ABŞ-da ömürlük həbs cəzası çəkən terrorçu Zakarias Mussaui hakimə göndərdiyi yazılı ifadədə Səudiyyə Ərəbistanının yeni kralı Salmanı ələ verib.

 "The New York Times” qəzeti Z.Mussauinin 11 sentyabr terror qurbanlarının yaxınlarının Səudiyyə Ərəbistanına qarşı qaldırdığı iddianı araşdıran hakim Corc Danielsə göndərdiyi yazılı ifadəyə istinadən bu haqda yazır.

Z.Massaui bildirir ki, "əl-Qaidə” liderləri onu ya 1998, ya 1999-cu ildə terror təşkilatının sponsorlarının kompüter məlumat bazasını hazırlamaq üçün Əfqanıstana göndəriblər.



Terrorçunun bildirdiyinə görə, həmin siyahıya o vaxt şahzadə, Səudiyyə kəşfiyyatının o vaxtkı rəhbəri Turki ibn Feysəlin, şahzadə Bandar bin Sultanın (o vaxt ABŞ-da səfir işləyib, bu yaxınlaradək kəşfiyyat rəisi olub), tanınmış səudiyyəli milyarder və investor, şahzadə əl-Valid ibn Talal və bu ölkənin digər nüfuzli şəxslərinin adlarını daxil etmişdi.

İfadəsində Z.Massaui həmçinin Səudiyyə Ərəbistanında indiki kral, o vaxt taxt-tacın varisi olan Salmanla və kral ailəsinin digər üzvləri ilə görüşünü də təsvir edir. Həmin görüşdə terrorçu "əl-Qaidə” lideri Üsamə bin Ladenin məktubunu Salmana çatdırıb.

Z.Massaui bu ifadəsini könüllü verib. O, həbsxanadan vəkilləri vasitəsilə bildirib ki, Səudiyyə Ərəbistanına qarşı ifadə vermək istəyir. Nəticədə onu həbsxanada iki gün dindiriblər.

Z.Massaui 2006-cı ildə ömürlük həbsə məhkum edilib. O, ifadəsində bildirib ki, bin Ladenin şəxsi göstərişi ilə 2001-ci il, sentyabrın 11-də təyyarə qaçıraraq Ağ Evə çırpmalı idi. Onu 11 sentyabr terror hücumlarına bir neçə həftə qalmış həbs ediblər.  (virtualaz.org)