II Qarabağ savaşı başlanan gün hər bir Azərbaycan övladı sevinc içərisində idi. Doğma Vətəni, bərəkətli Torpağı yağı düşməndən təmizləmək üçün canından belə keçməkdən şərəfli nə ola bilərdi?! Bu anlarda qeyrətli oğulların beyinlərindən yalnız bir fikir keçirdi: əzəmətli, şanlı bayrağımızı tezliklə Qarabağ torpağına sancmaq! "Bu yolda ölümə də getməyə dəyər!”... 

(Yazı Şəhidlərimizin Sumqayıt Şəhidlər Xiyabanında dəfn olunma ardıcıllığı ilə verilib).

-------------------------------------

MƏDƏTOV ZAUR KAMAL oğlu  

(Əsgər)     

ZAUR KAMAL oğlu MƏDƏTOV 16 noyabr 1999-cu ildə Sumqayıt şəhərində dünyaya gəlib. 2006-2015-ci illərdə Abşeron rayonunda yerləşən Qubadlı rayon Xanlıq kənd 3 saylı tam orta məktəbində, 2015-2017-ci illərdə isə Bakı şəhər Nizami rayonu 277 saylı İdman Təmayüllü tam orta məktəbdə təhsil alıb.

AİLƏ: Əslən Qərbi Azərbaycanın Zəngəzur mahalından olan, 1988-ci ildə Qafan rayonundan ayrı-ayrılıqda, bir-birindən xəbərsiz Sumqayıt şəhərinə gəlmiş valideynlər 1997-ci ildə Sumqayıt şəhərində tanış olub, ailə həyatı qurublar. Mədətovlar ailəsi 4 nəfərdən ibarət olub: ata, ana və iki qardaş. Zəhmətkeş valideynlər hər zaman çalışaraq övladlarını vətənpərvər ruhda böyüdüblər. Evin oğulları Zaurla Taleh möhkəm dost, sirdaş olublar. 

Uşaqlıqdan idmana həvəsli olan Zaur 2010-cu ildən idmanın "Cüdo” növü ilə məşğul olmağa başlayıb. Bakı şəhərinin Binəqədi və Nizami rayonlarında yerləşən idman zallarında məşq edib. Zaurun potensialını görən  məşqçisi, Əməkdar idman ustası Ələkbər Əliəfsərov onun parlaq gələcəyinə inanıb. Zaur da, üzərində əziyyəti olmuş ustadının tövsiyə və məsləhətlərini dinləıyərək, başını uca etməyə çalışıb. 

Zaur Mədətov az zamanda Respublika və Beynəlxalq yarışlarda bir sıra uğurlara imza atıb. Dünya çempionatında qalibiyyət əldə edərək, Azərbaycan bayrağını yüksəkdə dalğalandırıb. Zaurla təkcə ailə üzvləri, məşqçisi, idmançı dostları deyil, bütün onu tanıyanlar fəxr edib, qürur duyublar.

Zaur orta məktəbi bitirdikdən sonra İdman Akademiyasına daxil olmaq arzusunda olsa da, istəyinə nail ola bilmir. Buna baxmayaraq, o, həyatını daha mənalı etməyə, zamanını dəyərləndirməyə çalışır. O, cüdodan əlavə, sağlamlığını qorumaq və formada qalmaq üçün, gündəlik trenajor zallarına gedir, müxtəlif yüngül idman növləri ilə məşğul olur. Maşın sürməyi çox sevən gənc oğlan nə vaxtsa şəxsi maşınının olmasını arzulayırdı. Əsgərliyini başa vurub qayıtdıqdan sonra, işləyib bu arzusunu reallaşdırmaq fikrində idi.

Sakit təbiətli, ağır xarakterə malik olan Zaur tərbiyəsi, əxlaqı, təmiz vicdanı ilə hər kəsin hörmət və rəğbətini qazanmışdı. Səliqəli, təmizkar olan gənc, dəblə və zövqlə geyinməyi ilə hər kəsin diqqətini özünə çəkərdi. Hər zaman son dəblə maraqlanar və ayaqlaşmağa çalışardı. 

Səyahət etmək ən böyük arzularından biri olub Zaurun. Dünya səyahətinə çıxmaq, ölkələrin tarixi və mədəniyyəti, xalqların adət-ənənələri ilə yaxından tanış olmaq onun maraq dairəsində idi. İlk öncə isə, Vətən torpaqlarını yağıdan təmizləmək, daha sonra dillər əzbəri olan Qarabağ torpaqlarını qarış-qarış gəzməyi düşünürdü. 

Zaur hələ uşaq yaşlarından Vətənə olan sevgisi ilə seçilib. Hərbi dərsə, döyüş və idmanla bağlı filmlərə xüsusi maraq göstərib. Gözəl xasiyyətinə görə çoxlu dost qazanmış Zaur onlarla son illərin hadisələrini, Qarabağda baş verən münaqişələri, düşmənin təxribatlarını müzakirə edər, fikir mübadiləsi aparardı. Aprel döyüşləri gəncin qəlbində dərin is buraxmışdı. O da, başqa gənclər kimi, yaşı çatanda düşmənin layiqli cavabını vermək arzusu ilə yaşayırdı. Hər zaman "Şəhidlərimizin qanı yerdə qalmamalıdır!” deyirdi.

Bütün gənc oğlanlar kimi, Zaur Mədətovun da səbirsizliklə gözlədiyi gün gəlib çatır. Sumqayıt Şəhər Hərbi Komissarlığından çağırış gələndə, o, "Kişilik məktəbi”ni keçmək üçün, 2018-ci il 5 yanvar tarixində  Azərbaycan Silahlı Qüvvələrinin Gəncə şəhərində yerləşən "N” saylı hərbi hissəsinə, müddətli həqiqi hərbi xidmətə yollanır. Andiçmədən sonra isə Ağstafa rayon "N” saylı hərbi hissədə qulluq edir. 

Zaur Mədətov hərbi xidmətdə də ağlı, zəkası, möhkəm iradəsi, bacarıq və qabiliyyəti ilə komandanlığın, əsgər yoldaşlarının rəğbətini qazanır. Verilən tapşırıqların, idmanda normativlərin vaxtında, cəld və düzgün yerinə yetirilməsində seçilir. Burada da xoş xasiyyətinə görə özünə çoxlu dostlar qazanır.

2019-cu il iyul ayının 7-də, Vətən qarşısındakı borcunu yerinə yetirən gənc, hərbi xidmətdən tərxis olunaraq evə dönür. Doğma şəhərə, ailəsinin yanına qayıdan Zaur boş-bekar qalmayıb özünə iş axtarır.  O, 2019-cu ilin noyabr ayından 2020-ci ilin sentyabr ayının 21-nə kimi Abşeron rayon "Kristal N1” tikinti şirkətində mühafizədə işləyir. Az müddətdə isti münasibətinə, yüksək insani keyfiyyətlərinə görə, kollektiv arasında hörmət qazanır.

21 Sentyabr 2020-ci ildə səhər saat 7-də Zaur Mədətova Sumqayıt Hərbi Komissarığından çağırış gəlir və o, elə həmin an, vaxt itirmədən, sevimli nənəsinin xeyir-duası ilə ön xəttə yola düşür. 

Sentyabrın 21-də təlimlərə qatılan Zaur Mədətov müharibə başlanan gün artıq döyüş meydanında idi... 

Azərbaycan Ordusunun mübariz əsgəri  Zaur Mədətov 2020-ci il sentyabrın 27-də başlamış Vətən müharibəsinin ilk günündən, mənfur düşməndən zəbt olunmuş torpaqlarımızın azad edilməsi və ərazi bütövlüyünun barpa olunması üçün, Cəbrayıl və Füzuli rayonlarının azadlığı uğrunda gedən döyüşlərdə mərdliklə mübarizə aparır. 

Füzuli-Cəbrayıl istiqamətində düşmənə qarşı aparılan əməliyyatlarda igidliyi, qorxmazlığı, mərdliyi ilə seçilən gənc əsgər bir çox kəndlərin azad olunmasında fəal iştirak edir. Hər zaman özünə qadağa verən biri  olduğundan, döyüş meydanında yalnız irəli atılır. Qorxu, hürkü nə olduğunu bilməyən idmançımız bir addım da  geri durmur. Hər an QƏLƏBƏ əzmi ilə mübarizə aparan igidimiz döyüş meydanında yalnız ZƏFƏR düşüncəsi ilə irəliyə doğru gedir...

Oktyabrın 6-sı Zaur evlərinə zəng edir. Hər zamankı kimi, "hər şey yaxşıdır, yaxşı da olacaq!” deyir.

Oktyabrın 7-si gecə ata yuxusunda görür ki, Zaur onu çağırır. Ata diksinərək ayılır. Baxır ki, tər-su içindədir. Heç kimə bir söz demədən, sakit addımlarla evdən çıxır. Küçənin qaranlığında var-gəl edərək, Allaha dua edir: "Allahım, oğlumu, bütün əsgərlərimizi qoru! Qələbə çalıb sağ-salamat evə dönsünlər!”.

Oktyabrın 8-i Füzuli rayonunun Horadiz kəndi uğrunda qızğın döyüşlər başlayır. Azərbaycan Ordusunun yenilməz əsgəri, qələbəsiylə Azərbaycan himnini bir çox Dünya ölkələrində səsləndirən məşhur idmançı, cəsur döyüşçü mərdi-mərdanə, cəngavərcəsinə düşmənlə mübarizəyə qalxır.

Azərbaycanın hər qarış torpağını ürəkdən sevən, göz bəbəyi kimi qorumağa hazır olan Zaur, onun azadlığı yolunda canını fəda etməkdən də çəkinmir, "Ya Azadlıq, ya Ölüm!” deyir. Həmin gün mənfur düşmənlə üz-üzə dayanan və düşmənin layiqli cavabını verən cəsur əsgər döyüş meydanında namərd gülləsindən hayatını itirir və Uca Allahın Seçilmiş bəndələrindən olaraq, ən yca məqama – Şəhidlik Zirvəsinə ucalır...

9 Oktyabr 2020-ci ildə Azərbaycan Ordusunun cəsur, igid döyüşçüsü Zaur Mədətovun nəşi, zirvələrə yüksəltdiyi Azərbaycan bayrağına bürünərək Füzuli rayonundan doğma şəhərinə, son dəfə görüşmək üçün evlərinə gətirilir. Oktyabrın 10-u 2020-ci ildə yaddaşlarda hər zaman simasından nur tökülən, mehriban, gülərüz, səmimi insan, qoçaq, qorxmaz, igid kimi qalan Zaur Kamal oğlu Mədətov Sumqayıt Şəhidlər Xiyabanında dəfn olunur.

Bəli, Allahın ən uca dərgahı olan Cənnətdə olmaq hər kəsə nəsib olmur. Zaur Azərbaycan torpaqlarını işğalçılardan öz canı, qanı bahasına azad edənlərdən biri oldu. Vətən oğlu adını tariximizin parlaq səhifələrinə silinməz mürəkkəblə yazdı.

Azərbaycan bayrağını sevən, ona sidq-ürəkdən bağlanaraq, qalibiyyətiylə yuksəklərə qaldıran Azərbaycan oğlu, ruhun şad olsun, arzuların gerçəkləşdi! Qarabağ torpağının hər qarışında dalğalanan bayraqlarda sənin də adın həkk olunub! Səninlə qürur duyuruq, ZAUR MƏDƏTOV!!!

Azərbaycan Silahlı Qüvvələrinin 20 yaşlı gənc əsgəri, topçu-minamyotçu Zaur Kamal oğlu Mədətov ölümündən sonra,  Azərbaycan Respublikasının prezidenti İlham Əliyevin müvafiq Sərəncamlarına əsasən, "Vətən uğrunda”, "Cəbrayılın azad olunmasına görə” və "Füzulinin azad olunmasına görə” medalları ilə təltif olunub. 

Ruhun şad olsun, Cənnətməkan Şəhidimiz!!!

ƏHMƏDƏLİYEV KƏRİM RÖVŞƏN oğlu   

(Əsgər) 

Qısa arayış: KƏRİM RÖVŞƏN oğlu ƏHMƏDƏLİYEV 12 iyun 1998-ci ildə Sumqayıt şəhərində dünyaya gəlib, 13 saylı uşaq bağçasında tərbiyə alıb. 2005-2016-cı illərdə Sumqayıt şəhər 5 saylı tam orta məktəbdə oxuyub. 2016-2020-ci illərdə Azərbaycan Texnologiya Universitetində təhsil alıb və ali məktəbi "Menecment” ixtisası üzrə bitirib. 

Kərim Əhmədəliyev ali təhsilini başa vurduqdan sonra, 2020-ci ildə, Vətən qarşısında borcunu yerinə yetirmək üçün, Sumqayıt Şəhər Hərbi Komissarlığı tərəfindən həqiqi hərbi xidmətə göndərilir. Əvvəlcə Goranboy rayonunun Aşağı Ballıqaya, Ağcakənddə, Andiçmədən sonra isə Ağdam rayonunda yerləşən "N” saylı hərbi hissələrdə xidmət edir.

----

Beş nəfərdən ibarət olan Əhmədəliyevlər ailəsində sonbeşik olan Kərim ailənin hər bir üzvü tərəfindən ən sevilən uşaq olub. Hər zaman ata-anasının hörmətini saxlayıb, bacı-qardaşına qarşı həddən çox mehriban olub. Bir sözlə ifadə etsək, Kərim ailəsinə qırılmaz tellərlə bağlı idi.

Kərim Əhmədəliyev hələ uşaq bağçasına gedəndə danışığı və hərəkətləri ilə diqqət çəkən fərqli uşaqlardan olub. Bu uşağa sanki Allah tərəfindən vergi verilmişdi. İti yaddaş, güclü hafizə, natiqlik, zəngin təxəyyül... – hamısı Kərimdə cəm olmuşdu. Kərim heç 1-ci sinfə getmirdi, bacısı Günay ona 3-cü sinfin riyaziyyat dərsliyindəki tapşırıqları keçmişdi. Birinci sinifdə oxuyanda balaca oğlan artıq sərbəst şəkildə yazıb-oxumağı, riyazi hesablamaları etməyi bacarırdı. O, bütün fənlərə maraq göstərər və hər birinə mükəmməl yiyələnməyə çalışardı. 

Kə\rim məktəb illərində təlimdə qazandığı müvəffəqiyyətə, məktəbin ictimai həyatında fəallığına görə dəfələrlə məktəbin direktoru tərəfindən Fəxri Fərmanla təltif olunmuşdu.

Aktyorluq qabiliyyəti Kərimdə hələ uşaq vaxtlarından hiss olunduğundan, 3-4-cü siniflərdə oxuyanda, haradasa 2008-2009-cu illərdə Sumqayıt Şəhər Uşaq və Yeniyetmələrin Yaradıcılıq Mərkəzində "Aktyorluq və aparıcılıq” kursuna gedir. 

Dərslərində əlaçı olmaqla yanaşı, Kərim məktəbin ictimai həyatında da fəal və aktiv şagirdlərdən biri idi. O, məktəb tədbirlərində aparıcı və aktyor kimi də özünü sınamışdı. Azərbaycanın Milli Qəhrəmanı Mübariz İbrahimovun obrazını yaradan balaca aktyor, onun qəhrəmanlıq, Şəhidlik Zirvəsinə ucalması səhnələrini, qəhrəmanın hiss və duyğularını elə canlandırmışdı ki, onun bu qabiliyyəti hamını heyran etmişdi.

Ə.Kərim, həmçinin, tələbəlik illərində universitetin ictimai həyatında fəal iştirak edib. O, ali təhsil ocağında da tədbirlərin ssenarisinin yazlmasında, planların reallaşmasında aktyor, aparıcı kimi məsuliyyəti öz üzərinə götürməkdən çəkinməyib. Bir çox yeni ideyaların, layihələrin müəllifi olub. Bütün bunlar Kərimin fitri istedad sahibi olmasından xəbər verirdi.

Tərbiyəsi, ədəb-ərkanı, mərifəti, savad və bacarığı ilə başqalarına nümunə göstəriləcək gənc, bir çox gözəl xüsusiyyətlərinə, insani keyfiyyətlərinə görə, təhsil müddətində tələbə və müəllimlərin sevgisini, hörmət və rəğbətini qazanır. Gözəl tələffüzü, diksiyası, natiqlik qabiliyyəti ilə yaşıdlarından hər zaman seçilir. 

Bütün gənclər kimi, Kərim də idmana maraq göstərib, bir neçə idman növü ilə məşğul olub. Lakin peşəkarlıq baxımından yox, sadəcə öz sağlamlığı ilə bağlı.

Kərim Əhmədəliyev həyata baxışı, intellektual səviyyəsi, zəngin dünyağörüşü ilə yaşıdlarının çoxundan fərqlənib. Qarşısındakı insanın kimliyindən, hansı sənətin sahibi olmasından, hansı vəzifədə çalışmasından asılı olmayaraq, hər kəsə qarşı dürüst olan haqq-ədalət carçısıydı. Yalandan, ikiüzlülükdən, riyadan uzaq, gözütox, könlü açıq idi. Onun belə formalaşmağında kitabların da çox böyük rolu olmuşdu.

Kərim öz Ana dilini hər zaman sevib və sevdirməyi bacarıb. Dilimizin zənginliyilə fəxr edib. Hələ uşaqlıqdan mütaliəni sevib. Çingiz Abdullayevin, Elxan Elatlının, demək olar ki, əksər kitablarını oxumuşdu. Son zamanlarda oxuduğu və sevdiyi əsərlərdən biri Rövşən Abdullaoğlunun "Relslər üzərinə uzanmış adam” və Ramiz Rövşənin "Kim deyir yuxuda ölmək asandır” şeirlər kitabı idi. Çoxlu kitab oxumuş gəncin özünün də şeir yazmaq qabiliyyəti vardı. Təzə-təzə o, yazdıqlarını hər kəsdən gizlədərdi, sonradan bu yazılar üzə çıxdı və hər kəs bu şeirləri dinlədikcə gənc qələm sahibinin istedadına məəttəl qaldı.

Musiqiyə olan marağından, saatlarla gözəl əsərləri dinləməyə qadir olan Kərim, özü də mahnılar oxuyardı, yalnız dostların, ailə üzvlərinin əhatəsində. Ən çox sevdiyi musiqi aləti gitara idi. Çox istəyirdi ki, bu musiqi alətində çala bilsin. Nə vaxtsa bunu da fərdi şəkildə öyrənməyi nəzərində tutmuşdu.

Kərimin iç dünyası o qədər zəngin idi ki, özünün də fərqli, mənalı, düşündürücü fikirləri olardı. Məsələn:

* "Bəlkə də bu dünya hansısa planetin cəhənnəmidir”;

* "Hazır ol döyüşə, canavara dönüncə başlasın cavaş! Ölüm torunu hörmüşəm, qan səhəri bura çətin gün düşə və günəşə görə, mən hər şeyi görmüşəm”;

* "Dəniz çox qəribədir; hökm etmək istəsən, boğar, geri çəkilib çıxmaq istəsən, itələyər, sakitcə baxıb seyr etsən, hüzur verər...”;

* "İnsan əlinin çata bilmədiyi hər şeyin dəlisi, çata bildiyinin isə nankorudur”;

*  "Dost başa baxar, düşmən ayağa”. Boş söhbətdir. İndiki dövrdə hər ikisi gözünün içinə baxır. Ehtiyatlı olmaq lazımdır. Dost kim, düşmən kim – bilmək lazımdır!” və s.

Kərim sosial şəbəkədə də aktiv olan gənclərdən idi. Bəzən suallar qoyar, o sualların ətrafında müzakirələr aparardı. Məsələn: "Tarixi hadisələrə şahidlik etmək istəsəydiz, hansı tarixi hadisəni seçərdiniz?”. Bu suala özü də ilk olaraq cavab verir: "Mən 1918-ci il, Cümhuruyyətin elanı – 28 May deyirəm”. Beləcə müzakirələr başlanardı.

Yaşının azlığına baxmayaraq, Kərim qayğıkeş övlad, dəyərli dost, sədaqətli qardaş və ən əsası isə, Vətənini canından artıq sevən, hər kəsdən üstün tutan qeyrətli, ləyaqətli Azərbaycan oğlu idi! Bütün insani keyfiyyətləri özündə cəm edən ƏSL İNSAN idi! Onun haqqında nə qədər xoş sözlər söylənsə də, azlıq edər... 

K.Əhmədəliyev hərbi xidmətdə də  hörmət, sevgi və yeni dostlar qazanır. Mərdliyi, şücaəti, dostluqda etibarlı və sədaqətli olması ilə həmyaşıdlarına, özündən kiçiklərə nümunə göstəriləcək biri olur igidimiz. 

Sentyabr ayının 21-i 2020-ci ildə K.Əhmədəliyev əsgər yoldaşları ilə birlikdə təlimlərə qatılır və sentyabrın 26-dək Ağdamın Baharlı kəndində təlimlərdə olur. Həmin günün axşam saatlarında isə Ağdamın Xındırıstan kəndinə gedirlər. Briqada mərkəzdə bölüklərə, taqımlara bölünərək, hər kəs öz yerini dəqiq bilir. 

2020-ci il sentyabrın 27-si II Qarabağ müharibəsi başlanan zaman Kərim də bu məqamda hətbi xidmətdə olduğuna sevinir. Gənc əsgər silahdaşları ilə birlikdə sentyabrın 27-dən oktyabrın 4-dək Ağdam-Tərtər istiqamətində irəlilədikcə təlimlər keçir, döyüş mövqelərini möhkəmləndirirdilər.

Xidməti dövründə Kərim kəşfiyyatçı və manqa komandiri olaraq, komandirlərin və əsgər yoldaşlarının rəğbətini qazanmışdı. Buna da səbəb onun gözəl, saf qəlbinin, istiqanlı, diqqətcil, mərd, qorxmaz olması olmuşdu.

Oktyabrın 4-ü Suqovuşanın azad edilməsi uğrunda qızğın döyüşlər gedir. Zirvəyə çıxan ilk döyüşçülərdən biri Kərim olur. Elə bu zirvədə də düşmənlə savaş başlanır. Döyüş zamanı atılmış minamyotun qəlpələrindən Azərbaycan Ordusunun cəsur döyüşçüsü həlak olaraq, Allah dərgahında ən uca zirvəyə - hər kəsə nəsib olmayan Şəhidlik məqamına yüksəlir.

Azərbaycan Ordusunun məğrur, igid əsgəri Kərim Əhmədəliyev 10 oktyabr 2020-ci il tarixdə Sumqayıt Şəhidlər Xiyabanında dəfn olunur. 

Kərim tələbə olan zaman qrup yoldaşlarına demişdi: "Vaxt gələcək, məndən kitab yazılacaq!”. Bəli, Azərbaycanın qeyrətli vətən oğlu Kərim Əhmədəliyev 3 ayın əsgəri olsa da, elə bir qəhrəmanlıq göstərdi ki, onun haqqında bir yox, neçə-neçə kitablar yazılır, filmlər çəkilir... Vətən oğlunun keçdiyi şərəfli yol gənc nəsillərə bir  örnəkdir!

Azərbaycan Silahlı Qüvvələrinin mətin, cəsur döyüşçüsü, 22 yaşlı kəşfiyyatçı,əsgər Kərim Rövşən oğlu Əhmədəliyev ölümündən sonra, Ölkə Rəhbərinin müvafiq Sərəncamlarına əsasən, "Vətən uğrunda” və "Suqovuşanın azad olunmasına görə” medaları ilə təltif olunub.

 

Ruhun şad olsun, Cənnətməkan Şəhidimiz!!!

----------------------------

ƏHMƏDOV ABDULLA ƏHMƏD oğlu       

(Əsgər)

ABDULLA ƏHMƏD oğlu ƏHMƏDOV 2002-ci il mart ayının 12-də Sumqayıt şəhərinin Corat qəsəbəsində dünyaya göz açıb. O, Əhmədovlar ailəsində intizarla gözlənilən bir uşaq olub. 12 ildən sonra dünyaya gələn, evin tək övladı olan Abdulla dünyaya gəlişi ilə uzun illərin həsrətinə son qoyub. Allaha bağlı olan gözəl bir ailədə böyüyüb, boya-başa çatan Abdulla namaz qılan, Allaha yaxın, sakit, səbirli bir insan, valideynlərinin başını uca edən tərbiyəli, əxalqlı, vicdanlı övlad olub. 

Abdulla Əhmədov 2009-cu ildə Sumqayıt şəhər 33 saylı tam orta məktəbin 1-ci sinfinə qədəm qoyub, iki ildən sonra 34 saylı məktəbə dəyişdirilərək, təhsilini orada davam etdirib. O, 9-cu sinfi bitirdikdən sonra sənədlərini Peşə məktəbinə verməyi planlaşdırsa da, son anda fikrini dəyişib. Sinif yoldaşları ona o qədər əziz, doğma olmuşlar ki, onlardan ayrılmaq istəməyib. Ən əsası isə, son zəng sevincini yoldaşları ilə bir yerdə yaşamaq istəyib...

Abdulla Dinini, Dilini, Vətənini, Torpağını, valideynlərini ürəkdən sevən və onlara qırılmaz tellərlə bağlı olan bir oğul idi. Hələ aşağı siniflərdə oxuyanda onun idmana hədsiz marağı olub. O üzdən, cüdo, sambo, ağır atletika ilə, boksla, hətta boyu uzansın deyə, voleybolla da məşğul olub. Qabiliyyətinə və bacarığına görə, məşqçiləri onu dəfələrlə mötəbər yarışlara aparmaq istəsələr də, valideynləri razılıq verməyiblər. 

Evin tək övladı olduğu üçün valideynlər hər zaman Abdullaya görə narahat olublar, nəsə bir hadisə baş verə biləcəyindən qorxublar. Beləcə, idmançı olub, Azərbaycan bayrağını dünyanın hər yerində dalğalandıra biləcək bir yeniyetmənin arzuları yarımçıq qalır... 

Abdulla ağıllı, tərbiyəli, ağır təbiətli idi. Az yaşı olmasına baxmayaraq, sadəliyi, səmimiliyi, mehribanlığı, istiqanlılığı, şirin dili ilə hamının hörmətini qazanmışdı. Bəlkə elə bu xüsusiyyətlərinə görə idi, çoxlu dostları vardı. 

Avdulla ailənin yeganə övladı olduğu üçün ona bir çox qadağalar qoyulmuşdu. Bu da valideynlərin onu itirmək qorxusundan irəli gəlirdi. 12 ildən sonra Əhmədovlar ailəsinə Uca Allah tərəfindən bəxş olunan şirin paya görə, əzizləri "tir-tir” əsir, onu gözlərindən kənar qoymurdular. Abdulla özü də sözəbaxan, qayğıkeş, zəhmətkeş, ailəcanlı idi. Valideynlərinin bir sözünü iki etməzdi. Uşaqlıqdan hər kəsə yardım göstərməyə, yaxşılıq etməyə can atardı. Kiməsə köməklik edəndə, sevinci yerə-göyə sığmazdı. Öz fikrini elə bildirərdi ki, kimsə inciməzdi. Xoş rəftarına görə hamının sevimlisinə çevrilmişdi. Heç kəsdə, heç nədə gözü olmayan, gözütox biri idi. 

Abdulla uşaqlıqdan dənizin vurğunu olmuşdu. Coratdan dənizə bir addımlıq yol idi. O, hər gün dənizə getmək, mavi sulara baş vurmaq arzusunda olsa da, bu da ona nəsib olmurdu. Bu arzusuna yalnız dostları ilə gedəndə qovuşa bilirdi...

Dünyaya gələndə ayağında problem olduğundan, Abdulla həddən çox gəzə, qaça bilmirdi. İdmanla məşğul olsa da, bu promlem aradan qalxmırdı. O, 11-ci sinfi bitirdikdən sonra, hərbçi olmaq istəyi ilə yaşayırdı. Doğma Vətənə xidmət etmək, onu qorumaq, Azərbaycanın bütövlüyü uğrunda vuruşmaq, qələbə çalmaq... O anlarda bu idi gənc Abdullanın arzuları.

2020-ci il mart ayının 12-si Abdullanın 18 yaşı tamam olur. O, bu yaşını səbirsizliklə gözləyirdi. Xocalı, 20 Yanvar hadisələrini heç cürə unuda bilmirdi. "Heç olmasa, 5-10 düşmən öldürə bilsəydim, rahat olardım. Qatillərin cəzası mütləq verilməlidir!” deyərdi. Qəlbi Vətən eşqi ilə çırpınan gənc oğlan, Vətənə borcunu ödəmək üçün çox tələsir, səbirsizliklə hərbi xidmətə çağırılacağı günü gözləyirdi. Nəhayət, o gün gəlib çatdı.

2020-ci il may ayının 5-də Abdullaya Sumqayıt şəhər Hərbi Komissarlığından "Çağırış” vərəqəsi gəlir. O, doğmaları ilə görüşdükdən sonra, sevimli nənəsinin boynunu qucaqlayıb deyir: "Bax, nənəcan, mən gəlincə özündən muğayat ol, özünü mütləq qoru”. Və o, Vətən qarşısında övlad borcunu yerinə yetirmək üçün, çox böyük çoşqu, sevinclə  xidmətə yola düşür. 

Abdulla Əhmədov ilk əvvəl Goranboy rayonunun Ballıqaya kəndindəki "N” saylı hərbi hissədə 2 ay qulluq edir. Daha sonra, Tərtər rayonunun Qaradağlı kəndindəki "N” saylı hərbi hissədə xidmətinə davam edir. Bir neçə aylıq xidməti dövründə təlim-tərbiyəsi, qanacaq-mərifəti, bacarığı ilə seçilən gənc əsgər komandirin və əsgər yoldaşlarının hörmətini, sevgisini qazanır. 

Sentyabrın 26-si axçamçağı qızğın döyüşlər başlananda Abdulla Əhmədov da bu döyüşlərə qatılır. Növbəti günlərdə valideynləri ilə telefonla danışanda, narahat olmasınlar deyə, döyüşdə iştirak etdiyini onlardan gizlədir. 

Sentyabrın 28-i Abdullanın ailəsinə sonuncu zəngi olur. Döyüşqabağı nəyin necə olacağını bilmədiyindən, hər ehtimala qarşı, valideynləri ilə vidalaşan kimi danışır. 

Gənc əsgər Suqovuşan, Talış istiqamətində gedən döyüşlərdə iştirak edir. Oktyabr ayının 1-i Ağdərə-Tərtər istiqamətində, Talış kəndi yüksəkliyində Gülüstan kəndi ətrafında qızğın döyüşlər başlayır. Abdulla və bir neçə döyüş yoldaşı silah-sursat aparan maşında olurlar. Maşın minamyotlardan nişana alınır. Abdulla və yoldaşları maşından çıxıb hərə bir tərəfə səpələnir. Bu zaman atılan mərmilərdən biri Abdullanın düz yanına düşür. Azərbaycan Ordusunun qəlbi arzularla tüğyan edən gənc əsgəri qəhrəmancasına həlak olur, Allahın sevimli bəndələrinə bəxş etdiyi ən uca məqama yüksələrək Şəhidlik şərbətini içir...

Abdulla uşaqlıqdan Allaha bağlı, imanlı biri idi. Sumqayıt məscidi evlərinə yaxın olduğuna görə, Azan səsi eşidən kimi, namazı qılmağa evlərinə gedərdi. Heç bir səbəb olmadan namazını gecikdirməzdi. O, əqidəsinə, məsləyinə sadiq idi. 

Abdulla Allahın Əhmədovlar ailəsinə bəxş etdiyi şirin pay idi. Uca Allah bu gözəl payı özü verdi, məqamı çatanda da aldı. Bəzən "nədən?”, "niyə?” suallarını vermək də artıqdır... Allahın hökmünə qarşı kimsə çıxa bilməz, Bəndə Ona məxsusdur, nə məsləhət bilirsə, şükür məsləhətinə... 

Lakin bir həqiqət də var ki, hər kəsə Allahın uca dərgahında olmaq nəsib olmur. Yalnız SEÇİLMİŞLƏRin üzünə O, – Cənnət qapıları açılır. Abdulla gözəl, saf qəlbi, xeyirxah əməli və amalı ilə o yüksəkliyə ucaldı, Azərbaycan tarixinin parlaq səhifələrinə 18 yaşlı qəhrəman kimi adını yazdı!

Azərbaycanın qeyrətli, comərd oğlu, qəlblərdə taxt qurmuş Abdulla Əhmədovun itkisini ailəsi 9 oktyabr tarixində bilir. Yeganə övladlarını itirən valideynlər üçün nə qədər üzüçü olsa belə, imanlı insanlar olduqlarından, dünyanın gərdişindən baş aça bildiklərindən, özlərini qismən də olsa toparlayıb, "Vətən sağ olsun!” deyirlər...

10 Oktyabr 2020-ci ildə Vətən sevdalı igidimizin – Abdulla Əhmədovun nəşi Sumqayıt şəhərinə gətirilir və Sumqayıt Şəhidlər Xiyabanında torpağa tapşırılır. 

Cəmi 5 ayın əsgəri olan Şəhidimizin 40 mərasimi noyabr ayının 10-na - Qələbə gününə təsadüf edir...

Cəmi 18 il ömür  yaşayan qəhrəmanımız bu ömrə bir əsrə bərabər ömür sığışdıra bildi... Bu gün Vətənin gənc, qeyrətli, cəsur oğlunu hər kəs xoş xatirə ilə yada salır, ruhuna dualar oxuyur. Şəhidləmizin ruhları ailələrində, onları tanıyan insanların ətrafında, ən əsası isə, canlarından, qanlarından keçməyə hazır olduqları azad olunmuş Qarabağ torpaqlarında daima dolaşır...

Azərbaycan xalqına Qələbə sevinci yaşadan Abdulla kimi qəhrəmanlarımız milyonların qəlbində öz əməlləri ilə hər zaman yaşayacaqlar!!!

Azərbaycan Silahlı Qüvvələrinin mərd, qorxmaz, cəsur əsgəri, 18 yaşlı pulemyotçu Abdulla Əhməd oğlu Əhmədov doğma Vətən torpaqlarının bütövlüyü, azadlığı uğrunda gedən savaşda göstərdiyi igidliyə, şücaətə görə, ölümündən sonra, Ölkə Rəhbərinin müvafiq Sərancamına əsasən, "Vətən uğrunda” medalı ilə təltif olunub.