Xəbər verdiyimiz kimi, bu gün saat 06:50 radələrində Bakı-Sumqayıt avtomobil yolunun 20-ci kilometrliyində "Mercedes" markalı, 99-FK-216 dövlət qeydiyyat nişanlı avtomobilin təkəri sıradan çıxdığı üçün sürücü nəqliyyat vasitəsini hərəkətdə olduğu ən sol zolaqda dayandırıb və zəruri təhlükəsizlik tədbirləri görmədən sərnişini ilə birgə nasazlığı aradan qaldırmağa çalışıb. Bu zaman, arxadan eyni zolaqda yüksək sürətlə hərəkət edən "Honda" markalı, 77-GF-549 dövlət qeydiyyat nişanlı avtomobil nasaz nəqliyyat vasitəsinə çırpılıb.
Nəticədə "Mercedes" markalı avtomobilin sürücüsü və sərnişini hadisə yerində həyatlarını itirib.
Bəs sürücü məcburi dayanma edərkən, təhlükəsizlik qaydalarına riayət etmək üçün nə etməlidir?
Xəbərlə.com-un məlumatına görə nəqliyyat eksperti Ərşad Hüseynov baş vermiş faciəli qəzanının sürücülərin elementar qaydalara bigana münasibətinin nəticəsi olduğunu bildirib. Nəqliyyat eksperti sürücülərə tövsiyyələrini qeyd edib:
"Bu gün səhər saatlarında Bakı-Sumqayıt yolunda baş verən və 2 nəfərin həyatına son qoyan qəza da sürücülərimizin elementar qaydalara biganə münasibətinin faciəli sonudur. Allah hər ikisinə rəhmət eləsin...
Hava tam işıqlaşmamış (6:50-də) yolun ən sol zolağında məcburi dayanma edən "Mercedes”ə arxadan gələn "Honda”nın çırpılması dayanan avtomobilin sürücü və sərnişini üçün faciə ilə bitib. Onlar avtomobilin sıradan çıxan təkərini təmir etməyə (yəqin ki, dəyişməyə) çalışırmışlar. Polisin məlumatına əsasən, zəruri təhlükəsizlik tədbirləri görülməyibmiş...
Əlavə təfərrüatları bilmirəm. Hadisəyə qiymət vermək fikrim də yoxdur. Amma bu faciəli qəzadan çıxış edərək sürücülərə israrla aşağıdakı tövsiyələri vermək istəyirəm.
1. Yolun ən sol zolağı ən təhlükəli zolaqdır. Orada ən ciddi nasazlıqlar yarandıqda belə, maksimum dərəcədə avtomobili yolun sağına çıxarmağa çalışmaq lazımdır. Məsələn, təkərinin havası boşalan, hətta tam diskə oturan avtomobili də çox ehtiyatla sağ zolağa, varsa, yol çiyninə çıxarıb dayandırmaq lazımdır.
2. Sol zolaqdan və ya orta zolaqdan avtomobili kənarlaşdırmaq heç cür mümkün deyilsə, qəza dayanma işıqlarını qoşmaq (işləyirsə), dərhal qəza dayanma nişanı da qoymaq lazımdır. "Mersedes”in bəzi modellərində baqajı açanda qəza dayanma nişanı görünür, amma bu azdır. Bakı-Sumqayıt yolu kimi sürət olan yolda həmin nişanı götürüb, avtomobildən 30 metr arxada qırmızısı gələn sürücülərə yönəldilməklə qoymaq lazımdır.
3. Xırda və yerində qısa müddətə aradan qaldırılan nasazlıqdırsa, çox ehtiyatla onu aradan qaldırmağa çalışmaq lazımdır. Bu zaman arxayınçılığa yol verilə bilməz. İşi görərkən çox diqqətli olmaq, sözün həqiqi mənasında bir gözlə daim arxanı nəzarətdə saxlamaq lazımdır. Əgər sərnişinlər varsa, onlardan birinə nəzarət üçün maşının daha təhlükəsiz tərəfində dayanaraq ətrafa baxmaq, təhlükə yaranan kimi xəbərdarlıq etmək tapşırığı vermək lazımdır.
4. Nasazlıq ciddidirsə, yerində aradan qaldırılması mümkün deyilsə, yaxud uzun müddət çəkəndirsə, avtomobili yuxarıda qeyd etdiyim kimi işarələdikdən sonra sürücü və sərnişinlər dərhal yolun hərəkət hissəsindən kənara çıxaraq orada texniki yardım çağırmalı və gözləməlidirlər. Avtomobilin yanında və ya içərisində olmaq hər an ölüm riski deməkdir.
5. Əgər bu gün baş verən hadisədə olduğu kimi, qaranlıqdırsa, yaxud toranlıqdırsa, başqa məhdudiyyətli görünmə şəraiti (duman, yağış və s.) varsa təhlükəsislik tədbirləri 2-3 qat artıq olmalıdır, yerində təmirin mümkünlüyünə daha diqqətlə yanaşılmalıdır...
Şəraitə uyğun digər təhlükəsizlik tədbirləri də lazım ola bilər.Hər bir halda təhlükəsizliyə və yol hərəkəti qaydalarına biganə münasibət ola bilməz. Hər kəs unutmamalıdır ki, heç bir qayda boş yerə yazılmayıb. Onların ən bəsitinin də pozulması son ola bilər".
Elşən Yəhyayev
Xəbərdən istifadə edərkən istinad etmək vacibdir.
