Müsahibimiz 8 yaşlı xanəndə Fərman Əzizovdur. O Sumqayıtda şəhər tədbirlərində fəal iştirak edir.
Xeberle.com-un əməkdaşı Fərman Əzizovla hömsöhbət olub.
- Fərman, səni yaxından tanıyaq...
Mən, Əzizov Fərman Vahid oğlu 2016-cı ildə avqust ayının 31-i Sumqayıt şəhərində anadan olmuşam. Bu il 8 yaşım olacaq. Sumqayıt şəhər, İsmət Qayıbov adına 1 saylı tam orta məktəbdə 2-ci sinif şagirdiyəm. Ən çox sevdiyim iş mahnı oxumaqdır. Tezliklə, musiqi məktəbinə gedib qardaşımın müəllimi Əsgər İsmayılovun tələbəsi olmaq üçün səbrsizlənirəm. Balacalıqdan anama, qardaşıma qulaq asmağı, onlarla bərabər mahnı oxumağı çox sevirəm. Son vaxtlarda isə ən çox Təyyar müəllimin və Babək Niftəliyevin səs yazılarına qulaq asıram. Vətənə aid yazılan şeirlər və mahnılar daha çox xoşuma gəlir.
- Özündə musiqi istedadının olduğunu necə kəşf etdin?
44 günlük müharibə vaxtı anamla ticarət mərkəzində idim. Kənan Bayramlının ifasında "Bayatı Şiraz” səslənirdi, mən də onunla bərabər oxuyurdum. Sonda ətrafdakı insanlar hamısı məni alqışlayıb yenə oxumağımı istədilər. Beləcə başladı.
Müəyyən bir dövrdən sonra hansı mahnı ilə yaddaşda qalmaq istəyərsən?
Tacir Şahmalı oğlu və Kənan Bayramlıdan sonra "Bayatı-Şiraz” muğamı mənim ifamda da yaddaşlarda qalsın istəyirəm.
- Hansısa musiqi məktəbində təhsil alırsan?
8 yaşım tamam olan kimi anam məni Sumqayıt şəhər Bülbül adına 2 saylı uşaq incəsənət məktəbinin xanəndəlik sinfinə yazdıracaq. 1 il musiqişünas bəstəkar Məryəm Əlibəylinin "Gülən notlar" pop estrada qrupunun üzvü olmuşam.
- Ailədə səndən başqa musiqi istedadı olan varmı?
Anamın məlahətli səsi var, amma ailədəki qadağalara görə musiqi sahəsində təhsil ala bilməyib. Qardaşımın və mənim gözəl səsimiz olduğu üçün anam bizimlə öz arzusunu yaşayır. Qardaşım Əzizov Yusif Azərbaycan Milli Konservatoriyasının Xanəndəlik ixtisasında 1-ci kurs tələbəsidir.
- Dərslərini necə oxuyursan?
Daha çox incəsənətə bağlı olduğum üçün dərslərim orta səviyyədədir. Məktəbi mənə sevdirən əsas səbəb direktorumuz Kəmalə Hüseynovanın diqqəti, mehribanlığı və qayğıkeşliyidir.
- Ən sevdiyin fənn hansıdır?
Təbii ki, musiqi...
- Asudə vaxtını necə dəyərləndirirsən?
Təbiətin qoynunda mahnılar oxumağı sevirəm.
- Gələcək haqqında hansı planların var?
Azərbaycan Respublikasının xalq artisti fəxri adı ilə səhnələrdə yeni Məcnun obrazı yaratmaq istəyirəm.
- Sumqayıtda hansı məkanları sevirsən?
Sumqayıt Bulvarında gəzməyi və Sumqayıt Dövlət Dram Teatrında tamaşalar izləməyi çox sevirəm. Ən çox da Elay Xasiyevin rolları bir az da incəsənətə sevgimi artırır.
- Şəhərimizdə hansı dəyişikliklərin olmasını istəyərsən?
Uşaqlar üçün kukla teatrı və istedadlı uşaqların daha çox bir araya gələ biləcəyi məkanların çox olmasını istərdim.
Sənə gələcək fəaliyyətində və təhsil həyatında uğurlar arzu edirik.
Çox sağ olun.
Söhbətləşdi: Elşən Yəhyayev
Xəbərdən istifadə edərkən istinad etmək vacibdir.
