"ABŞ bu günə qədər Suriyanı ələ keçirmək üçün müxtəlif variantlardan istifadə edib. Kimsə düşünürsə ki, ABŞ danışıqlara getməsi ilə Suriyadan əl çəkəcək, olduqca böyük yanlışlığa yol verir. Onların nəyin ki, Suriyadan, hətta böyük Yaxın Şərq regionundan uzaqlaşmaq fikirləri yoxdur.”
Bu sözləri politoloq Mayis Güləliyev ABŞ dövlət katibi Con Kerrinin Bəşər Əsəd hökuməti ilə danışıqlara gedəcəyi ilə bağlı açıqlamasına münasibət bildirərkən qeyd edib.
Müsahibin sözlərinə ABŞ Yaxın Şərqlə paralel olaraq Ukrayna vasitəsilə Rusiyaya yaxınlaşaraq regionda ara qarışdırmaqdan əl çəkmək istəmir:
"Bir sözlə ABŞ dünyanın əksər hissələrində özünün böyük nüfuzunu saxlamaqda israrlıdır və bu istəyindən də əl çəkmək fikrində deyil. Suriya daxilindəki radikal cərəyanlar vasitəsilə aranı qızışdırsa da hakimiyyət çevrilişinə nail ola bilmədi. Əvəllər "Azad Suriya Ordusu” adı altında müxalifət formalaşdırmağa çalışdılar. Bundan sonra Türkiyə və Suriya arasında ciddi qarşıdurma yaratmağ çalışsalar da buna nail olmadılar. Nəhayət İslam adı altında qruplaşma yaradaraq daxildə parçalanma yaratmağa başladılar. Onlar bu addımları ilə sanki bir güllə ilə bir neçə dovşan vurmaq istədilər. İstədilər bununla həm islami gözdən salsınlar, həm müsəlman ölkələrinin daxilində qarşıdurma yaratsınlar, həm də ki, Yaxın Şərqi nəzarətdə saxlasınlar.”
Çox hiyləgərcəsinə və kifayət qədər böyük məqsədləri olan bir ideyanın elə də ciddi nəticə vermədiyini söyləyən politoloq, "İŞİD layihəsinin ABŞ tərəfindən hazırlanması gün kimi aydındır. Əslində bu terrorçu qruplaşma təkcə Suriya hakimiyyətinə qarşı deyil, bütövlükdə bütün islam dünyasına qarşı yönəlmiş bir məsələdir” – deyə bildirdi:
"Hazırda ABŞ guya İŞİD-in mövqelərini bombalayır. Halbuki onlar mövcud vəziyyətdə nə İŞİD-in güclənməsinin tərəfdarıdırlar, nə də ki, tamamilə aradan getməsinin. O, həddə gücləndirməyə çalışacaqlar ki, ABŞ üçün problem yaratmasın. Və o həddə zəiflətmiyəcəklər ki, Suriya və İraq hökuməti İŞİD-i tamamilə əzsin. Bir sözlə yaxın gələcəkdə ABŞ İŞİD terrorçularından həm İraq, həm Suriya, həm də ki, Türkiyə hökumətinə qarşı istifadə edəcək.” (interaztv.com)
Xəbərdən istifadə edərkən istinad etmək vacibdir.
