Dünyanın ən zəngin insanları həyatlarının ən əlamtədar hadisələrindən olan toy mərasimlərini, adətən qeyri-adi yerlərdə keçirməyə üstünlük verirlər. Onların bəziləri bu mərasimi şəxsi gəmilərində, bir çoxları paparatsilərin görüntü əldə edə bilməyəcəyi uzaq və kiçik adalarda, digərləri dövlət qoruqlarında, bəziləri sadəcə şəxsi malikanələrində təşkil etməyə üstünlük verir. Dünya milyarderlərinin nikaha girdiyi məkanlarla bağlı yazını təqdim edirik.  

Mark Zukerberq – Facebook-un banisi
Toy yeri - ABŞ, Kalifoniya ştatının Palo-Alto şəhəri:

"Facebook”un yaradıcısı Mark Zukerberq toyunu Palo-Alto şəhərindəki evinin arxa həyətində edib. 33,3 milyard dollara malik olan iş adamı 2012-ci ildə Nyu-York Universitetinin tibb fakültəsində təhsil alan Pristilla Çanla ailə həyatı qurmuşdu. Ekspertlər Çanın gəlinlik paltarını 75 min dollar dəyərində qiymətləndirmişdilər. Xüsusi sifarşilə hazırlanan üzüklər isə 150 min dollar dəyərində idi. Toy mərasiminə cütlüyün 100 nəfər yaxını qatılmışdı. Yemək menyüsü isə Zukerberqlə Çanın ilk görüş zamanı dadına baxdıqları yeməklərdən ibarət idi.

Sergey Brin – "Google”nin həmtəsisçisi
Baham Adaları:

Sergey Brinin toy mərasimi 2007-ci ilin sentyabrında ABŞ-da xüsusi gizliliklə keçirilib. Sonradan toy mərasiminin Baham adalarından olan Muşa Key adasında baş tutduğu aydınlaşdı. 60 qonaq son ana qədər hara uçduqlarını və hansı məclisdə iştirak edəcəklərini bilməyib. Sergey Brin isə öz növbəsində qarşıdan gələn toy barədə heç bir məlumat vermirdi və nişan üzüyü taxmırdı. Sonradan "Google” yaradıcısının biotexnoloq Anna Voyjitski ilə evləndiyi aydınlaşdı. Lakin 2013-cü ildə həyat yoldaşının ona xəyanət etdiyini öyrənən Voyjitski ərindən ayrılıb.

Corc Soros – maliyyəçi
ABŞ, Nyu-York ştatı, Keramur musiqi mərkəzi:

Dünya zənginləri, adətən çox nadir hallarda boşanırlar. Dünyanın ən zəngin 400 şəxsindən yalnız 100-ə yaxını ikinci dəfə ailə həyatı qurub. Lakin milyarder və xeriyyəçi Corc Soros bu baxımdan istisna təşkil edir. 2013-cü ilin sentyabrında 84 yaşlı maliyyəçi özündən 40 yaş cavan Tamiko Boltonla evləndi. 44 yaşlı Bolton onlayn yoqa xidmətləri təklif edən şirkətin yaradıcısı idi. Corc Sorosun evində başlayan mərasim sonradan Nyu-Yorkun Keramur incəsənət və musiqi mərkəzində davam edib. 500 nəfər qonaq arasında Beynəlxalq Valyuta Fondunun prezidenti Kristin Laqard, Dünya Bankının prezidenti Cim En Kim, "U2” qrupunun məşhur solisti Bono və başqa məşhurlar olub. Soros və Bolton qonaqların işini yüngülləşdirmək üçün onlara toy hədiyyələri deyil, müəyyən xeyriyyə fondlarına pul köçürməyi təklif etmişdilər.

Şon Parker – "Facebook”, "Napster” və "Plaxo” şirkətlərinin həmtəsisçisi
ABŞ, Biq-Syur, Kaliforniya:

Şon Parker və sevgilisi Aleksandra Lenas 2013-cü ildə ailə həyatı qurarkən toylarını "Taxt oyunları” serialının stilistikasında təşkil etməyi planlaşdırıblar. Amma sonradan daha bir neçə Hollivud serialının elementləri əlavə edildiyi üçün toy mərasiminə xüsusi olaraq 1 milyon dollarlıq dekorasiya qurulub. Kalifoniyanın Biq Syur qoruğunda keçirilən toy ümimlikdə, Parkerə 9 milyon dollar vəsaitə başa gəlib. Mərasimi dövlət tərəfindən qorunan qoruqda etdiyi üçün o, əlavə olaraq 2,5 milyon dollar cərimə də ödəməli olub. "Forbes” jurnalının məlumatına görə, Parkerin şəxsi kapitalı 2015-ci il üçün 2,9 milyard dollar təşkil edir.  

Larri Peyc- Google-un təmtəsisçisi
Havay adaları:

Larri Peyc iş ortağı Sergey Brinlə eyni ildə evlənib. Sadəcə, Peycin toy mərasimi 2007-ci ilin dekabında keçirilib. Əlamətdar hadisə Peycin toyunun digər milyarder dostu Riçard Brensona məxsus Nekem adasında baş tutmasıdır. 600 qonağın iştirak etdiyi toya ABŞ-ın keçmiş prezidenti Bill Klinton və xanımı Hillari Klinton, San-Fransiskonun o zamankı meri Qevin Nyusom, "U2” qrupunun solisti Bono, Sergey Brin başda olmaqla "Google” korporasiyasının bir qrup rəhbəri və daha bir neçə milyarder təşrif buyurub. Milyarderin həyat yoldaşına gəlincə, 27 yaşlı Lüsinda Sautvort Oksford Universitetində elmlər doktoru və Stenford Universitetinin biotibb fakültəsinin doktoranturasında təhsil alan gənc xanımdır.

Fransua Anri Pino – "Kering” Holdinqinin sahibi
Venesiyanın "Punta della Dogana” müasir incəsənət muzeyi:

"Kering” Holdinqinin (Alexander McQueen, Balenciaga, Gucci, Saint Laurentvə s. brendlər daxildir) sahibi Anti Pino 2009-cu ildə 43 yaşlı meksikalı aktrisa Salma Hayeklə ailə həyatı qurub. İki dəfə ayrılıb-barışan cütlük buna görə toyu 2 yerdə qeyd etmək qərarına gəlirlər. 2009-cu ilin fevralında Pino-Hayek cütlüyü Paris bələdiyyələrindən birində rəsmi nikaha daxil olurlar. Həmin ilin aprelində isə onlar Venesiyanın "Le Fenice” opera teatrında yenidən nikaha daxil olurlar.  Ardınca, "Punta della Dogana” müasir incəsənət muzeyində 150 nəfərin iştirakı ilə maskadar keçirilir. Mərasimdə Fransanın keçmiş prezidenti Jak Şirak, "Vogue” jurnalının ABŞ versiyasının baş redaktoru Anna Vintur, dizayner Stella Makkartni və Hollivud ulduzları qatılıblar. Fransua Anri Pinonun şəxsi sərvəti təxminən 8,7 milyard dollar məbləğində dəyərləndirilir. (modern.az)