Gəncə şəhər 1 saylı nəqliyyat departamentində avtobuslarla iş şöbəsinin rəisi Rasim Cəfərovun vəzifəsindən çıxma səbəbi bəlli olub. Bu barədə Moderator.az-a R.Cəfərovun özü məlumat verib. R.Cəfərovun sözlərinə görə, departamentin rəisi Xanoğlan Qasımov ondan qanunsuz olaraq pul yığmağı tələb etsə də, o, bu tələblə razılaşmayıb və nəticədə işdən uzaqlaşdırılıb:

"Hər şey X.Qasımovun məndən avtobsulardan pul yığmağı tələb etməsi ilə başladı.

Mən bildirdim ki, ölkə başçısı özünün bütün çıxışlarında məmurları rüşvət və korrupsiyadan uzaq durmağa, vətəndaşları incitməməyə, hər cür qanunsuzluğa son qoymağa çağırır. Belə olan təqdirdə hansısa məmurun öz vəzifə səlahiyyətlərindən sui-istifadə edərək kimdənsə rüşvət alması, qanunsuz ödəniş tələb etməsi yolverilməzdir və bu, mövcud qanunvericiliyin tələblərini pozmaqla yanaşı, həm də ölkə başçısına, onun ölkədaxili siyasətinə xəyanət deməkdir.

Mənim avtobuslardan pul yığımayacağımı görən department rəhbərliyi mənə bildirdi ki, o zaman öz ərizənlə işdən çıx. Mən məsələni ictimaiyyələşdirəcəyimi bildirsəm də, mənim bu sözlərimə əhəmiyyət verən olmadı. Mən ölkə başçısının tələb və göstərişlərini rəhbər tutduğum, rüşvət almadığım üçün işdən uzaqlaşdırıldım.

Bu gün Gəncədə, şəhərin mərkəzində şəhər kameralarının görüş dairəsində insanlardan rüşvət alınır. Həmin kameraların görüntüsünün təftişi sadalanan faktların aşkar edilməsi üçün kifayətdir. Ümid edirəm ki, əlaqədar qurumlar bu məsələni lazımi qaydada araşdıracaq və qanunvericiliyin tələblərini pozan, ölkə başçısının çağırışlarını qulaqardına vuran, öz qanunsuz əməlləri ilə insanlarda hakimiyyətə, dövlətin ədalətinə inamsızlıq yaradan şəxslərin məsuliyyətə cəlbe dilməsi təmin olunacaq”.