəs Azərbaycanda terror üçün hansı nöqtələr həssasdır və İŞİD-in hədələri reallaşa bilərmi?
Suallarımızı cavablandıran politoloq Qabil Hüseynli hesab edir ki, İŞİD-in Azərbaycanla bağlı planlarının olması haqda xəbərlər çox şişirdilib. Siyasi şərhçinin sözlərinə görə, terrorçu qüvvələrin neft buruqlarına, redaksiyalara hücumu ehtimal edilə bilər:
"Ancaq bunun mümkünlük dərəcəsi çox aşağıdır. Çünki Milli Təhlükəsizlik Nazirliyi tərəfindən İŞİD-ə qoşulanlar həbs edilir və nəzarətə alınır. O baxımdan İŞİD-in Azərbaycanda mühüm obyektlərə zərbə endirməsi imkanı yoxdur və deyilənlərə blefdir. Sadəcə, terrorçu təşkilat savadsız adamları cəlb etmək üçün bu metodlardan istifadə edir”.
Q.Hüseynli deyir ki, dünya anti-İŞİD koalisiyası mübarizəni gücləndirib, hərbi qüvvələrin sayını artırıb:
"Bu mənada İŞİD-in əsas qüvvələrinin məğlub edilməsi uzun çəkməyəcək. Onlar hər gün daha çox itki verir və qüvvələr arasında artıq rabitə pozulub. Eyni zamanda aviazərbələr endirilir, quru qoşunlar da bu mübarizəyə qatılacaq.
Azərbaycana qarşı təbii ki, müəyyən qüvvələrin fəaliyyəti var. Bunların arasında İŞİD-ə simpatiyası olanlar da var. Onlar lazım gəlsə, İŞİD-in verdiyi tapşırığı yerinə yetirərlər. Ancaq onların iqtisadi imkanları çökdürülür".
Analitik əsas diqqəti vəhhabilərə yönəltməyi vacib sayır: "Onlar Azərbaycanda ciddi iqtisadi şəbəkə qura biliblər. Bu şəbəkə hesabına müxtəlif ticarət nöqtələrini ələ keçiriblər. Ona görə də əsas diqqət vəhhabilərə qarşı yönəldilməlidir.
Onların həm leqal, həm qeyri-leqal fəaliyyəti sıradan çıxarılmalıdır. Bundan sonra kiçik cərəyanların neytrallaşdırılması işləri aparılmalıdır. Burada əsas rolu Səudiyyə Ərəbistanı oynayır. Vəhhabi ideyasının yayılması üçün böyük maliyyə vəsaitləri ayırır. Onlar da maddi vəsaitlərdən gen-bol istifadə edirlər. Səudiyyə Ərəbistanının Azərbaycanda əlaqələri zəiflədilməlidir. Ola bilsin ki, dövlətin içində dindar kəsimdən Səudiyyə Ərəbistanının təsiri altına düşən var. Ancaq dövlət güclüdür və imkanlardan istifadə edilməlidir. Hələ ki onlar güclü potensiala malik deyil, bəziləri yenicə bu yola qədəm qoyublar. Şiə ölkəsində həm dindar kəsim, həm hüquq-mühafizə orqanları, həm ictimaiyyət çəkici bir yerə döyməlidir. Əsas yük hüquq-mühafizə orqanlarının üzərinə düşür və peşəkar iş qurulmalıdır". (musavat.com)
Xəbərdən istifadə edərkən istinad etmək vacibdir.
