"Elmar”marketin müdir müavini: "Narazısınızsa, onda bizim marketə gəlməyin”

Marketlərin müştəriləri ekoloji cəhətdən təmiz və keyfiyyətli ərzaqlarla təmin etmələri, onların məmnun olmaları üçün yetərli deyil. Eyni zamanda qiymətlərdə və çəkidə dürüstlük də əsas şərt sayılır.
Son vaxtlar şəhərimizin kassa sistemli super marketlərində qiymətlərlə bağlı şikayətlərin tez-tez şahidi oluruq. Marketlərdə malların üzərində bir qiymət, kassanın haqq–hesab qəbzində isə başqa bir qiymət göstərilir. Bu cür hallarla "Elmar” market şəbəkələrində dəfələrlə qarşılaşmaq mümkündür. Bu barədə kifayət qədər şikayətlər eşitmişik. Yaxın günlərdə sözügedən şəbəkənin Heydər Əliyev prospekti 34 ünvanında yerləşən marketində bunun bir daha şahid olduq. Marketdən aldığımız "Roshen” pletka şokoladının üzərində 90 qəpik yazıldığı halda, hesab qəbzinidə 95 qəpik göstərilirdi.
Məsələ ilə bağlı "Elmar”marketin müdir müavini Zulfiyyə Əliyevaya müraciət etdik. Bəzi malların üzərindəki qiymətlərin kassadakı qiymətlərlə eyni olmamasının səbəbini öyrənməyə çalışdıq. Zülfiyyə xanım açıqlama verdi ki, "Roshen”məhsullarının qiymətini yalnız firmanın əməkdaşları dəyişə bilər. Çünki qiymətlər firmaya məxsus olan xüsusi kağızlarda yazılır. Ola bilsin ki, firmanın əməkdaşları bu dəfə qiymətləri dəyişməyi yaddan çıxarıblar. Marketdə belə hallarla hər dəfə rastlaşdığımızı deyəndə, Z.Əliyeva bildirdi ki, hər gün yeni mallar gəlir: "Qiymətlər də hər gün dəyişir. Biz malları rəflərə düzüb yeni qiymətləri yazmağa imkan tapa bilmirik. Çox vaxt mallar düzülən kimi müştərilər gəlib götürürlər. Onların əlindən alıb deməyəcəyik ki, yerinə qoyun, qiyməti yazaq, sonra gəlin?!”
Zülfiyyə xanım belə hesab edir ki, yeni sistemli bütün marketlərdə bu problem mövcuddur. Gündəlik qiymətlərə nəzarət etmək mümkün deyil. Biz narazı olan alıcılara da deyirik ki, narazısınızsa, onda bizim marketə gəlməyin. Market sahibinin problemi həll etmək üçün yollar seçmək əvəzinə, müştərilərin şikayətinə bu şəkildə münasibət göstərməsində, alıcılar da günahkardır. Alıcılar öz hüquqlarını tələb etməkdə maraqlı olsalar, market sahibləri "qiymətləri dəyişməyə vaxt tapa bilmədik” kimi bəhanələr deməyə cəsarət edə bilməzlər. Ən azından marketdə çalışan 20 nəfər işçidən birini qiymətlərə nəzarətçi təyin etmək çətin olmaz. Elə isə sadə bir işi problemə çevirməkdə məqsəd nədir?!

Aytən Əli
Xeberle.com