07.10.2023-cü il tarixdə Sumqayıt Şəhidlər Xiyabanında dəfn olunan Şəhidlərimizin həyat hekayələri... 

 

Əsilləri Azərbaycanın müxtəlif bölgələrindən olsa da, taleləri Gənclik şəhəri Sumqayıtla bağlı olub. Həyat hekayələri bir-birindən fərqlənsə də, Vətən sevdalı oğulların bir amalı olub: BÜTÖV AZƏRBAYCAN naminə əsarət altında olan torpaqları yağı düşməndən azad etmək, üçrəngli bayrağımızı rahat nəfəs alan torpaqlarda dalğalandırmaq!

(Yazı Şəhidlərimizin Sumqayıt Şəhidlər Xiyabanında dəfn olunma ardıcıllığı ilə verilib).

---------------------------------------

Əslən Azərbaycanın dilbər güşələrindən birindən - Gədəbəy rayonunun Gərgər kəndindən olan PƏRVİN HÜSEYN oğlu BABAYEV 26 sentyabr 2001-ci ildə Rusiya Federasıyasının Saratov vilayətundə anadan olub. Beş nəfərdən: ata, ana və üç qardaşdan ibarət olan Babayevlər ailəsi hər zaman halal zəhmətləri ilə pul qazanıb, ailə qayğıları ilə yaşayaraq sakit həyat tərzi sürüb. Ata üzün müddət təmir-tikinti işlərində usta kimi çalışıb, Gülnarə xanım isə evdar xanım olub. 

Dolanışıq nə qədər çətin olsa da, Babayevlər ailəsində hər zaman qarşılıqlı hörmət və anlaşma əsas meyarlardan olub. Ailənin hər bir üzvünün bir-birinə sidq ürəkdən bağlılığı, qardaşların uşaqlıqdan mehriban, bir-birinə arxa-dayaq olmaları valideynləri hər zaman sevindirib. Onlar övladlarına baxaraq, hər zaman qürur hissi keçiriblər.

Rusiyada yaşayan Babayevlər ailəsi 2007-ci ildə Azərbayacana, doğma Vətənə geri döndükdən sonra talelərini Sumqayıt şəhəri ilə bağlayıblar. 

Pərvin Babayev 2008-2017-ci illərdə Sumqayıt şəhərində yerləşən Cəbrayıl rayon 6 saylı tam orta məktəbdə təhsil alıb.

Təbiətcə mülayim, xoş xasiyyətli olan Pərvin təhsil aldığı müddətdə özünü ağıllı, tərbiyəli, nizam-intizama riarət edən, dərslərinə diqqətlə yanaşan, müəllimlərin tapşırıqlarını vaxtında, məsuliyyətlə yerinə yetirən şagird kimi göstərib. Gözəl keyfiyyətlərinə, hər kəsə qarşı isti münasibətinə, qayğıkeş və diqqətcil olmasına görə, məktəbdə hər kəsin rəğbətini qazanıb. Pozitiv enerjili, həyata açıq gözlə baxan Pərvin hər zaman sevilən olub.

Pərvin yaşca kiçik olsa da, digər qardaşlardan böyük görünürdü. Yaşına görə boylu-buxunlu idi. Görünüşcə cüssəli olan yeniyetmə oğlan, bədən və qüvvət baxımından da, güclü olub. Məktəbdə yoldaşları ilə güləşəndə belə, onu yıxan olmayıb. 

Pərvin Babayev tanınmış idmançı Samid Əhmədovun rəhbərliyilə güləşlə məşğul olub. O, şəhər və respublika yarışlarında iştirak edib, müxtəlif Fəxri Fərman və Diplomlara layiq görülüb, medal qazanıb.

Sadə, səmimi, istiqanlı olduğundan, gənc oğlan hər kəsdə xoş təəssürat yaradıb. Zarafatcıl, gülərüz, deyib-gülən olduğundan, onunla kim ünsiyyət qurubsa, simasında təbəssüm yaranıb. Səliqə-sahmanlı, təmizliyi qoruyan, geyim-geciminə diqqət yetirən idi. Elə bu gözəl xüsusiyyətinə görə yaşıdlarından seçilibdi.

2017-ci ilin oktyabr ayında Sumqayıt Şəhər Hərbi Komissarlığından "Çağırış” vərəqəsi alan P.Babayev müddətli həqiqi hərbi xidmətə yollanır. İlk 3 ay Ağcəbədi rayonundakı "N” saylı hərbi hissədə xidmət göstərir, Andiçmədən sonra isə Füzuli rayonunun Şükürbəyli kəndində yerləşən hərbi hissədə xidmətinə davam edir. 

Həyat qəribəliklər, təsadüflərlə doludur, elə iki qardaşın taleyi kimi. Evin böyük oğlu Elnur ali təhsil aldıqdan sonra, 2020-ci ilin iyul ayında həqiqi hərbi xidmətə Ağcabədi rayonundakı "N” saylı hərbi hissəyə gedir. 3 aylıq təlimdən sonra, sentyabr ayında Füzuli rayonuna, qardaşı xidmət edən hərbi hissəyə göndərilir. Qardaşların sevinci yerə-göyə sığmır. Onlar azğın düşmənə layiqli cavab vermək üçün səbirsizlənirlər. Bir-birilərinə hətta söz də verirlər: "Ya birlikdə məhv olmalı, ya da bir yerdə evə dönməliyik”.

2020-ci il sentyabrın  26-sında Pərvinin 19 yaşı tamam olur. Həmin gecə Ali Baş Komandanın əmri ilə mənfur düşmənə qarşı əks-hücum əməliyyatı başlanır. II Qarabağ müharibəsi xəbəri bütün gənclər kimi, qardaşların da ürəyincə olur. Onlar məhz bu məqamda ön cəbhədə olduqları üçün sevinirlər. 

Pərvin sevincini gizlətməyərək, sosial şəbəkədə paylaşım edir "Bu gün mənim ad günümdür. Müharibə başladı. Allah hamını qorusun!”.

27 Sentyabr 2020-ci ildə II Qarabağ müharibəsi başlanan ilk gündən qardaşlar birlikdə Füzuli rayonunun kənd və qəsəbələrinin düşmən tapdağından azad edilməsi  uğrunda gedən döyüşlərdə - HAQQ savaşında rəşadətlə vuruşurlar. Onların da iştirak etdiyi uğurlu əməliyyatlar nəticəsində Füzuli rayonunun 2 kəndi – Alıxanlı və Kürdmahmudlu kəndləri düşməndən azad edilir. 

Pərvin kəşfiyyatçı, tuşlayıcı və manqa komandiri olaraq, hər an üzərinə düşən məsuliyyəti dərk edir, əsgərlərini qorumağa çalışırdı.

Sentyabrın 30-u Elnur Babayev başqa bir hərbi hissəyə göndərilir. Qardaşlar bir-birindən ayrı düşürlər. Və hər ikisi ayrı-ayrılıqda Füzuli uğrunda müxtəlif istiqamətlərdə gedən döyüşlərdə iştirak edirlər.

Oktyabrın 2-3-ü gənc əsgər komandirinin telefonu ilə evə zəng edir: "Yaxşıyam, narahat olmayın, özünüzdən muğayat olun”. Bu, gənc əsgərin son zəngi olur... 

05.10.2020-ci il tarixdə Azərbaycan Ordusunun igid əsgəri Pərvin Babayev Füzuli rayonunun Əbdürrəhmanlı kəndinin azad olunması uğrunda gedən döyüşlərdə düşmənə qarşı mərdliklə mübarizə aparır. Döyüş zamanı düşmən minamyotundan atılan mərmi nəticəsində  ömrünə son qoyulan gənc əsgər hər kəsin arzuladığı şərəfli ölümün sahibinə çevrilərək ən uca məqama - Şəhidlik Zirvəsinə yüksəlir. 

Bu ərəfədə qardaşından xəbərsiz olan Elnur da qızğın  döyüşlərdə iştirak edir. Elnurun komandiri Pərvinin həlak olduğunu bilsə də, bu barədə heç nə demir və əsgərə evlərinə gedib dəymək üçün ikigünlük məzuniyyət verir: "Get evə,  bir qədər güc topla, yenidən qayıt”. Elnur bir qədər təəccüblənsə də, digər tərəfdən çox sevinir...

Maşın həyətə çatanda Elnur təksidən düşür və ətrafa göz gəzdirir. Dalğalanan bir neçə Azərbaycan bayrağını, yan-yana düzülmüş samovarları, bir yerə toplaşan xeyli sayda insanları görəndə təəccüb edir. Cəld hərəkətlə pilləkənləri çıxaraq mənzillərinin qapısı ağzında durub nəfəsini dərir və qapını döyür... İçəri girən kimi, aşağıda gördüklərinə aydınlıq gətirmək istəyir və nə baş verdiyini xəbər alır. Elnura deyəndə ki, "Pərvin artıq getdi aramızdan”, onun həmin an keçirdiyi hissləri təsəvvür etmək çətin deyil.

Göz yaşlarına hakim ola bilməyən Elnur bircə kəlmə deyə bilir: "Bilsəydim qardaşım şəhid olub, heç gəlməzdim, qisasını alardım...”. Və həmin an başa düşür ki, nə üçün komandiri ona icazə verib... 

19 yaşını ön cəbhədə döyüş bölgəsində qeyd edən qəhrəmanımız – Azərbaycan Ordusunun mərd, qorxmaz əsgəri Pərvin Babayev 7 oktyabr 2020-ci ildə  Sumqayıt Şəhidlər Xiyabanında dəfn olunur. 

Anasını gözüyaşlı, atasını, qardaşları Elnur və Röyalı xiffət içində, arxa-dayaqsız qoyan Pərvin  Babayev "Vətən sağ olsun” deyə, müqəddəs üçrənğli bayraq azad Qarabağ torpaqlarında dalğalansın deyə şərəfli yolun yolçusu oldu. Vətənini, Torpağını hər kəsdən, hər şeydən üstün tutdu və bunun mükafatı kimi, ŞƏHİD olaraq Allah dərgahında Cənnətlik oldu... 

Bu gün Pərvin kimi oğullaın sayəsində Vətən torpaqları azad, Azərbaycan xalqı bəxtəvərdir! İllər, əsrlər ötsə də, qəhrəmanlarımız qəlblərdə hər zaman yaşayacaqlar!!!

Azərbaycan Silahlı Qüvvələrinin19 yaşlı gənc əsgəri, cəsur döyüşçü Pərvin Hüseyn oğlu Babayev ölümündən sonra Azərbaycan Respublikasının prezidenti İlham Əliyevin müvafiq Sərəncamlarına əsasən, "Cəsur döyüşçü”, "Vətən uğrunda”, "Füzulinin azad olunmasına görə” və "Xocavəndin azad olunmasına görə” medalları ilə təltif olunub.

Ruhun sad olsun, Cənnətməkan Şəhidimiz!!!

----------------------------------

TEYMUR ƏLİ oğlu ƏZİZOV 22 iyun 1987-ci ildə Sumqayıt şəhərində dünyaya göz açıb. 1994-2005-ci illərdə Sumqayıt şəhər 14 saylı tam orta məktəbdə oxuyub. 8-ci sinfə qədər dərslərini əla qiymətlərlə oxuyan yeniyetmə, sonradan orta təhsilini Sumqayıt şəhər "Təfəkkür” liseyində davam etdirib.

 Teymur Əzizov 2005-2009-cu illərdə Sumqayıt Dövlət Universitetinin "Kimya-biologiya” fakültəsinin rus bölməsində təhsil almışdır.

AİLƏ: Əslən Biləsuvar rayonundan olan Əzizovlar ailəsi gənclik illərindən talelərini Sumqayıt şəhəri ilə bağlayıb. Ailədə 5 nəfər olublar: ata, ana və  üç qardaş. Emil, Ruslan və evin sonbeşiyi olan Teymur, qardaş olmaqla yanaşı, bir-birilərinə dost, sirdaş, arxa-dayaq idilər. 

Qardaşlar hər zaman öz əqidə və məsləkləri, davranışlar ilə, həmçinin gördükləri xeyirxah əməllərlə valideynlərinin başını uca etməyə çalışıblar. Ata-ananın verdiyi öyüd-nəsihət onlar üçün qanun olub. Bəli, məhz belə gözəl, zəhmətkeş bir ailədə boya-başa çatıb qəhrəmanımız və özü kimi Vətən sevdalı qardaşları! 

----------

Bütün Vətən oğulları kimi, Teymur  Əzizov da Vətənə borcünü yerinə yetirmək üçün, 2009-cu ildə Sumqayıt Şəhər Hərbi Komissarlığından həqiqi hərbi xidmətə yola düşür və  Zaqatala Sərhəd Qoşunlarında xidmətə başlayır. 

Birillik xidmətini başa vurduqdan sonra evə dönən Teymur  əvvəlcə "Azərsığorta” Dövlət Sığorta Şirkətində, 2011-2015-ci illərdə "Procter & Gamble Co” MMC-də yüksək gəlirli işlərdə çalışır.

Teymur 2013-cü ildə ən yüksək balla Bakı Dövlət Universitetinin magistraturasına, "Faydalı qazıntılar” fakültəsinə daxil olur. Xarici dillərə marağı olduğundan, o, rus dilindən əlavə, ingilis, italyan dillərini də öyrənir və bu dillərdə təmiz danışa və yaza bilir. 

Teymur işlə bağlı bir neçə nazirliyə sənəd verir, hətta imtahandan da yüksək bal toplayaraq keçir. Lakin son anda qərarını dəyişir. Həyatını, peşəsini başqa səhədə də davam etdirməyə qadir olan, fitri istedadlı Teymur hərbçi olmağı, ön cəbhədə Vətənə xidmət etməyi seçir. 

Teymur Əzizov deyirdi: "Hərbçi sənəti ən şərəfli və təmiz peşədir. Vətənə və Torpağa xidmət edirsən. Bundan gözəl nə ola bilər?! Aldığın maaş da tam halaldı”.

T.Əzizov əvvəlcə Müdafiə Nazirliyinin Təlim Tədris Mərkəzində 3 aylıq "Gizir” kursunu, daha sonra isə TTM-də "Zabit” kursunu bitirir və "Leytenant” rütbəsi alır. O, ASQ-nin gənc zabiti olaraq, 2015-2017-ci illərdə ilk iş yerində - Qobustanda yerləşən "Kimya” korpusunda kimya laboratoriya rəisi kimi xidmətə başlayır. Bir müddətdən sonra, Abşeron rayonunda yerləşən "N”saylı hərbi hissədə taqım komandiri kimi fəaliyyətini davam etdirir. 

T.Əzizov işində həddindən artıq nizam-intizama, qayda-qanuna riayət edən olub. Heç vaxt qanundan və Nizamnamədən kənara çıxmayıb. Onun üçün Qanun ŞAH olub! Haqsızlıqla barışmayan, doğrucul, məqsədyönlü, sözübütöv, dostluqda, yoldaşlıqda etibarlı, sədaqətli, prinsipial idi Vətənin qeyrətli oğlu!

Teymur təbiətcə çox sakit, mülayım xasiyyətli, tərbiyəli, əxlaqlı, həddən çox humanist, qanacaq-mərifətli, müasir baxışlı, saf düşüncəli, geniş təxəyyüllü bir insan idi. Vətəninə, Torpağına, ailəsinə bağlı vətənpərvər  oğul olan Teymur, "uf” demədən belə, canından, qanından keçməyə hazır idi sevdiyi Vətən naminə! Onun kimi yüksək insani keyfiyyətlərə sahib olan qeyrətli, mərd, cəsur oğullara deyirlər: "İnsan kimi İNSANdı”. 

Güclü xarakterə malik olan Teymur heç vaxt heç nədən qorxmazdı. Həqiqətpərəst gənc yalan danışmaz, ədalətli mövqedə durardı.

Teymurun başı çıxmadığı bir iş, bir sahə yox idi. Daima ən yeni texnoloğiyalarla, müasir  avadanlıqlarla maraqlanardı. Biliklərini təkmilləşdirməyə, savadını artırmağa meyilli olub. O qədər səliqəli idi ki; həm geyimində, həm danışığında, nitqində... ona valeh olmamaq mümkün deyildi. Hər kəslə düzgün rəftarı onun yüksək mədəniyyətə malik olmasından xəbər verirdi. 

Müsbət auralı olan Teymurla beş dəqiqə söhbət edən insan ondan pozitiv enerji alar, əhval-ruhiyyəsi daha da yaxşılaşardı. Kitabların onun həyatında rolu və təsiri çox böyük olmuşdu. O, 3 yaşından artıq hərfləri tanıyır, hecalaya-hecaaya kitabı oxuya bilirdi. Sonralar da, kitaba bağlılığından, boş vaxt tapan kimi, mütaliə ilə məşğul olardı. Ç.Abdullayevin detektiv, R.S.Nemovun psixoloğiya ilə bağlı kitablarını tez-tez vərəqləyərdi. 

Teymur təbiət, dəniz vurğunu idi. Dənizi saatlarla seyr etsəydi belə, yorulmazdı. Meşəni, ağacları, bitkiləri sevərdi. Bu səbəbdən, Azərbaycanın flora və faunası ilə dərindən maraqlanardı.

Teymurun çox sağlam həyat tərzi vardı. İçki içməz, siqaret çəkməzdi. Asudə vaxtlarını idman zallarında yaxud təmiz havada keçirərdi. Hər zaman formada qalmağa çalışardı.

Həssas qəlbli, xeyirxah, mərhəmətli Teymurun qəlbində düşmənə qarşı qisas hissi aşıb-daşırdı. 2020-ci ilin yanvar ayında o, hərbidə 25 illik xidmətlə bağlı  rəhbərliklə müqavilə bağlayır və zabit kimi fəaliyyətini davam etdirir.

Teymur Əzizov fəaliyyəti dövründə qüsursuz xidmətə, yüksək səviyyəli xidmətə görə, dəfələrlə komandanlıq tərəfindən Fəxri Fərman və Diplomlarla təltif olunur. İşdə, idmanda 3-cü yaş qrupuna aid olmasına baxmayaraq, 1-ci yaş qrupunun normativlərini yerinə yetirər və qüsuru olmadığına görə, hər zaman maaşı tam yazılardı. 

2020-ci ilin sentyabrında  mənfur düşmənə qarşı başlanan HAQQ savaşında – II Qarabağ müharibəsində Azərbaycan Ordusunun məğrur zabiti Teymur Əzizov ön cəbhədə misli görünməmiş qəhrəmanlıq nümayiş etdirir. O, taqım komandiri kimi, bir çox döyüş yerlərində olur. Murov, Hadrut, Suqovuşan, Cəbrayıl, ən son isə Füzulinin alınmasında gedən şiddətli döyüşlərdə cəngavərcəsinə döyüşür... 

Oktyabrın 5-i 2020-ci il. Son döyüş tarixi. Bu tarix gənc ailə üçün unudulmaz bir gün olur. Kədərlə yada salınan bir gün...

2013-cü il 5 oktyabr tarixində Teymur sevib-seçdiyi Zeynəb xanımla ailə həyatı qurmuşdu. Bu gözəl evlilikdən ailənin sevinc payı olan 5 yaşlı Adəm dünyaya gəlmişdi. Məhz həmin gün əlamətdar günün 7 ili tamam olurdu...

Səhər tezdən idi. Teymur yoldaşına zəng edərək onu təbrik edir. Qarşılıqlı təbriklər, xoş sözlər, gözəl arzu-diləklər...bir-birini əvəz edir. Teymurun təbrik mesajlarının ardı-arası kəsilmir. "İnşallah, gələrəm, gedib bir yerdə qeyd edərik”. "İnşallah. Təki sən sağ-salamat gəl”...

Oktyabrın 5-i Füzulinin kənd və qəsəbələrinin alınması uğrunda qızgın döyüşlər gedir. Savaş meydanında düşmən snayprinə tuş gələrək yaralanan igidimiz, 8 saat yarım döyüş meydanını tərk etmədən, xeyli qan itirməsinə baxmayaraq, geri çəkilmir. Son anda cəsur zabit Füzuli rayon hospitalına çatdrılır. Lakin köksü Vətən eşqi ilə çırpınan igidimiz 8 saat qanaxmadan gözlərini əbədi yumaraq Şəhidlik Zirvəsinə ucalır...

Oktyabrın 7-si qəhrəmanın nəşi doğma Sumqayıt şəhərinə gətirilir. Teymurun simasındakı hər zamankı gülüş ifadəsi sifətindəcə donub qalmışdı... Bu təbəssümdə nələr yox idi... sevinc, fərəh, Qələbəyə inam, tükənməz arzulara qovuşmaq ümidi...

Teymurda elə bir həyat eşqi var idi ki... Hər zaman hər şeyin yaxşı olacağına inanırdı. Sadəcə, bir güllədən ona heç nə olmazdı. Lakin qədəri yazan Allahdır! Uca Allahın Seçilmişlərindən oldu nur simalı Vətən oğlu! 

6 oktyabr 2020-ci ildə dünyasını dəyişmiş Teymur Əzizov 7 oktyabr 2020-ci il tarixində Sumqayıt Şəhidlər Xiyabanında dəfn olunur.

Optimist olan Şəhidimizin bir sözü vardı: "Həyatda nə olursa-olsun, yaxşılığa doğru olur. Bu gün budur. Bunun da öz gözəlliyi var. Bundan da pis ola bilərdi”.  Hər vəziyyətdə reallığı qəbul edib barışan igidimiz, hər zaman şükr edən olmuşdu.

Teymur  Əzizov öz bacarıq və qabiliyyətinə, iti yaddaşına, intellektual səviyyəsinə, zəngin dünyagörüşünə, potensialına... görə, istənilən dövlət qurumunda, istənilən nazirlikdə və istənilən özəl sektorda isləyəcək, daha da yüksələcək hazır bir kadr idi. Lakin o, hərb yolunu seçdi. Sakit, rahat həyatın üstündən tərəddüd etmədən xətt çəkdi, hərbçi oldu və arzuladığı Şəhidliyə qovuşdu. Özü dediyi kimi: "Bu həyatdan köçəndə də, KİŞİ kimi, Şəhid olaraq köçmək lazımdır!”.

Zeynəb xanım (şəhidimizin həyat yoldaşı): "Teymur elə bir insan idi ki...onun haqqında danışmaqla bitməz.... O, bizə bu dünyada Cənnəti yaşatdı. Teymur bizim üçün hər zaman sağdır, sadəcə gözlə görünmür. Amma onun varlığını evimizdə hər gün hiss edirik”.

Bu gün bizlərə əmanət olan balaca  Adəm yaşadığı mənzildə yaradılmış müzüylə, atasının şərəfli yolu ilə tanış olmaq istəyən kiçik yaşlı dostlarını qarşlayır, onlara qəhrəman atası haqqında maraqlı məlumatlar verir və özü də gələcəkdə onun kimi, qorxmaz, igid, qəhrəman olacağını söyləyir... 

Azərbaycan Silahlı Qüvvələrinin cəsur zabiti, 33 yaşlı leytenant Teymur Əli oğlu Əzizov ölümündən sonra, Azərbaycan Respublikasının prezidenti İlham Əliyevin müvafiq Sərancamlarına əsasən, "Vətən uğrunda”, "Cəbrayılın azad olunmasına görə”  və "Füzulinin azad olunmasına görə” medalları ilə təltif olunub. 

Ruhun şad olsun, Cənnətməkan Şəhidimiz!

-----------------------------------------

VERDİYEV İSAX ƏDALƏT oğlu     

(Əsgər)     

Əslən Tərtər rayonundan olan Ədalət bəy Sevinc xanımla ailə həyatı qurduqdan sonra, 1996-cı ildə Rusiyanın Kalininqrad vilayətinə gedirlər. 21 sentyabr 1997-ci ildə bir oğlan uşağı dünyaya gələrək, ailəyə sevinc bəxş edir. Uşağın adını İsax qoyurlar. Bəli, bizim qəhrəmanımız olan İSAX ƏDALƏT oğlu VERDİYEV!

İsax Verdiyev ilk təhsilini 2004-cü ildə Kalininqrad vilayətindəki tam orta məktəbdə alır. 4-cü sinfə qədər burada oxuyan İsax, dərslərindəki müvəffəqiyyətlə yanaşı, tərbiyəsi və bacarığı ilə seçilərək, müəllimlərin sevimli şagirdi olur.  

2007-ci ildə Verdiyevlər ailəsi ata-baba ocağına – Azərbaycanın Tərtər rayonuna qayıdırlar. İsax burada Tərtər raron 1 saylı tam orta məktəbində təhsil almağa başlayır. 2008-ci ilin mart ayında isə ailə Sumqayıt şəhərinə gələrək, taleyini inkişaf etmiş sənaye şəhərilə bağlayır. Qeydiyyatda Tərtər rayonu yazılsa da, yaşayış məkanları günü-gündən gözəlləşən, qaynar həyatı ilə seçilən Sumqayıt olur. 

2008-ci ildə İsax Verdiyev yarımçıq qalmış təhsilini Sumqayıt şəhər 3 saylı tam orta məktəbində davam etdirir.

Gülərüz və mehriban olan İsax məktəb illərində təlim-tərbiyəsi, mülayim, xoş xasiyyəti ilə müəllimlərin və yoldaşlarının rəğbətini qazanır. O, dərslərinə diqqət göstərir, yaxşı oxuyur, məktəbin ictimai həyatında fəal iştirak edirdi. Gözəl xasiyyətinə və özünəməxsus xarakterinə görə, sayılıb-seçilən şagirdlərdən olur. Təhsilini uğurla bitirdiyinə görə, məktəb rəhbərliyi tərəfindən Diplomla  təltif olunur. 

Hələ məktəbdə oxuduğu illərdə idmana hədsiz maraq göstərən yeniyetmə, çox sevdiyi  "Qaydasız döyüş” idman növü ilə məşğul olur. Hətta bir çox yarışlara da qatılıır, qalibiyyət qazanır. 

Futbol azarkeşi olan İsax, boş vaxtlarında dostlarıyla futbol oynamağı da çox sevib. Lakin ali məktəbə qəbul olduqdan sonra, dərslərinə daha çox zaman ayırdığından, vaxtın azlığından idmandan uzaqlaşmalı olur...

İsax Verdiyev 2015-ci ildə Bakı İqtisad Universitetinin "İqtisidiyyat” fakültəsinin "Sənayenin təşkili və idarə edilməsi” ixtisasına pullu əsaslarla pus bölməsinə daxil olur. 3-cü kursun 2-ci yarımilliyində təhsilini yarımçıq saxlayaraq "dondurur”. Təbii ki, pullu təhsil almaq üçün ailənin maddi durumu buna elə də imkan vermirdi. İsax Türkiyə dövlətinə gedib işləməyi, atasına yardım etməyi və  sonradan təhsilini bərpa etməyi planlaşdırır. Və o, fikirləşdiyi kimi də edir...  

İsax  Verdiyev 2017-ci ilin yanvar ayında  həyat yolunda birgə addımlamaq üçün sevib-seçdiri gənc qızla, hansı ki, orta məktəb illərində bir sinifdə oxumuşdular,  Solmazla nişanlanır. 2018-ci ilin dekabrın 4-də İsax ailə həyatı qurur. 2019-cu il avqustun 19-da isə bu evlilikdən balaca Ayaz dünyaya gəlir. Gənc ailənin sevincinin həddi-hüdudu olmur.

Ailəni dolandırmaq, yaranmış yeni qayğıların öhdəsindən gəlmək üçün, İsax Sumqayıtda fəaliyyət göstərən "Azəri” Poliqrafiya Müəssisəsində çalışmağa başlayır. Mehriban kollektiv onun ikinci evinə çevrilir. İşinə məsuliyyətlə yanaşan İsax, kiçik zaman fasiləsində, hər kəsin hörmət və sevgisini qazanır. 

Mehriban, qohumcanlı, valideynlərinə hörmət qoyan, ailsinin qədrini bilən idi bizim gənc İsax. Evini hər zaman qonaq-qaralı görmək istəyərdi. Vaxt tapan kimi, bütün qohum-əqrəbaları itirib-axtarardı. Təkliyi heç sevməzdi. İstəyərdi  ki, evə gəlib-gedən çox, ev səsli-küylü olsun, hamı bir-biri ilə qaynayıb-qarışsın. Belə vaxtlarda İsaxın da könlü açılar, əziz-doğmalara baxıb fərəhlənərdi...

Gözəl xasiyyətinə görə, İsaxın həddən çox dostları olub. Dostluqda, yoldaşlıqda etibarlı, sədaqətli, kəsdiyi duz-çörəyə sadiq idi. Bacardığı qədər insana kömək, dayaq olmağa, yaxşılıq etməyə can atardı.

Allaha bağlı biri idi İsax: səbrli və şükr edən. O, səyahət etməyi, dünyagörüşünü artırmağı çox istəyib. Dünya ölkələrinin tarixi onu çox maraqlandırıb. Elə bu maraqdan, gedəcəyi ölkələrdə asanlıqla ünsiyyətdə olmaq üçün, doğma dilini mükəmməl bilməklə yanaşı, əlavə olaraq rus, ukrayna, türk, ingilis dillərini də bilir və sərbəst şəkildə danışırdı. Ölkələrin tarixi, mədəniyyəti ilə yaxından tanış olmaq üçün, mütəmadi kitab oxuyar, tarixi və səndli filmləri izləyərdi. 

İsaxın ən böyük arzularından biri, Vətən torpaqları azad ediləndən sonra, bütün Qarabağı qarış-qarış gəzmək idi. Özü də tək yox, valideynləri, ailəsi ilə birlikdə...

2020-ci il iyulun 21-də Səfərbərlik və Hərbi Xidmətə Çağırış üzrə Dövlət Xidmətinin Sumqayıt Şəhər İdarəsi tərəfindən İsax Verdiyevə "Çağırış” vərəqəsi gəlir. O, Vətən qarşısında borcunu yerinə yetirmək üçün, ilk əvvəl Sumqayıt şəhər H.Z.Tağıyev qəsəbəsindəki "N” saylı hərbi hissəyə həqiqi hərbi xidmətə göndərilir. 3 aylıq təlimlərdən sonra, Abşeron rayonu Pirəkəşkül qəsəbəsində yerləşən hərbi hissədə xidmətinə davam edir. 

 2020-ci il 27 sentyabr tarixində II Qarabağ müharibəsinin başlanması xəbəri hər kəsi sevindirir, eləcə də İsax Verdiyevi. Qəlbi Vətən eşqi ilə alışıb-yanan İsax da öz sözünü demək, düşmənə layiqli cavab vermək arzusu ilə yaşayırdı. Daxilindəki qisas hissini güclə boğan İsaxın ən böyük arzusu Şəhid olmaq idi... 

İsaxa vətənpərvərlik hissi olsun ki, daha çox atasından keçmişdi. Belə ki, atası Ədalət Verdiyev Rusiya Federasiyasının Kalininqrad şəhərində  Aviasiya Mühəndisliyi Hərbi Məktəbini "Təyyarə və motor” ixtisası üzrə bitirmişdi. 1982-ci ildə təyinatla Volqoqrad şəhərində aviasiyada xidmət göstərmiş, Baş mühəndis vəzifəsində çalışmışdı. Sonradan Azərbaycana qayıdan ata, 1992-ci ildə könüllü olaraq I Qarabağ müharibəsində iştirak etmişdi. Müharibədən sonra Ceyranbatan qəsəbəsində yerləşən "Aviasiya Texniki-Təminat” hissəsində şöbə müdiri, 1994-cü ildən Ceyranbatan hərbi hissəsində komandir müavini, Baş mühəndis işləmişdi. Ədalət bəy 1996-cı ildə 35 yaşında "Mayor” rütbəsi ilə təqaüdə çıxmışdı. Atanın keçdiyi hərb yolu İsax üçün "böyük məktəb” olmuşdu.

Müharibə başlananda İsax xidmət etdiyi hərbi hissədən təlimlərə göndərilir, daha sonra isə Füzuli rayonunun Horadiq qəsəbəsində yerləşən hərbi hissədə xidmət edərək döyüşlərə qatılır. Atası ilə əlaqə saxlayanda Cəbrayıl istiqamətində gedən döyüşlərdə iştirak etdiyini bildirir. Daha sonra o, yenidən Horadiz qəsəbəsinə qayıdır. 

Oktyabrın 3-ü və 4-ü İsax ailəsilə əlaqə saxlayır və  sevinclə deyir: "Ata, belə getsə, tezliklə Şuşada olacağıq. Çox az qalıb...”.

İsaxın atasıgil əslən Qarabağlı idilər. Babası Tərtərdən, nənəsi isə şuşalı qızı idi. O torpaqlar onlar üçün ikiqat əziz idi.

Növbəti gün zəng edəndə İsax atasına bildirir ki, "ata, iki səkil göndərmişəm sizə, bir də təsbeh. Şam ağacının qozasından düzəltmişəm. Nömrəni verəcəm bir nəfərə, əlaqə saxlayıb, gətirib verəcəklər sizə”. İsax elə hərbi xidmətdə olanda yoldaşlarından qolbaq, təsbeh və s. xırda əşyalar düzəltməyi öyrənmişdi...

Oktyabrın 5-i saat 5-ə 15 dəqiqə qalmış Verdiyevlər ailəsində saatın əqrəbləri qəfildən dayanır. Bu o vaxt olur ki, məhz həmin vaxt - axşam saat 16.15 radələrində Füzuli istiqamətində gedən qızgın döyüşlərdə iştirak edən cəsur döyüşçü İsax Verdiyev, rayonun Alıxanlı kəndinin azad olunması zamanı qəhrəmancasına həlak olaraq, Şəhidlik Zirvəsinə yüksəlir. Böyük ruh yüksəkliyi ilə döyüşlərə qatılan, evin yeganə övladı olan İsax son damla qanına qədər qorxmadan, mərdliklə düşmənlə mübarizə apararaq, ölümüylə ölümsüzlüyə qovuşur...

İsaxın  göndərdiyi iki şəkil və atasına əlləri ilə hazırladığı tasbeh ünvanına çatdı. Təəccüblü o idi ki, təsbehin dənələrinin sayı 22 idi, sonuncu başda olan iri dənəcik isə 23-cü. 23 - İsaxın yaşı, həmçinin tarixə yazılacaq son həyat tarixi!

Azərbaycan Odusunun qocaq, igid əsgəri İsax Verdiyevin nəşi 2020-ci il oktyabr ayının 7-si Sumqayıta gətirilərək, Şəhidlər Xiyabanında torpağa tapşırılır. 

Bu gün Verdiyevlər ailəsi yeganə övladını itirsə də, İsaxın Şəhidliyi ilə yüzlərlə yox, on minlərlə övlad qazandı. Aydın səmalardan azad Azərbaycan torpağına boylanan İsaxın ruhu hər zaman ailəsinin, əzizlərinin yanında dolaşacaq, adı könüllərə yazılaraq xoş xatitirələr tək yada düşəcək...

Azərbaycanın ərazi bütövlüyünün qorunması və torpaqlarımızın mənfur düşməndən azad olunması uğrunda qəhrəmancasına həlak olan Azərbaycan Ordusunun 23 yaşlı əsgəri, pulemyotçu İsax Ədalət oğlu Verdiyev ölümündən sonra, Azərbaycan Respublikasının prezidenti İlham Əliyevin müvafiq Sərəncamlarına əsasən, "Vətən uğrunda” və "Füzulinin azad olunmasına görə” medalları ilə təltif olunub.

Ruhun şad olsun, Cənnətməkan Şəhidimiz!

---------------