Bu gündən etibarən saytımızda "UNUTMAĞA HAQQIMIZ YOX!” rublikasında Qəhrəman Vətən oğullarına həsr olunmuş "SEÇİLMİŞLƏR” kitabının müəllifi, Azərbaycan Jurnalistlər, Azərbaycan Yazıçılar və Azərbaycan Aşıqlar Birliklərinin üzvü, jurnalist-publisist Aygün Hacıyevanın Şəhidlərimizlə bağlı silsilə yazıları veriləcək.

 

Azərbaycanın ərazi bütövlüyü uğrunda canlarından keçən Vətən oğullarını – Şəhidlərimizi daha yaxından tanımaq üçün onların ömür səhifələrini vərəqləməklə şərəfli döyüş yollarına nəzər salmaq hər birimizin borcudur. Qəhrəmanlarımızın həyat hekayələri hər birimiz üçün "BÖYÜK MƏKTƏB”dir!

Allah bütün Şəhidlərimizə rəhmət eləsin, ruhları şad olsun!

---------------------------------------------------------------

Ulu Dədə Qorquddan üzü bəri Azərbaycan torpaqlarına göz dikən mənfur düşmənin cavabını vermək üçün xalqımızın mərd oğul və qızları hər zaman cəsarətlə mübarizə meydanına atılmışlar. HAQQ savaşında Vətən sevdalı igidlərimiz ölkəmizin azadlığı və bütövlüyü uğrunda əllərindən gələni və daha artığını etməkdən çəkinməmişlər; ham ön, həm arxa cəbhədə.

27.09.2020-ci il tarixdə başlanan və 44 günlük mübarizədən sonra Müzəffər Azərbaycan Ordusunun Qələbəsi ilə nəticələnən Vətən müharibəsində Azərbaycanın Silahlı Qüvvələrinin əsgər və zabitləri ilə yanaşı, bütün böl­gə­lərdən olan könüllülərimiz də iştirak etmişlər. TARİXİ ZƏFƏRƏ imza atan 3000-ə yaxın Şəhidin arasında Sumqayıtda do­ğulub boya-ba­şa çatmış, böyük arzularla şəhərə pənah gətirmiş, taleyini bu şəhərlə bağlamış... SUM­QA­YIT­LI­LAR da var.

Vətən fədailəri hər an ölümlə üz-üzə dayanacaqlarını dərk edərək, dö­yüş meydanında odun-alovun içərisinə özlərini atmaqdan şərəf duymuş, ölümün gözünə dik baxmışlar. Onlar Torpağımızı, namusumuzu, qeyrətimizi, ləyaqətimizi... qorumaq üçün, Vətən uğrunda can­la­rın­dan keçərək, tarix yazan Qəhrəmanlara çevrilmişlər.

Məgər Vətən uğrunda ŞƏHİD olmaq qədər başqa bir şərəf­li yol var­mı? Xeyr! Məhz bu şərəfli yolun yolçuları oldular İgidlərimiz! Canlarıyla, qanlarıyla, ruhlarıyla Və­tənə bağ­lı­lıq­la­rını sübut etdilər, ən uca zirvəyə ucalaraq, ŞƏHİD adına layiq oldular! ŞƏHİD adından da uca bir ad varmı? Əlbəttə ki, xeyr! Əzəmətli QƏLƏBƏNİ ta­ri­xin yaddaşına həkk edərək, milyonların qəlblərində özlərinə taxt qurdular Qəhrəman ŞƏHİDlərimiz!

Tarix boyu çətinliklərdən keçmiş, ağır sınaqlarla üzləşmiş Azərbaycan comərdlərin sa­yə­sində növ­bəti mübarizəsindən də üzüağ, alnıaçıq, qələbəylə çıxdı və üçrənğli Ay-Ulduzlu bayrağımız qədim, ta­rixi tor­paq­la­rımızda dalğalandı!

İgidlikləri ilə Azərbaycan tarixinə qəhrəmanlıq səhifəsi yazan, qanları ilə torpağa azadlıq toxumu səpən oğul­lar Allah dərgahında yeni doğan Günəşdilər! Onlar əsrlər keçsə belə, unudulmayacaq SEÇİLMİŞlƏRdilər! Sön­məz Vətən sevgisi ilə, atdıqları mətin addımların sayəsində "AZƏRBAYCAN” adlı məmləkətin qüdrətini, əzə­mə­ti­ni bütün dün­ya­ya sübut etməklə qəlbləri fəth etdilər və ürəklərdə məskən saldılar!

Bu gün Şəhidlər Xiyabanı müqəddəs zi­yarətgaha, and yerimizə çevrilib. Azadlıq və müstəqilliyimiz, tor­paqlarımızın bütövlüyü uğrunda canlarından keçmiş Şəhid­lərimizi yad etməklə, onların qurban getdiyi yüksək ideallara sədaqətimizi bir daha göstərmiş oluruq. Ölümləri ilə ölümsüzlük qazanmış Şəhidlərimizin əziz xatirəsi hərzaman hörmət və ehtiramla yad ediləcək. İllər ötsə də, zaman dəyiş­sə də, Tarix dəyişməz qalacaq!

Bu gün Şəhid ailələrinin yaralarını heç bir maddiyyat sağalda bilməz. Onların qidası, ehtiyac duyduqları əzizləri haq­qında yazılacaq, deyiləcək bir kəlmə gözəl ifadədir. Qayğı və diqqət, gözəl ünsiyyət, xoş xatirələrdir on­ları ovun­du­ran. Bizlər üçün tərəddüdsüz candan keçən oğullarımızın hər an xatırlanması, yada salınması həsrəti ilə yaşayırlar Şəhid ailələri. Bəli, onların mənəvi qi­dası Şəhidlərimizlə bağlı yazılacaq kitablar, çəkiləcək filmlər, dillərdə dastana çevriləcək mahnılar... olacaq...

Şəhidlərimiz təkcə bir ananın, bir atanın övladı deyil, onlar hər birimizin doğması, əzizidirlər. Hər bir Azərbaycan ailəsində onların adları qürurla çəkilir. Bu gün qəhrəmanlarımızın şərəfli ömür yolu gənc nəsil üçün bir örnəkdir. Şəhidlər Azərbaycanın parlaq gələcəyinin təminatçısı olan körpə, fidan balaların, yeniyetmə və gənclərin, bütün xalqın, millətin QORUYUCU MƏLƏKLƏRidirlər! Daima aydın səmalardan Vətən torpağına boylanaraq keşiyimizdə dururlar Şəhidlərimiz!

Şəhidlər ölməzdilər! Onlar, sadəcə, gözlə görünən dünyanın qonaqları idilərsə, hazırda hər birimizin arzuladığı, əl­çatmaz, sehirli, möcüzəli – "CƏNNƏT” adlanan dünyanın sakinləridirlər.

"BÜTÖV və BÖYÜK AZƏRBAYCAN” naminə canlarını fəda edən Şəhidlərimizin ruhları qarşısında baş əyir və de­yirik: "Biz sizinlə fəxr edirik, Vətən oğulları!”.

Aygün Hacıyeva

------

UNUTMAĞA HAQQIMIZ YOX!

Şəhidlik Zirvəsinə ucalan BƏXTİYAR...

O, Muradovlar ailəsinin yeganə övladı idi. Valideynləri bütün ümidlərini ona bağlamışdılar. Ədəb-ərkanı, təlim-tərbiyəsi ilə seçilən və hər kəsin hörmətini, sevgisini qazanan yeniyetmənin tükənməz arzuları vardı. Bir gün bu arzuların gerçəkləşəcəyinə çox inanırdı...

24.08.2023-cu il tarixdə gənc qəhrəmanımızın 20 yaşı tamam oldu. Gözlərinin yaşı qurumayan valideynlərin bircə təskinliyi odur ki, evin tək övladı Vətən yolunda ŞƏHİD olub...

Qısa arayış: BƏXTİYAR GÜLOĞLAN oğlu MURADOV 24.08.2003-cü ildə Sumqayıt şəhərində dünyaya göz açıb. 2010-2011-ci illərdə Sumqayıt şəhər 5 saylı, 2011-2019-cu illərdə 29 saylı tam orta məktəblərdə təhsil alıb. Doqquzillik təhsildən sonra, bərbər sənətinə olan marağından, usta yanında bu sənətin sirrlərinə yiyələnib və bu sahədə çalışıb.

01.10.2021-ci ildə Sumqayıt Şəhər Hərbi Komissarlığından "Çağırış” vərəqəsi alan B.Muradov 06.10.2021-ci il tarixdə Gəncə şəhərinə yola düşən çağırışçıların arasında olub. Andiçmə mərasmindən sonra, 01.01.2022-ci il tarixdə Kəlbəcər rayonunun Alagöllər ərazisində yerləşən "N”saylı hərbi hissədə xidmətinə davam edib.

AİLƏ:Ata - Muradov Güloğlan Mahmud oğlu əslən Qubadlı rayonunun Cibikli kəndindən, ana - Muradova Yeganə Abbas qızı isə Ermənistanın Gorus rayonundandır. G.Muradov uzun müddət "Polimer materialları” institutunda"elektrik” vəzifəsində çalışıb. Yeganə xanım isə bir müddət fabrikdə dərzi işləyib, daha sonra evdar xanım kimi, fərdi şəkildə dərzilik edib, müxtəlif ləziz şirniyyatlar bişirərək satışa verib.

Bəxtiyarın dünyaya gəlişi ilə Muradovların həyatı məna kəsb etməyə başlayıb. Sevinc payı olan körpə hər iki gəncin həyatını daha da nurlandırıb. Gənc valideynlər halal zəhmətləri ilə övladlarına qayğısız uşaqlıq illərini yaşatmağa çalışıblar...

Ana: "Bəxtiyar uşaq vaxtı tez-tez xəstələnərdi, qızdırması düşmək bilməzdi. Çox zəif uşaq olduğuna görə, məktəbə yeddi yaşında qoyduq. Məktəbə gedəndən sonra sağlamlıqla bağlı problemləri tədricən aradan qalxdı”.

B.Muradov sakit təbiətli, təlim-tərbiyəli, səliqə-sahmanı sevən, böyük-kiçik yeri bilən, hansı iş tapşırılsa "baş üstə” deyərək sözsüz yerinə yetirən bir uşaq olub. Dərs oxumağa çox da həvəsi olmasa da, mehribanlığına, ədəb-ərkanına, gözəl xasiyyətinə, nizam-intizamına görə, sinif yoldaşları və müəllimlər tərəfindən hər zaman sevilib. Tarixi əks etdirən döyüş filmlərinə baxmağı, kompüterdə döyüş oyunları oynamağı xoşlayıb. Kimsə haqqında bir söz danışmağı sevməyib, söz-söhbətdən, qeybətdən, pis vərdişlərdən hər zaman uzaq olub.

M.Bəxtiyar tirdə güllə atmağı çox sevib. Hədəfi düzgün seçib dəqiq nişan alan yeniyetmə çox vaxt uduşun qalibi olub, hədiyyə qazanıb. Elə bu bacarığına görə, hərbi xidmətdə "atıcı” vəzifəsində xidmət edib.

Doqquzillik təhsildən sonra Bəxtiyar atasının dəstəyi ilə usta yanında arzusunda olduğu bərbər sənətinin sirrlərinə yiyələnir və fərdi şəkildə "bərbər” kimi çalışmağa başlayır. Sənətinə olan sevgisi, zövqü və işinə məsuliyyətlə yanaşması ilə, tezliklə müştərilərin rəğbətini qazanır. Halal zəhmətlə qazanılan pul onun üçün dünyanın hər hansı vəzifəsindən, var-dövlətindən üstün olur. Gənc oğlan elə ilk maaşı ilə sevimli anasına hədiyyə alır. Həmin gün onun sevincinin həddi-hüdudu olmur...

M.Bəxtiyar torpağına, el-ovasına, dilinə bağlı,dininə sevgi ilə yanaşan vətənpərvər bir oğul idi. O, Allahın yolunu tutaraq namaz qılmağı planlaşdırmışdı. İstəyirdi tezliklə namaza başlasın. Lakin anası ona məsləhət görür ki, "əsgərliyə get, gələndən sonra rahat başlarsan namaza. Orada lazımi şərait, vaxtında namazını qılmağa vaxt olmaya da bilər”. Bəxtiyar anasının məsləhətinə qulaq asır və hərbi xidmətdən sonra mütləq istəyini həyata keçirəcəyinə qərar verir.

Gənc əsgər xidməti dövründə bir dəfə möhkəm xəstələnir (pnevmaniya olur) və 15 gün Kəlbəcərdə müalicə alır. Anasına "əgər bir də xəstələnsəm, məni tərxis edəcəklər, mən isə tərxis olunmaq istəmirəm, 7 aydır ki, buradayam” deyən əsgər, heç cürə xidmətini yarımçıq qoymaq istəmir. Vətənpərvər ruhda böyüyən oğul, Vətən qarşısında olan borcunu sonacan şərəflə yerinə yetirmək arzusunda olur.

B.Muradov xidməti zamanı iki dəfə məzuniyyətə ailəsinin yanıya gəlir. 30.03-13.04.2020-ci il tarixlərində doğmalarının yanında olan gənc əsgər xidmət etdiyi yerdən, şəraitindən razılıq edir, yoldaşlarından ağızdolusu danışır.

Avqustun 24-də ad günü olsa da, M.Bəxtiyar növbəti məzuniyyətini anasının ad günündə götürür və 30.06.-11.07.2022-ci il tarixlərində ailəsinin yanında olur. Topladığı pulla anasına ətir alır və ətir qutusunun üstünə bir bənd şeir həkk etdirir...

B.Muradov tez-tez dostlarıyla Şəhidlər Xiyabanına gedərdi. Sonuncu dəfə məzuniyyətə gələndə iki dostu ilə müqəddəs məkanı ziyarət edərkən onlara deyir: "Baxın, bir gün mən də burada olacam!”. Dostlarının "bəsdir, bu nə sözdür deyirsən?!” sözlərinə,"biz necə ki, bu igidləri yad edirik, siz də gəlib məni yad edəcəksiz” sözləyir...

Həm evin tək övladı, həm də səhhətində nasazlıq olduğuna görə, onu geri - arxa cəbhəyə yaxud ön cəbhədə nisbətən sakit bir əraziyə göndərmək istəsələr də, o, razılıq vermir. Nə olur-olsun, xidmətini sonacan, digər əsgərlər kimi başa vurmaq istəyir.

B.Muradov hər gün də olmasa, uzaqbaşı bir gündənbir əzizləri ilə əlaqə saxlayırdı...

Azğın düşmənə qarşı 44 günlük Vətən müharibəsi Qələbə ilə nəticələnsə də, mənfur qonşularımız özməkrli niyyətindən əl çəkmir, təxribatlara əl atır. Belə genişmiqyaslı təxribatlardan biri 2022-ci il sentyabr ayının 12-də gecə saatlarında baş verir.

12.09.2022-ci il tarixdə, hər zamankı kimi, gənc əsgər 9 nəfər silahdaşı ilə birlikdə postda olur. Həmin gecə erməni təxribatçıların cavabını vermək üçün güclü atışma olur. Gecədən səhər saat 9-a işləmişəcən ağır döyüşlər gedir. Bu vaxt komandir bildirir ki, "çox yorulmusuz, düşün sığınacağa, bir qədər dincəlin”. Əsgərlər sığınacağa düşən zaman atılan minomyotun qəlpəsi cəsur döyüşçünün boğaz nahiyəsində şah damarına dəyir. Bu mübarizədə Vətənin 9 igid oğlundan bir nəfər sağ qalır. Azərbaycan Ordusunun Vətən sevdalı 8 əsgəri həmin vaxt həlak olaraq, Allah dərgahında ən uca məqama – Şəhidlik Zirvəsinə ucalır.

Vətən müharibəsindən sonra, Muradovlar ailəsinin yaraları hələ sağalmamış bu hadisənin olması hər kəsi üzür. Bu müharibədə şəhid olan igid Vətən oğlu Fərhad Fərhadlı Yeganə xanımın ən yaxın qohumu idi. Şəhidimizin əmisi oğlu da bu savaşda şərəfli döyüş yolu keçmiş, yaralanmışdı...

Bu gün evin tək övladı olan Bəxtiyardan anasına qalan yadigar-xatirə tirlərdə yaxşı atışına görə qazandığı hədiyyə, anasına doğum günündə aldığı ətir və ətir qutusuna yazdırdığı ürək dağlayan bir bənd şeirdir...

Cənnətin ən gözəl güllərin dərib,

Ayağı altında əkin Anamın.

Əridib gözümün qaralarını,

Ağaran saçına çəkin Anamın... 

Azərbaycan Ordusunun mərd, qorxmaz, mətin əsgəri Bəxtiyar Muradov 14.09.2022-ci il tarixdə Sumqayıt Şəhidlər Xiyabanında dəfn edilir.

Azərbaycan ərazisinin bütövlüyü uğrunda gedən mübarizədə göstərdiyi igidliyə və şücaətə görə, Azərbaycan Silahlı Qüvvələrinin cəsur döyüşçüsü, igid əsgər, atıcı Muradov Baxtiyar Güloğlan oğlu ölümündən sonra, Azərbaycan Respublikasının prezidenti İlham Əliyevin 05.11.2022-ci il tarixli Sərəncamına əsasən, 3-cü dərəcəli"Vətənə xidmətə görə” ordeni və "Vətən uğrunda” medalı ilə təltif olunur.

Aylar, illər keçsə də, dövran dəyişsə də, bu fani, görünən dünyadan kimlər köç etsə də, Vətən naminə canlarından, qanlarından tərəddüd belə etmədən keçən igid oğullar – Şəhidlərimiz heç bir zaman unudulmayacaqlar! Çünki onlar beyinlərə həkk olunmuş, qəlblərdə səslənən AZADLIQ, ZƏFƏR nəğmələri, CƏNNƏT MƏLƏKLƏRİDİRLƏR!

Ruhun şad olsun, Cənnətməkan Şəhidimiz!!!

Aygün Hacıyeva

 

 

 

 

 

 

 

 

 

 

 

 

Xəbərdən istifadə edərkən istinad etmək vacibdir.