Xeberle.com portalının elektron ünvanına növbəti müraciət məktubu daxil olub. Sumqayıtın fəal gənclərindən biri Zöhrab Süleyman yol problem ilə bağlı şəhər icra başçısı Zakir Fərəcəva müraciət edib. Məktubu olduğu kimi təqdim edirik:
Sumqayıt şəhər İcra Hakimiyyətinin başçısı Zakir Fərəcov şəhərimizə rəhbər təyin olunandan sonra "Gənclər şəhəri”nin inkişafını görməmək mümkün deyil. Əzəmətli şəhərimiz günü gündən yeni görkəm alır. Bu yeniliklər zaman zaman Sumqayıtda olub. Ancaq budəfəki yeniliklər tam başqadır. Daha kefiyyətli və gözoxşayan və ən əsası şəhərin gözdən uzaq, könüldən iraq yerlərinin bu diqqətin mərkəzində olması. Hər biri möhtəşəmdir. Məhəllədaxili yollara asfalt çəkilməsi, dam örtüklərinin dəyişdirilməsi, binaların üzlənərək işıqlandırılması, parkların gözəlləşməsi, yeni iş yerlərinin yaradılması Sumqayıta ölkə başçımız cənab İlham Əliyevin diqqət və qayğısının təzahürüdür. Təsadüfi deyil ki, cənab prezident son 2 ildə Sumqayıtın inkişafına və sosial infrastrukturunun yenilənməsinə dövlət büdcəsindən 2 dəfə vəsait ayırdı. Və hər bir məmurun borcudur ki bu vəsaitin təyinatı üzrə xərclənməsinə düzgün nəzarət etsin. Mən şəhərin gənc bir fəalı kimi şəhərimizin abadlaşmasına hədsiz sevinirəm. Sevincim səbəbsiz deyil. Hər gün Bakıya gedib gələn bir sakin kimi Sumqayıtın inkişafının paytaxt səviyyəsinə qalxması və bəzi hallarda Bakını geridə qoyması sevincimə əsas səbəbdir. Lakin istisna hallar da var. Məsələn yaşadığım Qurd dərəsi Saray bağlar massivinin 27 nömrəli marşrut xətti bu inkişaf baxımından çox geri qalır. İnnovasiyalar əsrində rabitənin olmadığı bir yer təsəvvür etmək çətindir. Amma Saray bağlar massivində bu hal yaşanır. Kanalizasiya qovşağının olmaması ilin bütün fəsillərində bütün sakinlərə problem yaşadır. Və ən əsası yollar. Mənim babam Zöhrab Süleymanov Sumqayıtı qurub yaradanlardan biri olub. Məhz Qurd dərəsinin Saray bağlar massivinə də ilk transformatoru o qoyub. 1966-cı ildə bağlara su xəttini çəkən də mənim babam olub. Sadəcə indi o dövr deyil ki bu hadisələr pərakəndə formada cərəyan etsin. Qüdrətli bir dövlətimiz var.  Dövlət büdcəsindən bütün regionların sosial inkişafının sürətləndirilməsinə vəsait ayrılır. Yol problemi, kanalizasiya və rabitə xəttinin yoxluğu bizim bağlarda yaşayışı çətinləşdirir. Bir neçə il əvvələ qədər işıq, qaz, su problemi vardı. Şükürlər olsun ki, bu problem geridə qaldı. Ancaq daha 3 problem sakinlərin gündəlik rahatlığını çətinləşdirir. Mən bir media işçisi, gənc fəal olaraq və ən əsası Sumqayıtı canımdan artıq sevən bir adam kimi icra başçımız Zakir müəllimə müraciət edirəm: Saray bağlar massivininin 27 nömrəli marşrut xəttinin keçdiyi yolu kanalizasiya xəttinin və rabitə xəttinin düzəldilməsinə göstəriş verəsiz. Son 2 ildə icra başçısı necə olmalıdır sayənizdə gördük. Sakinlərin sizə olan ümidi sonsuzdur.
Xeberle.com

 

 

 

 

 

Xəbərdən istifadə edərkən istinad etmək vacibdir.