Bildiyimiz kimi, Sumqayıta son dövrlərdə diqqət və maraq daha da artıb. Şəhərdə aparılan yenidənqurma işləri, eyni vaxtda müxtəlif təyinatlı obyektlərin tikintisi çoxunun diqqətini çəkməyə bilmir. Bunlardan daha çox maraq kəsb edəni - bəlkə də birincisi Sumqayıt bulvarıdır. Hazır olmamasına baxmayaraq gün ərzində yüzlərlə insan bura axışır.

Şəhərin yeni tarixini canlı canlı izləmək, eyni zamanda dənizin havasını, parkın qoxusunu almaq üçün. Bildiyim və gördüyüm qədəri ilə Sumqayıt bulvarında müxtəlif növ ağac, bitki və gül növü əkilib. Bu iş hələ də davam etdirilir. Əraziyə maraqlı müxtəlif heykəllər də gətirilib. Bunlarla yanaşı bulvarda, eləcə də şəhərin müxtəlif yerlərində tanıtım üçün hansı addımlar atıla bilər? Bu sual ətrafında fikirləşərək ilk ideyamızı artıq saytımız vasitəsi ilə çatdırmışıq. Təklifimiz plastik butulkaların yığılması üçün xüsusi zibil qablarıdır. Ümid edirik ki, aidiyyəti qurumlar bizim bu təklifimizi dəyərləndirəcəklər. Bu həm şəhərin təmiz saxlanmasına, həm də müəyyən mənada gəlir əldə edilməsinə xidmət edəcək. İkinci belə bir təklifimiz isə şəhərin müxtəlif mənzərəli yerlərində "Sumqayıt, səni sevirəm" ("I love Sumgait") və ya "Mən sumqayıtlıyam" ("I am from Sumgait") adlı bilbordların quraşdırılmasıdır. Bu praktika dünyanın müxtəlif şəhərlərində keçərlidir.

 

 

 

 

Belə ki, həmin bilbordla çəkilən şəkillər hal-hazırda sosial şəbəkələri bəzəməkdə davam edir. Niyə də şəhərimizn tanıtımı üçün bu vasitədən istifadə etməyək?! Bu tanıtım projesini daha sonra genişləndirərək müxtəlif cür suvenirlərin, bu yazını əks etdirən köynəklərin istehsal olunması məncə məqsədəuyğun olardı.

 

 

Əgər biz şəhərimizin turizm potensiallı olduğunu vurğulayırıqsa, bu sadalanan təklifləri gec olmadan həyata keçirmək lazımdır. Ümid edirik ki, şəhər icra hakimiyyəti bu ideyamızı dəyərləndirəcək.