Zakir Fərəcovun Sumqayıt şəhərinə rəhbər təyin olunmasından sonra şəhərin həm ictimai, mədəni həyatında, həm də abadlıq quruculuq işlərində canlanma hiss olunur. Şəhərin bir neçə hissəsində eyni vaxtda tikinti və yenidənqurma işləri aparılır. Qısa müddət ərzində bir neçə sosial, mədəni, idman əhəmiyyətli obyektlerin tikintisinə start verilib. Həmçinin çoxlarının səbrsizliklə gözlədiyi Sumqayıt bulvarında da işlər sürətlə davam etdirilir. Maraqlısı budur ki, bütün bu işlər paralel olaraq aparılır.Görülən işlərdən biri də Sumqayıtda dam örtüklərinin yenilənməsidir. Bildiyimiz kimi, şəhərimizdə 800 bina var ki, bunların da dam örtüyünün yenilənməsi çox vacib məsələdir. Yeri gəlmişkən, bugünlərdə ölkə başçısı İlham Əliyev Sumqayıt şəhərində çoxmənzilli binaların dam örtüklərinin dəyişdirilməsi ilə bağlı sərəncam imzalayıb. Sərəncama əsasən, şəhərin mənzil fonduna daxil olan 100 çoxmənzilli binanın dam örtüyünün dəyişdirilməsi və zəruri təmir işlərinin həyata keçirilməsi üçün Sumqayıt Şəhər İcra Hakimiyyətinə 2015-ci il dövlət büdcəsində nəzərdə tutulmuş Azərbaycan Respublikası Prezidentinin Ehtiyat Fondundan 5 milyon manat ayrılıb.
Əslində, respublika prezidentinin sərəncamından əvvəl də artıq şəhər icra hakimiyyəti bu vacib məsələ ilə bağlı hərəkətə keçmiş və bir neçə binanın dam örtüyü yenilənməkdə idi. Şəhər İcra Hakimiyyətindən aldığımız məlumata görə, artıq 18-ci mkr. - da 42 binanın 35-də bu işlər yekunlaşmaq üzrədir. Yerdə qalan 7 binada isə işlər artıq başlanılıb. Ümumilikdə isə dam örtüklərinin yenilənməsi mərhələli şəkildə həyata keçiriləcək və yaxın müddətdə yekunlaşacaq. Bununla bağlı Xeberle.com portalının əməkdaşları şəhər ictimaiyyətinin, ziyalıların fikrini öyrənib. Rəyləri təqdim edirik:

Tahir Mirkişili, millət vəkili
Sumqayıtda şəhər infrastrukturunun yenidən qurulmasına böyük ehtiyac vardır. Şəhər rəhbərliyinin son aylarda gördüyü işlər miqyasına və həcminə görə çox böykdür! Şəhərin tamamilə simasını dəyişdirəcək işlər görülür və yeni yeni işlərə start verilib. Ölkə Prezidenti Sumqayıt şəhərinə həmişə qayğı ilə yanaşmış, şəhərin inkişafını daim diqqət mərkəzində saxlamışdır. Son sərəncamlar Sumqayıt sakinlərinin birbaşa gündəlik qayğılarına yönəlməklə həm də şəhərin inkişafına böyük dəstəkdir. Əminəm ki, bu işlər sürətlə davam etdiriləcək, şəhər inkişaf edəcəkdir. Sumqayıt ölkəmizdə sürətlə inkişaf edən və həyati əhəmiyyət daşıyan qeyri-neft sektorunun ən böyük mərkəzinə çevriləcək.


Rəhman Orxan, jurnalist
Yəqin ki, şəhərin sıradan çıxmış bütün dam örtükləri dəyişdiriləcək. Hörmətli icra başçısı Zakir Fərəcovun belə bir təşəbbüsünü və ölkə Prezidenti İlham Əliyevin bununla bağlı şəhərimizə göstərdiyi diqqət və qayğını bütün sumqayıtlılar kimi mən də ürəkdən alqışlayıram. Şəxsən bizim yaşadığımız binanın dam örtüyü çox bərbad vəziyyətdədir. Neçə illərdir ki, soyuqlar, qar-yağış başlayanda bizim də narahatçılığımız başlayırdı. Çox vaxt özümüz dama qalxıb, şiferlərin qopub-sınan yerlərini köhnə-qırıq şiferlərlə birtəhər yamamağa çalışırdıq. Xeyli vaxt soyuq havada damın ora-burasına əl gəzdirsək də, bəzən həm mənzilə, həm də "podyez"ə yağış damırdı. Ancaq inanırıq ki, daha damın təmiri sakinlərin "özfəaliyyəti”nin ümidinə qalmayacaq, problem birdəfəlik həll olunacaq, şəhərimizin heç bir sakini payız-qış aylarında qar-yağışa görə narahatlıq keçirməyəcək, mənzillərində bütün aylarda rahat və qayğısız yaşaya biləcəklər.

Füzuli Sabiroğlu, yazar, ssenarist
Dam örtüklərinin dəyişdirilməsi yaxşıdır. Bunu təqdirəlayiq hal hesab edirəm. Əslində, bu iş çoxdan olmalı idi. Ancaq düşünürəm ki, binaların zirzəmilərindən başlamaq daha doğru olardı. Sumqayıtda bu saat binaların əksəriyyətinin kanalizasiya sistemi pis vəziyyətdədir. Ümidvaram ki, tezliklə bu işə də başlanılacaq! Bu işi həyata keçirənlərə uğurlar diləyirəm!



Arzu Qafarlı, iqtisadçı-ekspert
Son zamanlar, Sumqayıtda balanslı şəkildə başlanan surətli iş prosesini, müsbət dəyişiklikləri görür və təqdirəlayiq hesab edirik. Şəhərin girişindən bu dəyişikliklər mühüm diqqət cəlb edir. Şəhərdə mərkəzi küçələrin asfalt örtüyünün yenilənməsi, parklarda yenidənqurma işləri, bir çox mikrorayonlarda liftlərin yeniləri ilə əvəzlənməsi, bir sözlə, sakinləri narahat edən problemlərin aradan qaldırılması istiqamətində mühüm tədbirlər həyata keçirilir.
Bir şəhər sakini kimi, bizi də narahat edən problemlərdən biri binaların dam örtüklərinin yararsız vəziyyətdə olmasıdır. Sumqayıt şəhərində çoxmənzilli binaların dam örtüklərinin dəyişdirilməsi və zəruri təmir işlərinin həyata keçirilməsi üçün Sumqayıt Şəhər İcra Hakimiyyətinə Azərbaycan Respublikası Prezidentinin ehtiyat fondundan 5 milyon manatın ayrılmasını ölkə başçısının Sumqayıt əhalisinə olan diqqət və qayğısı kimi qiymətləndiririk. Bu o deməkdir ki, qısa zaman ərzində şəhər sakinlərinin qarşılaşdığı saylı problemlər köhnə xatirələrə çevriləcəkdir.
Mən 42-ci məhəllə, ev 6-da, beşmərtəbəli binanın, 5-ci mərtəbəsində yaşayıram. Qarlı, yağışlı havalarda ən son mərtəbələrdə yaşayan sakinlər problem yaşayırlar. İllərdir bizim əraziyə cavabdeh olan Mənzil Komunal İstismar sahəsinə və aidiyyəti təşkilatlara müraciət edilib, ərizə yazılıb amma heç bir tədbir görülməmişdir. Bina sakinlərinə fərdi qaydada binanın tol örtüyü ilə üzlənməsi həm iqtisadi cəhətdən baha başa gəlir, həm də natamamlıqla və keyfiyyətsizliklə nəticələnir ki, bu da hər il eyni işlərin görülməsini zəruri edir. Bu bəladan qurtulmaq üçün mütəxəssislər binanın üstünün şifer (cerepisa) örtüyü ilə örtülməsini məqsədəmüvafiq bilirlər. Bu isə azı 3000-4000 manata başa gəlir (usta haqqı ilə birlikdə). Bir sözlə hər il bu problemdən əziyyət çəkirik. 
Sumqayıt şəhərində çoxmənzilli binaların dam örtüklərinin dəyişdirilməsi ilə bağlı tədbirlər haqqında Azərbaycan Respublikası Prezidentinin Sərəncamını mətbuatdan oxuduqda hər bir Sumqayıtlı kimi məndə çox sevindim. İnanırıq ki, qısa zaman ərzində bütün sakinlər bu problemdən qurtulacaqlar.
Bir Sumqayıt sakini kimi, bu işdə əziyyəti olan hər kəsə çox sağol deyir və uğurlar arzu edirəm.

Aytən Abdullayeva, 1 saylı Sumqayıt şəhər Xəstəxanasının həkimi
Bir sumqayıtlı kimi ölkə başçısına qışa hazırlıq prosesində Sumqayıtı da kənarda saxlamadığı üçün xüsusi minnətdarlığımı bildirirəm. Mənə elə gəlir ki, belə bir sərəncamın verilməsi bütün sumqayıtlıların ürəyincə oldu. Etiraf edək ki, SSRİ-nin süqutundan sonra şəhərimizin insanları xüsusən də qış aylarında çox əziyyət çəkirdi. Dövlət başçımız tərəfindən belə hallara diqqətin ayrılması yalnız alqışalayiq hal kimi qiymətləndirilməlidir. Yetər ki, Sumqayıtımızda quruculuq və abadlıq işlərilə yanaşı, qışa bütöv hazırlıq da yüksək səviyyədə həyata keçirilsin.


Feyruz Şivəxanov, hüquqşünas
Dam örtüklərinin təmiri çox vacib məsələdir. Yuxarı mərtəbələrdə yaşayan sakinlər yağmurlu günlərdə çox əziyyət çəkirlər. Mənim kimi 1-ci mərtəbələrdə yaşayanların problemi isə zirzəmilərin rütubətli olması, bəzi yerlərdə isə hətta su yığılmasıdır. Sumqayıtda ən böyük problem isə istilik təchizatının pis vəziyyətdə olmasıdır. Hazırda Sumqayıtda yaşayış binalarının təxminən 12 faizi istiliklə təmin olunmuşdur. Bir sumqayıtlı kimi şəhərin istilik təchizatının bərpa olunmasını səbirsizliklə gözləyirəm. Bu işləri aparanlara uğurlar arzu edirəm!

Elvin Məmmədzadə, YAP Sumqayıt şəhər təşkilatının Gənclər Birliyinin sədri, Sumqayıt şəhər Bələdiyyəsinin üzvü
Ümummilli lider Heydər Əliyev siyasi kursunun layiqli davamçısı cənab prezident İlham Əliyevin Sumqayıt şəhərinə olan diqqət və qayğısı biz gəncləri daim sevindirir. Cənab prezidentin 13 oktyabr 2015-cil il tarixli sərəncamına əsasən Sumqayıt şəhərində lift təsərrüfatının maddi-texniki bazasının möhkəmləndirilməsi, dövlət mənzil fonduna aid olan çoxmənzilli binalarda istismara yararsız liftlərin yenisi ilə əvəz edilməsi üçün 3.7 milyon manat və 15 dekabr 2015-ci il tarixli sərəncamına əsasən çoxmənzilli binaların dam örtüklərinin dəyişdirilməsi və zərurui təmir işlərinin həyata keçirilməsi üçün Sumqayıt şəhər İcra Hakimiyyətinə 5 milyon ayırması bu diqqət və qayğının bariz nümunəsidir. Prezident İlham Əliyevin rəhbərliyi ilə ölkəmizdə bütün sahələrdə aparılan uğurlu islahatlar, əldə olunan nəticələr xalqın və gənclərin sabaha olan inamını qat-qat artırmış, Heydər Əliyev yolunun layiqincə davam etdirildiyinə, memarı olduğu müstəqil Azərbaycanın etibarlı əllərdə olduğuna möhkəm əminlik yaratmışdır. Ulu öndər Heydər Əliyev siyasətinin Prezident İlham Əliyev tərəfindən uğurla davam etdirilməsini aydın görən YAP Sumqayıt şəhər təşkilatının Gənclər Birliyi bu siyasəti yüksək dəyərləndirir və cənab prezidentin ətrafında daha sıx birləşirlər.

Müşfiq Şükürlü, filosof, pedaqoq
Şəhəri gözəlləşdiririk. Prinsipcə, yaxşı işdir. Amma iş yerlərinin açılması üzərində daha çox düşünmək lazımdır. Xüsusi ilə Sumqayıtda. Məni daha çox bu qayğılandırır. Gözəllik, ikinci dərəcəlidir.







Əkrəm Həsənov, ilahiyyat üzrə fəlsəfə doktoru
Hörmətli Prezidentimizin Sumqayıt şəhərinə olan xüsusi qayğısı, diqqəti də vardır. Dəfələrlə Sumqayıta səfəri zamanı bunu sakinlər özləri gözləri ilə görmüş və etiraf etmişlər. Qeyd edək ki, son günlər Sumqayıtda binaların dam örtüyünün dəyişdirilməsinə 5 milyon manat vəsait ayırması da bu şəhər sakinlərinə olan böyük diqqət və qayğısını göstərir. Buna qədər də Sumqayıtda binaların dam örtüyünün dəyişdirilməsi prosesinə başlanmışdı. Bu məsələdə yerli icra sturukturları da öz öhdələrinə düşən işləri yerinə yetirməlidirlər. Onlar hörmətli Prezidentimizin əmr və sərəncamlarından irəli gələn məsələlərdə xalqa kömək göstərməlidirlər. Düşünürəm ki, bu, hörmətli prezidentimizin şəhər əhalisinə olan qayğısının əsas göstəricisidir. Ancaq işləri icra edənlər bu məsələdə hörmətli dövlət rəhbərinə sədaqət göstərməli və əhalinin narazı olmasına zəmin yaratmamalıdırlar. Xüsusi ilə məhəlləarası yolların təmir olunması üçün də vəsait ayrılır və ümid edirik ki, yaxın bir neçə ay ərzində məhəlləarası yollarda olan çala çökəkliklər də düzəldiləcəkdir. Çünki bütün bunlar dövlət başçısının diqqəti, göstərişi və nəzarəti altındadır. Bu gün şəhər sakinləri ayrı-ayrı binalarda, xüsusi ilə ən üst mərtəbədə qalanlar özləri üçün dam örtükləri düzəldirlər. Ancaq bu, bir çox fəsadlara gətirib çıxarır. Elə bu yaxınlarda Sumqayıtda bir neçə binanın qarşısında bəzi sakinlərin nəzarətsiz halda düzəltdikləri dam örtüyü güclü külək nəticəsində yerə düşmüş və xoşbəxtlikdən xəsarət alan olmamışdı. Bütün bu nöqsanları yüksək səviyyədə aradan qaldırmaq lazımdır. Yaxın gələcəkdə bu problemlər də aradan qaldırılacaqdır. 
Yaxşı olardı ki, Sumqayıtda dam örtüklərinin çəkilməsi sürətləndirilsin. Çünki bəzi binaların üzərində dam örtükləri yoxdur. Bu da nəticədə yuxarı mərtəbədə qalanları narahat edir. Eyni zamanda binaların zövqlü görünüşü olmalıdır. Təklifim budur ki, təmir işləri yalnız şəhərin xüsusi yerlərini yox, bütün məhəllələrini əhatə etsin. Buraya binaların üz qabığının da görünüşünü əlavə etmək olar. Bildiyimiz kimi, yalnız əsas görünən tərəflər təmir olunur. Digər ərazilər bəzən diqqətdən yayınır. Yeni təmir olunan dəmir yolunun əraziləri, elə yaşadığımız 11-ci mikraroyonda olan binaların dam örtükləri yoxdur. Binaların zirzəmiləri təmizlənməli, orada təmizlik işləri aparılıb sanitar-gigeyena qaydaları tənzimlənməlidir.
Binaların qarşısında uşaqların oynaması üçün park salınmalı, yaşıllıq, ağaclar əkilməli, həyət yolları düzəldilməlidir. Məhəllədaxili yolların bir çoxu demək olar ki, bərbad vəziyyətdədir. Hər addımda sürücülər belə hallardan narazılıq edirlər. Ümid edirik ki, yaxın günlərdə şəhərin bu problemini də həll olunmuş görəcəyik. Bəzi az sayda mikrorayonlarda həyətdə səliqə-sahman yaradılıbsa da, demək olar ki, bir çox ərazilər, xüsusi ilə yeni dəmir yolu vağzalının əraziləri, 40, 41, 42-ci məhəllələr, 8, 9, 10, 11, 12, 13-cü və sair bəzi mikrorayonların əraziləri hələ də diqqətə möhtacdır. Ümid edirik ki, yaxın günlərdə bu ərazilərə də diqqət ayrılacaqdır.
Bəyaz Novruzova, 34 saylı məktəbin direktoru
Yeni icra başçısının şəhərimizə təyinatına ilk sevinənlərdən biri də mənəm. Çünki Zakir müəllim hələ Sumqayıtda çalışdığı vaxtlardan onun iş prinsiplərinə bələdəm. Bu gün şəhərimizdə olan canlanma göstərir ki, Sumqayıtda konkret işlər gedir. Binaların dam örtüklərinin bərpası, liftlərin təmiri və yenilənməsi, məhəllədaxili yolların abadlaşdırılması - asfalt çəkilməsi, ağacların əkilməsi - bunlar hamısı şəhərimizin ictimai, sosial və mədəni həyatına bir canlanma gətirib.



Hazırladı:Kamal Almuradlı, xeberle.com