Rublika:”Unutmağa haqqımız yox!”
09.10.2023-cü il tarixdə Sumqayıt Şəhidlər Xiyabanında dəfn olunan Vətən oğullarının həyat hekayəsi...
İllər keçəcək, Tarixin səhifələri vərəqləndiqcə o səhifələrdən bizlərə Azadlıq şərbətini içizdirənlər boylanacaqlar... Onların şərəfli döyüş yolları gənc nəsil üçün hər zaman örnək olacaq... O qəhrəmanları daha yaxından tanıyaq:
(Yazı Şəhidlərimizin Sumqayıt Şəhidlər Xiyabanında dəfn olunma ardıcıllığı ilə verilib).
-------------------------------------
ƏBDÜRƏHMANLI SABİR FAİQ oğlu
(MAXE, Çavuş)
SABİR FAİQ oğlu ƏBDÜRƏHMANLI 9 mart 1998-ci ildə Bakı şəhərində anadan olub. Sabirin iki yaşı olmamış ailəsi Bakıdan Sumqayıt şəhərinə köçür və Sumqayıt kiçik Sabirin tale şəhərinə çevrilir.
Ə.Sabir 2004-2015-ci illərdə Sumqayıt şəhərində yerləşən B.Mehdiyev adına 2 saylı Qubadlı rayon tam orta məktəbində oxuyub. Təhsilini uğurla başa vuran yeniyetmə, hərbi xidmətə gedincəyə qədər anası Mehparə xanımın işlədiyi müəssisədə çalışıb.
S.Əbdürəhmanlı 2016-cı il aprelin 2-də Sumqayıt Şəhər Hərbi Komissarlığı tərəfindən həqiqi hərbi xidmətə yola düşür.
-------
AİLƏ: Sabirin 10 yaşı olanda ata ilə ananın yolları ayrıldığından, o, anasının himayəsində böyüyür. Bir-birinə sığınmış iki insan ikiotaqlı mənzildə dərd, sirr yoldaşı olurlar, sevinc-kədərlərini bir yerdə bölüşürlər.. Sabir isti nəfəsi, xoş nəvazişləri ilə qayğısını çəkən, min bir əziyyətlə halal pul qazanıb, onun arzu-istəklərini həyata keçirməyə can atan anasına hər zaman dayaq olmağa çalışır, təskinlik verməklə onu ovundurmaq istəyir. Azyaşlı oğlan anası ilə bağlı, böyük ürəyi ilə böyük xəyallar qurur...
Sabir uşaq vaxtından səliqə-sahmanlı, nizam-intizamlı olub. Ana hər şeyi ona, xırda detallarınacan səbrlə, təmkinlə başa salaraq, izah edə-edə öyrədib. O da deyilənləri yadda saxlayıb, anasının tösiyələrinə riayət edib. Təbiətcə təmizkar olan balaca az yaşına baxmayaraq, pis-yaxşı hər şeyi özü etməyə çalışıb. O, çox maraqlı, ağıllı, sözəbaxan, heç kimi incitməyən, mehribanlığı, şirin, ağıllı danışığı ilə hər kəsin rəğbətini qazanıb.
Mehparə xanım təbiətcə kişi qeyrətli, qorxmaz, mərd, haqsızlıqla barışmayan, sözünü çəkinmədən birbaşa deyən, prinsipial, əqidə və məsləyi yolunda irəli getməyə can atan bir xanımdır. Bəzən belə qadınlara ""Kişi” kimi qadındır” deyirlər. Bəli, o da belədir. Sabir də anasının bütün keyfiyyətlərini mənimsəmişdi. Heç nədən, heç kimdən qorxmayan, mübariz biri idi Qəhrəmanımız!
Sabirin çox gözəl potensialı, boy-buxunu, əsl idmançı bədəni olub. O üzdən idmanla bağlı hər dəfə seçilməyə şansı olub. Həm də ona idmana maraq anasından da keçib. Mehparə xanım respublikada tanınmış voleybolçu olub. Vaxtilə "Neftçi” idman klubunun üzvü olan ana, bir çox yarışlarda müvəffəqiyyətlə çıxış edərək uğurlar qazanıb.
Sabir 6-7-ci sinifdə oxuyandan "Karate” idman növü ilə məşğul olur. O, yüksək potensiala, həmçinin güclü iradəyə və xarakterə malik olduğundan, məşqlərə təzəcə başlamasına baxmayaraq, artıq yarışlara çıxır. Bir çox respublika yarışlarında müvəffəqiyyətlər qazanan yeniyetmə, az zamanda ”Sarı kəmər” sahibi olur. 2012-2015-ci illərdə aldığı Fəxri Fərmanlar, Diplomlar, medallar Sabirdən qalan yadigar, xoş xatirələrin nişanəsidir...
Sabir çox yaxşı futbolçu idi, yüngül arletika ilə də məşğul olurdu. "Şahinlər” hərbi-idman oyunlarında fəallardan olub və hər zaman şəhər birinciliyində komandaya mükafatlar qazandırıb.
Sabir təhqiri heç vaxt qəbul etməyib. Əgər kimsə kiminsə anası, bacısı haqqında nəlayiq söz desəydi, onda dözə bilməyib, həmin adamın yerindəcə cavabını verərdi. Artıq söz-söhbətləri, qeybəti sevməzdi. "Kişi kişi söhbəti edər!” deyərdi. Pis vərdişlərdən uzaq olan Sabir, hər zaman sakit, rahat, sağlam həyat tərzinə üstünlük verib.
Mehparə xanım hər dəfə oğluna öyüd-nəsihət verərdi: "Allah-Təala döğulandan insanın bir əlinə tərəzi verir, digər əlində isə ələk olur. Tərəzinin bir gözünə yaxşı, bir gözünə pis əməlləri qoyursan”. Sabir də həmişə deyərdi ki, "ana, mən heç vaxt ələyimi buraxmaram. Tərəzimi buraxmışam, bilirəm. Artıq neyləmək olar?”. Ana isə inam və qətiyyətlə oğlunu başa salardı: "Həmişə demişəm, qorxma! Təksən. Tək olmaqdan da qorxma! Qardaş qardaşa da pislik edəndə edir. Qan bağı önəmli deyil. Bəzən qohumun da içində qan deyil, su olur. Çünki arxadan vura bilərlər. Qorxma! Zamanla, vaxtla, ürəklə, sənin elə qardaşların olacaq ki... Əsas odur, qorxub ağciyər olmayasan, onda sənin hər şeyin olacaq!”. Doğrudan da, zamanla Sabirin etibarlı, ləyaqətli, sədaqərti dostları olur.
Mehparə xanımla Sabir ana-baladan əlavə, möhkəm dost idilər. Sabir anasına "Mehparə sultan” deyə müraciət edərdi. Oğlu üçün narahat olan ana, tez-tez ona zəng edər, harada olduğunu soruşardı. Bir gün Sabir evdən çıxanda anasına deyir: "Sultanım, nə olar, yarım saatdan bir zəng eləmə də... yoldaşlarımdan ayıbdır... uşaq deyiləm ki...”. Ana isə cavabında, "yaxşı, bir saatdan bir zəng edəcəm” deyir. Sabir gülümsəyərək, "ona görə də, çox sağ ol” deyib gedir.
Ana-bala arasında şirin zarafat, incə yumor olardı. Hər iki varlıq bir-birinə dəyər verər, xoş sözlərlə navaziş göstərər, könüllərinə məlhəm olardılar...
Sabir səbrli olmasa da, hər zaman özünü təmkinli aparıb. Rus dilində sərbəst, mükəmməl bilib. O, həddən çox mehriban, qayğıkeş, hər kəsə ürəyi yanan, xeyirxah olub. Heç vaxt heç kimin xətrinə dəyməyib. Hər kəsə də ürəyi yanıb, yazığı gəlib. Kimsəylə işi olmayıb, bircə kimsə də ona sataşmasın... Kiminləsə dalaşmağı sevməyib, halbuki o, çox güclü olub. Sadəcə ağlı və əməli ilə qarşısındakına cavab verməklə o insanı utandırııb. Kiminsə əzilməsini, haqqının tapdanmasını qəbul etməyən yeniyetmə hər zaman qayda-qanunun, haqq-ədalətin tərəfdarı olub.
2016-cı il mart ayının sonlarında Hərbi Komissarlıqdan "Çağırış” vərəqəsi alan Ə.Sabir 2016-cı ilin aprelində AR Daxili İşlər Nazirliyinin Daxili Qoşunlarının Bakı şəhər Nərimanov rayonundakı "N” saylı hərbi hissəsində həqiqi hərbi xidmətə başlayır. Andiçmə mərasimindən sonra, onu DQ-nin Qəbələ rayonundakı hərbi hissəsinə göndərirlər. Xidmət etdiyi müddətdə o, "Çavuş” rütbəsi almaq üçün, Hacıqabul rayonundakı "N” saylı hərbi hissədə 3 aylıq kurs keçir və yenidən Qəbələyə qayıdır. İdmandakı (karate) nailiyyətlərinə görə, onu "qırmızıpapaqlılara” götürürlər.
2018-ci ilin oktyabr ayının 14-ü Sabir həqiqi hərbi xidməti başa vurub, 3 günlüyə evə gəlir. O, anasına oktyabrın 17-si Daxili Qoşunların Gəncədəki bölməsində olacağını bildirir. Həmçinin, hərbi xidmətdə olarkən, artıq hərbidə qalmağa qərar verdiyini və təyinatını açıqlayır. Oğlunun ani qərarını eşidən ana bir anlıq duruxur. Axı, ananın oğlu ilə bağlı tamam başqa arzuları, planları olur. O, gözləyirdi ki, Sabir xidmətdən qayıdar, yenidən ananın iş yerində bir müddət bir yerdə işləyəndən sonra sənədlərini İdman Akademiyasına verər və gələcəkdə sistemdə çalışar. Lakin Sabir öz yolunu özü seçərək qərarını vermişdi.
Ə.Sabir 2018-ci il oktyabrın 17-dən Gəncə şəhərində Daxili Qoşunların "N” saylı hərbi hissəsində hərbi fəaliyyətə başlayır. 2020-ci ilin avqust ayında Bakı şəhərinin Qaradağ rayonunda yerləşən Şubanı qəsəbəsində təlimlərdə olur.
Daxili Qoşunların gənc çavuşu Sabir Əbdürəhmanlı təlimlərdən sonra, 27 sentyabr 2020-ci ildə könüllülərlə bərabər II Qarabağ müharibəsinə qatılır. Cəbrayıl, Füzuli istiqamətində gedən bir çox döyüşlərdə şücaət göstərən igidimiz neçə-neçə yaralını qanlı meydandan çıxararaq, onlara həyat bəxş edir. Düşmənin saysız-hesabsız canlı qüvvəsini, texnikasını məhv edən gənc döyüşçü, şəhid olmuş silahdaşlarının intiqam hissi ilə yenidən döyüş meydanına atılır...
Ə.Sabir Kəlbəcər istiqamətində gedən döyüşlərdə minaya düşür və ağır yaralanır. Demək olar ki, eşitmə, görmə qabiliyyətini qismən itirir. 3 gün Göygöl hospitalında qaldıqdan sonra, Sabir inad edərək cəbhə bölgəsinə, döyüşçü yoldaşlarının yanına getməyə çalışır. Həkimlərin rəyinə görə, səhhəti qənaətbəxş olmadığından, o, müalicəsini davam etdirməli idi. Komandirləri nə qədər desələr də, Sabir heç kimi eşitmək istəmir. Dili tutulduğundan, yavaş-yavaş kəkələyə-kəkələyə təzə-təzə danışmağa başlayırdı. Butün bu halına baxmayaraq, Sabir tərsliyi, inadkarlığı və hökmü sayəsində istəyinə nail olur, hospitalı tərk edir. O, xəstə halda döyüş bölgəsinə, yoldaşlarının yanına savaş meydanına gedir...
Oktyabrın 8-i Sabir Füzuli-Cəbrayıl istiqamətində gedən qanlı döyüşlərdə iştirak edir. Düşmənin bir neçə postunu ələ keçirirlər.... Ağır döyüşlərdə Vətənin mərd, qorxmaz, cəngavər oğlu yenə yaralanır... Oktyabrın 9-na keçən gecə isə gənc çavuş qəhrəmancasına həlak olaraq, Allah dərgahında ən uca məqama - Şəhidlik Zirvəsinə yüksəlir.
Azərbaycan Ordusunun qeyrətli, cəsur döyüşçüsü sabir Əbdürəhmanlı oktyabrın 9-u 2020-ci ildə Sumqayıt Şəhidlər Xiyabanında dəfn olunur.
Bu gün həyatının mənası, yaşam səbəbi, ümid, pənah yeri olan doğma varlığını itirən Mehparə xanım üçün çox çətindir... Lakin bir təskinlik yeri var: hər kəsin alnına bir ölüm tarixi yazılır, Sabir kimi oğullar Uca Allah tərəfindən seçilir, yaşından asılı olmayaraq, gözəl qəlbinə və əməllərinə ğörə mükafatlandırılaraq ən ali məqama ucalırlar. Allah yalnız seçilmiş bəndələrinin üzünə hər birimizin arzuladığı Cənnət qapılarını açır...
Bu gün Sabir Əbdürəhmanlı təkcə bir ananın deyil, milyonların oğlu, qardaşıdır... Adını Zəfər tarixinə Qızıl hərflərlə yazan Vətən oğluyla bütün Azərbaycan qürur duyur!!!
Azərbaycan Respublikası Daxili İşlər Nazirliyinin Daxili Qoşunlarının çavuşu, Vətən müharibəsi şəhidi, 22 yaşlı kəşfiyyatçı Sabir Əbdürəhmanlı ölümündən sonra, Ölkə Prezidentinin müvafiq Sərəncamlarına əsasən, "Vətən uğrunda”, "Füzulinin azad olunmasına görə”, "Cəbrayılın azad olunmasına görə”, "Kəlbəcərin azad olunmasına görə” medalları ilə təltif olunub.
Ruhun şad olsun, Cənnətməkan Şəhidimiz!
-----------------------------------
QORÇUYEV ANAR NADİR oğlu
(MAHHXHQ, Leytenant)
ANAR NADİR oğlu QORÇUYEV 1987-ci il yanvar ayının 4-də Sumqayıt şəhərində anadan olub. 1994-2005-ci illərdə Sumqayıt şəhər 9 saylı tam orta məktəbdə oxuyub. O, hələ kiçik yaşlarından könüllü olaraq "Güləş” idman növü ilə məşğul olub.
Anar Qorçuyev məktəbi bitirdikdən sonra, sənədlərini ali məktəbə verib və 450 balla Azərbaycan Universitetinin "İnzibati idarəetmə” fakültəsinin "İqtisadiyyatın hüqiqi tənzimlənməsi” ixtisasına qəbul olub, 2009-cu ildə isə ali məktəbi müvəffəqiyyətlə bitirib.
2009-cu ilin oktyabr ayında Sumqayıt Şəhər Hərbi Komissarlığından "Çağırış” vərəqəsi alan A.Qorçuyev həqiqi hərbi xidmətə Şəki şəhərində yerləşən "N” saylı hərbi hissəyə göndərilib, Andiçmədən sonra Zaqataladakı "N” saylı hərbi hissədə "Çevik hərəkət bölüyü”ndə xidmətinə davam edib.
Qorçuyev Anar 2010-cu ildə həqiqi hərbi xidmətdən qayıtdıqdan sonra, özəl sektorda işə düzəlib, 2017-ci ilə qədər Abşeron rayon Ceyranbatan qəsəbəsində yerləşən şəxsi "Aqlay” müəssisəsində mühasib, daha sonra isə müəssisənin müdiri vəzifəsində çalışıb.
------
...Anar işlədiyi müddətdə çox götür-qoy edir, gələcək həyatı ilə bağlı müxtəlif planlar qurur. Ancaq qəlbində uşaqlıqdan kök salmış, hərbi xidmətdə olarkən cücərmiş bir arzu-istək ona rahatlıq vermir. Nəhayət, qərarənı valideynlərinə açıqlayır, hərbçi olmaq istəyini bildirir. Valideynlər Anarın şərəfli bir yolun yolçusu olacağına sevinərək, onu dəstəkləyirlər. Gənc oğlan ata-anasının xeyir-duasını aldıqdan sonra arzusuna doğru inamla addım atmağa başlayır.
A.Qorçuyev 2017-ci ilin iyul ayında Hərbi Polisdə çalışmaq qərarına gəlir. O, Müdafiə Nazirliyinə ərizə ilə müraciət edir və müraciəti müsbət qarşılanır. İlk iş yeri olan Beyləqan Rayon Hərbi Polis Qornizonunda 7 ay çalışdıqdan sonra, 2018-ci ilin fevral ayında işi Sumqayıt şəhər, H.Z.Tağıyev qəsəbəsində yerləşən Hərbi Polis Qornizonuna dəyişdirilir və burada fəaliyyətini davam etdirərək, "Axtarış” şöbəsində Hərbi Polis bölümünün "Nizamlayıcılar” taqımının komandiri vəzifəsində çalışır.
Anar Qorçuyev 2020-ci il mart ayının 4-də "Leytenant” rütbəsi almaq üçün Müdafiə Nazirliyinin "Təlim və Tədris Mərkəzi”ndə 3 aylıq kurslarda dinləyici kimi iştirak edir. O, 5 iyun 2020-ci il tarixində "Motoatıcı taqım komandiri” ixtisası kursunu "Leytenant” rütbəsi ilə bitirir.
Gənc leytenant Azərbaycan Respublikası Müdafiə nazirinin müvafiq əmri ilə, Abşeron rayonu Pirəkəşkül qəsəbəsində yerləşən "N” saylı hərbi hissəyə taqım komandiri təyin edilir. Həmin gündən Anar Qorçuyev Milli Ordunun zabiti kimi fəaliyyətinə davam edir.
AİLƏ: Əslən Qubadlı rayonunun Çardaxlı kəndindən olan Qorçuyevlər ailəsi dörd nəfərdən ibarət olub: ata, ana, və iki qardaşdan. Nadir müəllim Qubadlı rayonunun Çardaxlı kəndində, Asya xanım isə isə Qayalı kəndində anadan olublar. Ailə qurduqdan sonra talelərini sənaye şəhəri olan Sumqayıtla bağlayıblar. İlk övladın - Anarın dünyaya gəlişi valideynlərə hədsiz sevinc bəxş edib. Daha sonra ikinci övlad olan Asəf dünyaya gəlib. Vətənpərvər ruhda tərbiyə olunan qardaşlar uşaqlıqdan çox mehriban olublar. Onlar təkcə qardaş yox, dost, sirdaş olmaqla bərabər, hər zaman bir yerdə olar, bir-birinin arxasında dağ kimi durardılar.
------------
Anarın çox gözəl keyfiyyətləri olub. İstiqanlı, sadə və səmimi, diqqətcil, qayğıkeş, mərd, səxavətli olan Anar onu tanıyanların hər zaman sevgisini qazanmışdı. O, məktəb illərində dərsə davamiyyəti, hazırlığı, fəallığı ilə seçilən şagirdlərdən olub. Belə ki, dərs əlaçısı olmaqla yanaşı, sinif nümayəndəsi kimi məsuliyyətli iş də ona həvalə olunmuşdu. Anar məktəbin ictimai həyatında da aktiv iştirak edərdi. İti yaddaşa, güclü hafizəyə malik olan yeniyetmə bütün elmlərə maraq göstərər, tarixi, detektiv kitabları oxuyar və belə filmlərə baxardı. Kiçiklə kiçik, böyüklə böyük kimi rəftar edən, özündən böyüklərə qayğı ilə yanaşaraq hörmət qoyan Anarın saf qəlbi var idi. O, hər zaman kimsəsizə, kasıba, köməksizə yardım etməyə şalışardı.
Anar məktəb illərindən Tarix fənninə xüsusi maraq göstərib. Azərbaycan xalqının başına gətirilən müsibətlər elə o vaxtdan onu narahat etməyə, düşündütməyə başlayıb. Xocalı soyqırımı günahkarlarının cəzasız qalması yeniyetməni hər zaman hiddətləndirib. Dədə-baba torpaqlarının – Qubadlının işğalı onu o qədər sarsıtmışdı ki. Ata-anasının çöhrələrindəki qəm-kədərin izi Anarda intiqam hissini daha da alovlandırmışdı...
Anar Qorçuyev 26 sentyabr 2015-ci ildə sevib-seçdiyi Təhminə xanımla ailə həyatı qurur. 2 sentyabr 2017-ci ildə gənc ailəyə bir qız övladının gəlişi hamının sevincinə səbəb olur. Körpənin adını "Ayla” qoyurlar. Körpəsinin üzündəki təbəssümü gördükdə, kiçik barmaqlarının qoxusunu ciyərlərinə çəkdikdə Anarın fərəhinin haddi-hüdudu olmurdu. Anar daqızına elə sıx bağlanır ki, bir an belə ondan aralı qalanda darıxırdı...
Sakit təbiətli, gülərüz, zarafatcıl, qəlbi yumşaq, zəhmətkeş, rəftarında tərbiyəli, əxlaqlı olan Anar təhsil aldığı, işlədiyi hər yerdə rəğbət və hörmət qazanır. Ailəcanlı, dostcanlı, qohumcanlı olmasl ilə hər kəsə nümünə göstəriləcək bir gənc olur bizim Anar!
Anar, keçdiyi ömür yoluna nəzər salaraq, hər şeyi arxada qoyaraq, öz arzusuna çatmağa can atır. Əziz-doğmalarına sıx tellərlə bağlı olan leytenant "Öncə Vətən, sonra ailə” – deyir. Hətta bir neçə aydan sonra dünyaya gələcək övladını belə düşünmədən, düşmənlə üzü-üzə gəlməyə can atır.
Anar Qorçuyevin ən böyük arzusu torpaqlarımızı işğaldan azad etmək, Qubadlıya üçrəngli Azərbaycan bayrağını sancmaq idi. O, hər zaman deyirdi: "Qubadlıya bayraq sancacam, qızım böyüyəndə mənimlə fəxr etsin!”. Dediyi kimi də edir qəhrəmanımız!
Vətən müharibəsi başlamamışdan öncə, Anar Qorçuyev könüllü olaraq ön cəbhəyə getməyə qərar verir və bu barədə komandanlığa müraciət edir. 26 sentyabr 2020-ci ildə gənc zabit Füzuli rayonundakı hərbi hissəyə göndərilir.
27 Sentyabr 2020-ci ildə II Qarabağ savaşı başlananda
Anar Qorçuyev döyüş bölğəsinə yeni gətirilən gənc əsgərlərin təlim, döyüş hazırlığı... ilə məşğul olur. Savadlı, bacarıqlı, öz işini dərindən bilən gənc kadr olduğundan, bu iş ona həvalə olunur. Gənc döyüşçülərin tam hazırlığına leytenant məsuliyyət daşıyırdı.
Nəhayət, elə bir gün gəlib çatır ki, təlim keçmiş gənc əsgərlərin aktiv döyüş istiqamətinə aparılma vəziyyəti yaranır. Leytenant Qorçuyev öz bölüyü ilə döyüşə girməyə qərar verir. Özündən rütbəcə böyük olan zabitlər onu hər nə qədər saxlamağa çalışsalar ki, "sən getmə, gənc əsgərlərin təlimində lazım olan adamsan”, "yeni gəlmiş zabitsən”, "sən bizə burada lazımsan”,.. xeyri olmur. Gənc leytenant heç kimi dinləmir. Fikrində qərarlı olduğundan, deyir: "Mən əsgərlərimdən nigaran qalacam. Neçə vaxtdır onlara Ana, Vətən, Torpaq, Bayraq haqqında danışıram. Onlara necə "sağ ol” deyib yola salım, amma özüm getməyim?!”. Qərarını qəti verən gənc zabit, "özüm getməsəm, onlardan nigaran qalaram!” deyərək, sözündən dönmür. Anarın xahişindən, israr və təkidlərindən sonra, ona döyüşə qatılmağa icazə verilir.
Evdəkilərlə əlaqə saxlayanda da Anar hər dəfə deyərdi ki, "mən 19-20 yaşlı əsgərləri irəli verə bilmərəm, onlar harada, mən də oradayam!”.
Anar Qorçuyev fürsət düşəndə evə zəng edir, ailəsi ilə danışırdı. Sonuncu dəfə oktyabrın 7-də səhər saatlarında əzizləri ilə əlaqə saxlayır. Hər kəsi xəbər aldıqdan sonra deyir: "İnşallah, hər şey yaxşı olacaq. Məndən nigaran qalmayın. Özünüzdən muğayat olun. Qızımı çoxlu-çoxlu öpürəm...”. Heç kimin ağlına da gəlmir ki, bu, igdimizin son sözü olacaq və bir saat sonra onun başına nə gələcək...
Oktyabrın 7-si 2020-ci ildə Anar Qorçuyev təlim keçdiyi gənc əsgərləri ilə birlikdə Füzuli-Cəbrayıl istiqamətində gedən qızğın döyüşlərə qatılır. Düşmən tərəfindən mühasirəyə düşən bölük üzvləri son damla qanlarınadək rəşadətlə vuruşurlar. Döyüş zamanı qarın nahiyyəsindən qəlpə yarası alan igid Vətən oğlu, yaralanmasına baxmayaraq, son nəfəsinəcən düşmənlə savaşır və qəhrəmancasına həlak olaraq Şəhidlik Zirvəsinə ucalır.
Həddən çox həssas, narahat qəlbli insan olduğundan, Anar Qorçuyev hərbidə də şəxsi heyətin qayğısına qalmağa, əsgərlərin cəfasını çəkməyə və onları qorumağa çalışırdı. Hər bir əsgərinə qardaş, ata qayşısı ilə yanaşırdı. Bəlkə elə ona görədir ki, bu gün bütün əsgər və zabitlər belə bir Vətən oğlunun itkisinə son dərəcə təəssüflənirlər...
Azərbaycan Ordusunun cəsur zabiti Anar Qorçuyevin nəşi oktyabr ayının 8-i 2020-ci ildə doğma şəhərinə gətirilir, oktabrın 9-u 2020-ci ildə isə Sumqayıt Şəhidlər Xiyabanında torpağa tapşırılır.
Vətən eşqi ilə döyünən ürəyin sahibi idi Anar Qorçuyev! 44 günlük Vətən müharibəsində onun da öz döyüş yolu, dəsti-xətti oldu. Zəfər tariximizin şanlı səhifəsində onun da imzası yer aldı! Doğma Qubadlı torpağına Azərbaycan bayrağını şəxsən sanca bilməsə də, igidimizin bu arzusunu döyüş yoldaşları həyata keçirdilər. Oktyabrın 25-i 2020-ci ildə Qubadlı işğaldan azad olundu.
2021-ci ilin may ayında Qorçuyevlər ailəsində daha bir körpənin qığıltısı eşidildi. Bu, Şəhidimizin ailəsində dünyaya gələn, üzünü görə bilmədiyi oğul övladının səsi idi. Atasını yaşatmaq üçün "Anar” adı qoyulan balaca körpə, inanırırq ki, atasına layiq də övlad olacaq!
Azərbaycan Silahlı Qüvvələrinin qeyrətli, cəsur, mətin zabiti, 33 yaşlı leytenant Anar Nadir oğlu Qorçuyev ölümündən sonra, Azərbaycan Respublikasının prezidenti İlham Əliyevin müvafiq Sərəncamlarına əsasən, "Vətən uğrunda”, "Cəbrayılın azad olunmasına ğörə” və "Füzulinin azad olunmasına görə” medalları ilə təltif olunub.
Ruhun şad olsun, Cənnətməkan Şəhidimiz!!!
QASIMOV ŞÖHRƏT ŞAKİR oğlu
(Baş leytenanat)
Vətən müharibəsində şəhid olan qəhrəmanlarımızdan biri ilk hərbi həkim - Baş leytenant, Tibb xidmət rəisi ŞÖHRƏT ŞAKİR oğlu QASIMOV 16 avqust 1992-ci ildə Gədəbəy rayonunda dünyaya göz açıb. Sonradan Qasımovlar ailəsi Sumqayıt şəhərinə köçərək, gələcək talelərini Gənclik şəhəri ilə bağlayıb. O zaman balaca Şöhrətin 6 yaşı olub.
Şöhrət Qasımov 1998-2004-cü illərdə Sumqayıt şəhər 18 saylı tam orta məktəbdə oxuyub, 2004-2009-cu illərdə Sumqayıt şəhərində yerləşən Cəbrayıl rayon 5 saylı tam orta məktəbdə təhsil alıb.
Dərslərində fəal, məktəbin ictimai həyatında aktiv olan Şöhrət, Kimya fənni üzrə keçirilən Respublika Olimpiadasında uğura imza ataraq, 3-cü yerin sahibi olub. Dərs əlaçısı olduğuna görə, dəfələrlə Fəxri Fərmana layiq görülüb. Təlim-tərbiyəsi, nizam-intizama riayəti ilə seçilən, mehriban, gülərüz, xoş xasiyyətli Şöhrət müəlllimlərinin sevimlisinə çevrilmış, hər kəsin hörmət və rəğbətini qazanmışdı.
Vətənpərvərlik hissi hələ uşaqlıqda qəlbində kök salmış yeniyetmə, hərbi, döyüş filmlərinə maraqla baxıb. Boş zamanlarında tibbi kitablarla yanaşı, dedektiv romanları mütaliə edib. Çingiz Abdullayevin, Elxan Elatlının kitablarının əksəriyyətini oxumuşdu.
Tarix, Hərbi hazırlıq dərsinə maraq göstərən Şöhrət, məktəbdə oxuduğu illərdə hərbçi olmaq arzusu ilə yaşayır. Bununla yanaşı, insanların sağlamlığı keşiyində durmaq, onların həyatını xilas etmək də onun ən ümdə arzuları arasında olur. Seçim qarşısında qalan gənc, nəhayət hər iki arzusunu gerçəkləşdirə biləcək bir qərara imza atır.
2009-cu il Şöhrətin həyatında ən sevincli il kimi, yadadşına həkk olunur. O, ən yüksək balla Azərbaycan Tibb Universitetinin "Hərbi tibb” fakültəsinə qəbul olur və qrup nümayəndəsi seçilir. Qısa zamanda univesitetin müəllim və tələbələri arasında hörmət qazanaraq, savadı və yüksək insani keyfiyyətləri ilə hər kəsin sevimlisinə çevrilir. Şöhrətin qrup nümayəndəsi olduğu qrup, müəllimlər tərəfindən "Generallar qrupu” adlandırılır.
Dərslərinə ciddi yanaşan, hər zaman hazırlıqlı olan gənc tələbə, imtahanlarda yüksək nəticələr göstərir. Tibbi biliklərini təkmilləşdirmək üçün, həftə sonları əlavə vəsaitlərdən istifadə etmək üçün kitabxanalara gedir, elmi mühazirə və seminarlarda, təcrübələrdə böyük həvəslə iştirak edirdi. Nə qədər savadlı və bacarıqlı olsaydı da, hər zaman elmi biliyini artırmaq üçün öz üzərində çalışırdı. Seçdiyi sahəni mükəmməl bilməyə can atan Şöhrət, gecə-gündüz mütaliə edərək, tibb elminin bütün sirrlərinə yiyələnmək istəyirdi.
Şöhrət Qasımov hər zaman vaxtını, zamanını düzgün dəyərləndirib, hər anının qədrini bilməyə çalşıb. Sağlamlıq və bədəncə formada olmaq baxımından, müntəzəm idmanla məşğul olub. Əsasən də, idmanın "Güləş” növü ilə.
2015-ci ildə universiteti müvəffəqiyyətlə bitirən Şöhrət Qasımov tibb xidməti üzrə "Leytenant” rütbəsini alır. Elə həmin il, Müdafiə Nazirliyindən verilən əmrə əsasən, Yevlax rayonunda yerləşən "N” saylı hərbi hissədə hərbi həkim kimi fəaliyyətə başlayır. 3 ay sonra Tərtər rayonunda – ön xəttdə yerləşən "N” saylı hərbi hissədə xidmətinə davam edir.
Uşaqlıqdan Vətənə, Torpağa, Anaya məhəbbət hissləriylə böyüyən Şöhrət Qasımov tarixin qanlı-qadalı illərini, günahsız insanları, yalan üzərində tarix yazmaq istəyənləri düşündükcə mənfur düşmənə qarşı nifrəti daha da artardı. Vətən torpağını seyr edən hərbi həkim nələr düşünməzdi... O, tez-tez Milli Qəhrəman Mübariz İbrahimovun keçdiyi, şəhid olduğu yerlərə baxar, döyüş yoldaşlarına məhz orada üçrəngli bayrağımızı dalğalandıracağını söyləyərdi.
Şöhrət Qasımov unudulmaz Aprel döyüşlərinin də iştirakçısı olmuşdu. Tez-tez o döyüşləri xatırlayardı...
Aprel döyüşlərindən sonra, Şöhrət Qasımov Həmlə Taborunun yaradılmasında müstəsna rol oynamış, həmin taborun məntəqə rəisi təyin olunmuşdu. Taborun keçirdiyi bütün təlimlərdə yaxından iştirak edir, dağ və səhra təlimlərində, digər çətin relyeflərdə bütün tapşırıqları yerinə yetirir, normativləri xüsusi dərəcələrlə tamamlayırdı.
Gənc zabit xidməti dövründə ətrafında olan hər kəsin rəğbətini qazanmışdı. Həkim və hərbiçi kimi, iki müqəddəs peşənin öhdəsindən də layiqincə gəlirdi.
Hər zaman ön xəttdə xidmətə can atan Qasımov 2017-ci ildə, Dünyanın ən yaxşı xüsusi təyinatlılarından sayılan, Türkiyənin məhşur Su Altı Taaruz (SAT) xüsusi təyinatlıları kursuna qatılmaq istəyir. Lakin səhhətində yaranmış problemə görə, həkim komissiyasından keçə bilmir. Bu hadisə onu daxilən sarsıtsa da, o, "qismət” deyib, yenidən Tərtər rayonunda yerləşən "N” saylı hərbi hissədə xidmətinə davam edir.
2018-ci ildə Şöhrət Qasımova "Baş leytenant” hərbi rütbəsi verilir. Həmçinin o, "Azərbaycan Ordusunun yaradılmasının 100 illiyi” Yubiley medalı ilə təltif olunur. Xidməti dövründəki uğurlu fəaliyyətinə, işinə məsuliyyətlə yanaşmasına, səy və bacarıqlarına görə, qısa zamanda "Tibb xidməti” rəisi vəzifəsinə qədər yüksəlir. Xidməti dövründə nümunəvi zabit və savadlı həkim kimi, bir çox təltiflərin, Fəxri Fərman və Təşəkkürnamələrin sahibi olur.
Şöhrət Qasımov 2019-cu ildə ilk xidmətə başladığı Yevlax rayonundakı "N” saylı hərbi hissədə fəaliyyətini davam etdirir.
Şöhrət Qasımov hər an şəxsi heyətin mənəvi-psixoloji durumuna, hazırlığına xüsusi diqqət yetirirdi. Bütün əsgər və zabitlərlə söhbətlər aparır, onları baş verə biləcək hər bir vəziyyətə hazırlayırdı.
Sentyabrın 27-si 2020-ci ildə Vətən müharibəsinə qoşulma ərəfəsində gənc zabit rəhbərlik etdiyi şəxsi heyət qarşısında çıxış edir. Onun çıxışı hər kəsdə böyük ruh yüksəkliyi yaradır, özünə, qələbəyə inam hissini artırır.
29 sentyabr 2020-ci ildə Tərtər rayonunun Suqovuşan kəndi uğrunda qızğın döyüşlər başlayır. Azərbaycan Ordusunun mübariz, qorxmaz oğulları torpağın hər qarışı üçün canlarından keçməyə hazır idilər. Döyüşə qatılan Baş leytenant və onun dəstəsi cəngavərcəsinə savaş meydanına atılırlar.
Döyüş itkisiz olmur. Şöhrət Qasımov həmin günü neçə-neçə yaralı əsgər və zabitlərə yardım göstərir, döyüş meydanından çıxardır. Həmin günü 3 dəfə xüsusi tapşırığın öhdəsindən gələrək, uğurla başa çatdırır. Sonuncu dəfə yaralı təxliyyə etməyə gedərkən erməni tankı ilə üz-üzə gəlir. O, silahına sarılaraq, son damla qanınacan düşmənlə rəşadətlə döyüşür, son anda da düşmənin iki canlı qüvvəsini məhv edir və Şəhidlik Zirvəsinə ucalaraq, arzuladığı kimi, şərəfli ölümün sahibinə çevrilir...
İlk şəhid həkim, Tibb xidməti rəisi Baş leytenant Şöhrət Qasımov 29.09.2020 tarixində Suqovuşan uğrunda gedən qızğın döyüşlərdə qəhrəmancasına həlak olaraq, arzuladığı məqama yüksəlir...
AİLƏ: Şöhrət Qasımovun çox da böyük olmayan, qəlbləri Vətən eşqi ilə döyünən, mehriban, şəhmətkeş, ləyaqətli, təmiz bir ailəsi olub. Atası Şakir Qasımov, 1993-cü ildə ümummilli lider Heydər Əliyevin xalğa müraciət etdiyi zaman, könüllü olaraq I Qarabağ müharibəsinə yollanıb və qızğın döyüşlərdə qəhrəmancasına düşmənlə mübarizə aparıb. Müharibə veteranıdır. Mehbarə xanım hər zaman övladlarının qayğısına qalaraq, onların təlim-tərbiyəli, mərifətli, savadlı, cəsarətli, qorxmaz böyümələri üçün əlindən gələni əsirgəməyib. Evin kiçik oğlu Ayaz Qasımov hər zaman işləyərək ailəyə dəstək olmağa çalışıb.
Şöhrət Qasımov 21 aprel 2016-cı ildə sevib-seçdiyi Türkan xanımla ailə həyatı qurub. Bu evlilikdəm onların 2 övladları var: Murad və İlayda.
Şöhrətin ən böyük arzusu oğlu Muradı idmançı görmək idi. Televizorda idman yarışları nümayiş olunanda, o, Murada göstərib deyərdi ki, "bax, Murad, istəyirəm ki, sən də belə idmançı olasan, birincilik qazanasan, himnimizi oxuyasan”. Ata oğlunun idmançı olub, bir gün dünya səviyyəli yarışda bayrağımızı dalğalandıracağına inanırdı.
Gənc ata qızını həkim görmək arzusunda idi. Hətta İlayda dünyaya gəlməmişdən qabaq, qızı olacağını biləndə demişdi, "mənim ağ xalatlı həkim qızım”. Sonradan arzusunu dilə gətirmişdi: "Qızım da həkim olsun, mənim yanımda assistentim olaraq işləsin, bir yerdə çalışaq”...
44 günlük Vətən müharibəsində şəhid olan Baş leytenant Şöhrət Qasımov arzuladığı kimi, övladlarımızın sağlam, xoşbəxt gələcəyi üçün əlundən gələni etdi, ölümün gözünə dik baxaraq! Azərbaycana Zəfər çaldıranların sırasına qoşularaq Allah dərgahında Cənnəti qazandı cəsur döyüşçü! Qarabağımızın işğalçılardan təmizlənməsi uğrunda mərdliklə savaşdı və şücaəti ilə adını Qələbə tarixinə Qızıl hərflərlə yazdı Vətən sevdalı oğul!
Azərbaycan Ordusunun cəsur zabiti Şöhrət Qasımov 09.10.2020 tarixində Sumqayıt Şəhidlər Xiyabanında dəfn olunur.
Həm hərbiçi, həm həkim olmaq istədi. Uca Allah onu bu arzusuna çatdırdı, hərbiçi-həkim oldu. Hər iki məsuliyyətli sənətin yükünü şərəflə və ləyaqətlə daşıdı. Hər iki anda sadiq qaldı. Vətən naminə, işıqlı sabahlar naminə, xoş gələcək naminə... gözünü belə qırpmadan, canını, əzizlərini belə düşünmədən şərəfli ölümə doğru inamla addımladı və sonda, mükafat olaraq, ən uca ada layiq oldu: ŞƏHİD!
Bu gün Şəhidimizin iki övladı bizlərə əmanətdir...
Azərbaycanın mərd, qeyrətli oğlu, Vətən müharibəsində şəhid olan ilk hərbi həkim, Tibb xidməti rəisi, Şöhrət Şakir oğlu Qasımov ölümündən sonra, Azərbaycan Respublikasının prezidenti İlham Əliyevin imzaladığı Sərəncama əsasən, 3-cü dərəcəli "Vətənə xidmətə görə” ordeni, həmçinin "Vətən uğrunda” və "Suqovuşanın azad olunmasına görə” medalları ilə təltif olunub.
Ruhun sad olsun, Cənnətməkan Şəhidim!
---------------------------------------
MƏMMƏDOV VÜQAR İLQAR oğlu
(Əsgər)
VÜQAR İLQAR oğlu MƏMMƏDOV 9 yanvar 1994-cü ildə Sumqayıt şəhərində anadan olub, 51 saylı uşaq bağçasında tərbiyə alıb. 2000-ci ildə Sumqayıt şəhər 20 saylı tam orta məkətəbin 1-ci sinfinə gedib, 5-ci sinifdən 11-ci sinfə kimi 22 saylı tam orta məktəbdə oxuyub. 2011-ci ildə o, təhsilini müvəffəqiyyətlə başa vurub.
AİLƏ: Məmmədovlar ailəsi 5 nəfərdən ibarət olub: ata, ana, iki qız və bir oğlan övladından. Vüqar bacıları Könül və Vəfaya çox bağlı olub.
Sadə və zəhmətkeş valideynlər uşaqlarını min bir əziyyətlə böyüdüblər. Ata 30 ildən çoxdur ki, dərzilik edir. Şəhərdə öz sahəsinin peşəkarı kimi tanınır. Ana heç bir yerdə işləməyib, hər zaman övladlarının qayğısına qalıb, təlim-tərbiyələri və ev qayğıları ilə məşğul olub. Bu ailədə hər zaman süfrəyə halal əməklə qazanılan nemət düzülüb. Belə bir əməksevər, zəhmətkeş, ləyaqətli, mehriban bir ailədə dünyaya gəlib, boya-başa çatıb, tərbiyə alıb bizim Vüqar!
2002-2003-cü illərdə Vüqar, haradasa 2-ci ya 3-cü siniflərdə oxuyan zaman, Ceyhun Butayevin məşqçiliyi ilə, şəhərin İdman Kompleksində "Cüdo” idman növü ilə məşğul olub.
Vüqar Məmmədov 6-cı sinifdə oxuyanda "Cüdo” üzrə keçirilən yarışda iştirak edir, özündən agır çəkili bir idmançı ilə yarışır. Yarışda qalib gəlsə də, sonradan mədə nahiyəsinə yaxın hissədə yırtıq əmələ gəlir. Bu fəsad ağrılara səbəb olduğundan, həkimlər ona bir müddət idmanla məşğul olmağa icazə vermirlər. Tam sağalandan sonra isə, boyu da uzansın deyə, o, oxuduğu məktəbdə fəaliyyət göstərən "Basketbol” bölməsinə yazılır.
İdmanla məşğul olduğu müddətdə Vüqar bir çox uğurlara imza atır. Fəxri Fərmanlar, Diplomlar, müxtəlif hədiyyə və mükafatlar qazanır. 11-ci sinifdə oxuyanda, ali məktəbə hazırlıqla bağlı, hazırlıq kurslarına gedir. Dərs yükünün ağırlığından, idmandan uzaqlaşmalı olur.
Vüqar Məmmədov 2011-ci ildə orta məktəbi bitirdikdən sonra, sənədlərini ali məktəbə verir. Tarix fənninə olan marağından, Bakı Dövlət Universitetinin "Tarix” fakültəsini seçsə də, topladığı balla BDU-nun "İlahiyyət” fakültəsinə qəbul olur. Onun sonradan fakültəsini dəyişmək şansı olsa da, bunu etmir. Dərslərinə ciddi yanaşan, müntəzəm hazırlıqlı olan Vüqar tez bir zamanda pedaqoqların diqqətini cəb edir. Xoş xasiyyəti, mehribanlığı, təlim-tərbiyəsi, bilik və bacarığı, gözəl ünsiyyət qurma qabiliyyəti sayəsində hər kəsin hörmət və rəğbətini qazanır. O, təhsildəki müvəffəqiyyətləri ilə seçilərək, valideynlərinə başucalığı gətirir.
Həm universitetdə, həm ailədə hər kəs Vüqarla fəxr edir. Ali təhsil ocağından rəhbərlik tərəfindən dəfələrlə valdeynlərə zənglər olur, belə övlad böyütdüklərinə görə ata-anaya təşəkkür edirlər.
Əsmər xanım (ana): "Bir dəfə biz valideynləri universitetə çağırdılar. Fikirləşdik ki, görən niyə çağırıblar? Vüqar 11 il məktəbdə oxumuşdu, onun tərəfindən elə bir mənfi hal, yersiz hərəkət olmamışdı. Mən çox narahat halda, bir az da çəkinə-çəkinə getdim dekanın yanına. Dedi ki, "sizi uşağınızı tərifləmək üçün çağırmışam. Diğər tələbə və valideynlər də görsünlər ki, bizim belə bir tələbəmiz var”. İnanın ki, sevincimdən bircə qanadım yox idi uçmağa. Valideyn üçün övladın belə mükafatından böyük nə ola bilərdi?!”.
Vüqar tələbəlik illərində də, məktəbdə olduğu kimi, universitetin ictimai həyatında aktiv iştirak edir. Burada da idmanla məğul olur, yarışlara qatılaraq müxtəlif təltiflər qazanır.
Açıq-aşkar fikrini bildirən, haqlıdırsa fikrindən dönməyən, səhv hərəkət edənə doğru yol göstərən, nəyisə düzğün anlamayana hər şeyi başa salmağa çalışan, ağlıllı, dərrakəli biri idi Vüqar. Kim səhv addım atırdısa, açıq fikrini bildirirdi: "Axı, niyə belə edirsən?!”. Yol göstərən, məsləhət verən, haqsızlıqla barışmayan idi. Hətta anası da dəfələrlə demişdi, "a bala, nəyinə lazımdır, başını cəncələ salma”. Deyərdi, "yox, elə deyil... o niyə belə edir... düz eləmir..”. Bu xüsusiyyət əvvəldən qanında, canında olub Vüqarın.
Vüqar Məmmədovun uşaqlıqdan kitab oxumağa marağı olub. Bəlkə də, oxuduğu bu kitablar onda zehin açıqlığı yaratmışdı. Ərəb dilini mükəmməl bilirdi. Müqəddəs kitabımız olan Quranı ərəb əlifbası ilə oxuyar, tərcümə edərdi. Vaxtlı-vaxtında namazını qılardı.
Vüqat təkcə ərəb yox, türk, fars, ingilis dillərini də mükəmməl bilib. Lakin ən əvvəl öz doğma ana dilini sevib, zənginliyinə heyran olub. Yaşının azlığına baxmayaraq, geniş təfəkkürə və zəngin dünyağörüşə malik idi.
Adı kimi, özü də vüqarlı və ləyaqətli, gözütöx, könlü açıq gənc idi Vüqar. Hər bir işdə cəld, aktiv, qoçaq olub. Kiməsə ağız açmağı, sızıldamağı sevməyən, hamıya yazığı gələn, sadəlövh, tez inanan idi. Bütün bu gözəl xüsusiyyətlər onun qəlbinin gözəlliyindən irəli gəlirdi.
2015-ci ildə ali məktəbi bitirdikdən sonra, Vüqara Sumqayıt Şəhər Hərbi Komissarlığından "Çağırış” vərəqəsi gəlir. O, Azərbaycan Silahlı Qüvvələrinin Quru Qoşunları sıralarında həqiqi hərbi xidmətə başlayır. Əvvəlcə Abşeron rayonunun Pirəkəşkül qəsəbəsində, daha sonra Goranboy rayonunda yerləşən "N” saylı hərbi hissələrdə xidmət göstərir.
V.Məmmədov 2016-cı ildə Şanlı Aprel döyüşlərinin iştirakçısı olur. Hərbi xidmətdə "topçu” kimi, "manqa komandiri” vəzifəsini icra edən cəsur döyüşçünün Tərtər rayonunun Talış kəndinin alınmasında xüsusi imzası olur.
Vüqar Məmmədov əsgərlikdə olan zaman kəşfiyyata yazılmaq, gələcəkdə hərbçi olmaq istəyir. Bu, onun ən böyük arzularından birinə çevrilir. Anası ilə danışanda, ana etiraz edir.
Ana: "Kəşfiyyata yazılmaq, hərbidə qalmaq istədiyini bildirəndə etiraz etdim. Təbii ki, fəxr olunası, qürurverici addım idi. Lakin ana ürəyi... Fikirləşdim, tək oğuldur... Ata da ailədə tək oğul olub, bu da təkdir. Kim dayaq dursun bizə...”.
Vüqar valideynlərini nə qədər çox sevsə də, arzusunun üstündən xətt çəkə bilmir. Və könüllü olaraq kəşfiyyata yazılaraq verdiyi qərarı həyata keçirir. Arzusuna çatanda isə özünü dünyanın ən xoşbəxt insanı sanır...
2016-cı ildə hərbi xidməti başa vurduqdan sonra evə dönən Vüqar Məmmədov boş-bekar qalmır. O, 2016-2020-ci illərdə Sumqayıt şəhərində müxtəlif sahələrdə çalışır..
2020-ci ilin iyul ayında baş verən Tovuz hadisələri zamanı şəhid olan general-mayor Polad Həşimovun itkisndən sarsılan Vüqar tərəddüd etmədən, bir dəqiqə belə vaxt itirmədən Sumqayıt Şəhər Hərbi Komissarlığına üz tutur və adını könüllülərin siyahısına yazdırır. Lakin bu barədə evdə heç kimə bir söz demir...
Məmmədovlar ailəsinə "Çağırış” vərəqəsi gələndə, ailə Vüqarın könüllü yazıldığını bilir və hamı təəccüblənir. Vüqar isə əhvalını pozmadan, "mən bu anı səbirsizliklə gözləyirdim”, – deyir.
26 sentyabr 2020-ci ildə Vüqar Məmmədov doğma şəhərindən ön cəbhəyə - Füzuli istiqamətinə yola düşür.
Boyca balaca, haradasa 50 kq çəkisi olan, lakin arıq, zəif olmasına baxmayaraq, hər zaman sayılıb-seçilən, cəsur, qorxmaz igidimiz Vüqar Məmmədov Füzuli uğruna gedən döyüşlərdə də, əməliyyata qatılanlar arasında könüllü olaraq birinci irəli çıxanlardan olur.
Azərbaycan Silahlı Qüvvələrinin əsgəri, kəşfiyyatçı Vüqar Məmmədov sentyabrın 26-dan oktyabrın 8-nə kimi şərəfli bir döyüş yolu keçir. Füzuli-Cəbrayıl istiqamətində gedən savaşda şücaəti ilə seçilir.
...Çox vaxt səhərlər zənğ edərdi evlərinə. Günaşırı əlaqə saxlayardı, danışıq çox az olardı. Təkcə oktyabrın 4-ü xeyli danışıldı. O gün Vüqargili istirahətə gətirmişdilər. Dəqiq burada qalıb-qalmayacaqlarını bilmirdi. Ancaq ailəsi ilə doyunca söhbət etdi...
Oktyabrın 5-i ailənin Vüqarla sonuncu danışığı olur...
2020-ci ilin oktyabrın 8-dən 9-na keçən gecə Füzuli şəhər mərkəzinin, Əhmədbəyli kəndinin düşməndən azad edilməsi uğrunda şiddətli döyüşlər başlayır. Cəsur əsgər də bu döyüşlərdə iştirak edir. Döyüş meydanında düşmənə qarşı cəsarətlə vuruşur, neçə-neçə canlı qüvvəsini məhv edir, yaralı əsgərlərimizin döyüş meydanından çıxarılmasında yardımçı olur. Təəssüf ki, bu zaman düşmən snayperindən açılan atəş nəticəsində igidimiz başından yaralanır və qəhrəmancsına həlak olaraq, Allah dərgahında ən uca məqama - Şəhidlik Zirvəsinə ucalır. Bölüyün ilk şəhidi olur İgidimiz.
Azərbaycan Ordusunun məğrur əsgəri Vüqar Məmmədov 9 oktyabr 2020-ci ildə Sumqayıt Şəhidlər Xiyabanında dəfn olunur.
Azərbaycanın Zəfər tarixinə adını qızıl hərflərlə yazan, 26 illik ömrünü şərəf və ləyaqətlə yaşayan İgidimiz 12 gün düşmənə aman vermədən savaşdı və qəhrəmanlığı ilə könüllərdə taxt qurdu! Tariximizi sevsə də, qanıyla bu tarixi yeniləyib daha parlaq YENİ TARİX yazdı! Kəşfiyyatçı gənc Şəhidin həyat yolu, şücaəti bu gün dillərdə dastan olub...
Azərbaycan torpaqlarının işğaldan azad olunması və bütövlüyü uğrunda canından, qanından keçməyə hər zaman hazır olmuş vətənpərvər igidimiz - qeyrətli Vətən oğlu, 26 yaşlı əsgər Vüqar İlqar oğlu Məmmədov ölümündən sonra, Azərbaycan Respublikasının Prezidentinin müvafiq Sərancamlarına əsasən, "Vətən uğrunda” və "Füzulinin azad olunmasına görə” medalları ilə təltif olunub.
Ruhun şad olsun, Cənnətməkan Şəhidimiz!!!
Aygün Hacıyeva,
AJB, AYB, AAB-nin üzvü
