"Əyri dom” - Bu bina Nəriman Nərimanov küçəsində xüsusi layihə əsasında tikilib. Sumqayıtın ən görkəmli, otaqlarının genişliyi ilə seçilən binası olub. Sonralar bina yarım metr əyildiyi üçün onu hasara alıblar və binanın əvvəlki vəziyyətini qaytarmaq üçün çoxsaylı mütəxəssislər onun üzərində "baş sındırıblar”. Nəticədə qərara gəliblər ki, orada yaşayan əhali köçürülsün, bina isə ya altına dinamitlər qoyularaq partladılsın, ya da xüsusi mexanizm vasitəsilə sökülsün.  Lakin bəziləri Sankt-Peterburqda da bu tipdə əyri binaların olduğunu və oradan mütəxəssis gətirilərsə, bu işin həll ola biləcəyi fikrini irəli sürüb. Mütəxəssis gəlib və müəyyən yoxlamalar apardıqdan sonra binanın əyriliyini düzəltmək üçün altına beton tökülüb.  Buna baxmayaraq müəyyən müddət orada əhalinin yaşaması üçün yarana  biləcək təhlükədən ehtiyat edərək bina hasara alınıb. Sonradan mütəxəssislər şəhər rəhbərliyini əmin edib ki,  binada heç bir problem yaranmayacaq və o, şəhərin ən dözümlü binalarından biri olacaq.

 

 

 

  "14 mərtəbə" - Bu bina Sumqayıtın ilk 14 mərtəbəli binası olub. Əbəs yeri deyil ki, Sumqayıtda bina adı çəkiləndə, ağıla ilk öncə 14 mərtəbə gəlir. Hələ bir vaxtlar bina sakinlərini köçürüb tikilini otel etmək planları da vardı. Sonra nədənsə rəhbərlik bu fikirdən daşındı. Hazırda 14 mərtəbə Sumqayıtda ən gözəl binalardan sayılır.

 

 

 

  "Sülh göyərçini"abidəsi - Sumqayıt şəhərində qeyri-adi memarlıq abidəsi, şəhərin əsas rəmzi hesab olunur. Sumqayıt şəhərinin sülh və əmin-amanlıq şəhəri olmasını simvolizə edir. Abidə 1978-ci ildə dənizkənarı parkda ucaldılıb və betondan tökülüb. Alçaq səthi postament üzərində yerləşdirilən göyərçin heykəli qanadlarını açaraq sanki uçmağa hazırlaşan vəziyyətdə icra olunub. Müəllifləri Sumqayıt şəhərinin rəssamı Vaqif Nəzirov və rəssam-heykəltəraş Asim Quliyevdir. Abidə 2008-ci ilin yanvar ayının 5-də rekonstruksiya edilib. Nəsimi adına Mədəniyyət və İstirahət parkında yerləşən "Sülh göyərçini" abidəsi sumqayıtlıların sevimli istirahət guşəsidir.

 

 

 "8 mərtəbə" - Sumqayıtda tikilən ilk 8 mərtəbəli binadır. Sülh küçəsində, dənizkənarı parkın yaxınlığında - ideal bir yerdə tikilib. Altında uzun illərdir ki, stomatoloji poliklinika fəaliyyət göstərir.

 

 

 "Ulduz abidəsi" -  İkinci dünya müharibəsi iştirakçılarının şərəfinə ucaldılan abidə olub. Üzərindəki beş ulduz müharibə - 1941-45-ci illərin hər bir ilini simvolizə edirdi. Sonrada ərazidə Şəhidlər xiyabanı salındı və beş guşə səkkizguşəli "şəhidlər abidəsi” ilə əvəz olundu. Bir neçə il sonra isə ümumiyyətlə söküldü, yerində yeni - uzunsov bir abidə ucaldıldı. Hələ də sumqayıtlılar bura ''Ulduz''un yanı deyirlər. Bu ərazi də şəhər sakinlərinin sevimli gəzinti yerlərindən sayılır.

 

 

  "Sputnik” - SSRİ dövründə mağazalara rus dilində adlar verirdilər. Sülh küçəsində beş mərtəbəli binanın altında "Sputnik” adında mağaza yerləşdiyi üçün o vaxtdan sumqayıtlılar  bu ərazini "Sputnikin yanı” adlandırıblar. Küçənin bu hissəsində avtomobil saxlanması qadağan edildiyindən ərazidə yerləşən dükan və mağazalar da passivləşib, əvvəlki gücü ilə işləyə bilmir. Amma şəhərin bu hissəsi hələ də sutkanın əsas vaxtlarında insanların ən çox hərəkət etdiyi hissələrdəndir.

 

 

  ''Dejurnıy'' - Növbətçi mağazası. SSRİ dövründə Sumqayıtda ilk ərzaq mağazası idi ki, gecə saat 11-ə qədər işləyirdi. O vaxtlar 24 saat işləyən mağazalar yox idi və gec saatlara qədər oyaq olan insanlar gündəlik qida məhsullarını məhz bu mağazadan əldə edə bilərdilər. İndi də ərazi Sumqayıtın ən gözəl yerlərindən sayılır və bu dairədəki bir neçə tarixi bina şəhərə xüsusi görkəm verir.

 

"Heydər Əliyevin heykəli" - Əvvəllər Sülh küçəsində yerləşən bu heykəl indi orada olmasa da, marşrut avtobusları ilə bu əraziyə gələn hər kəs hələ də sürücüyə: "Babanın heykəlininin yanında saxla” - deyə, müraciət edirlər. Heydər Parkında aparılan abadlıq quruculuq işlərindən sonra heykəl ulu öndərin adını daşıyan parkda qoyuldu.

 

 

 

  "Qağayı” abidəsi - Abidə 1964-cü ildə, Sumqayıtın 15 yaşının olması münasibətilə şəhərin girişində ucaldılıb. Üzərindəki qağayı isə şəhərin dənizlə yaxınlığını göstərir. Memarı Süleyman Hacıyev olan 13 metrlik bu abidə bir neçə dəfə restavrasiya olunub və hazırda 24 blokdan ibarətdir.

 

 

  "Priçal” (Batmış gəmi) – Köhnə sumqayıtlıların ən yaxşı tanıdığı yerlərdən biridir. İnsanlar bura balıq yeməyə, yaxud balıq tutmağa gəlirlər. Hazırda həmin ərazidə gəmilərin saxlanılması üçün liman tikilir. Payız aylarında oradan Novxanıya gəzinti gəmilərinin hərəkəti nəzərdə tutulub.

 

 

  Sizi yalnız köhnə sumqayıtlıların tanıdığı 10 yerlə tanış etdik. Bunlardan əlavə Sumqayıtda bir neçə market də var ki, onların adından avtobus dayanacağı kimi istifadə olunur. Bu hal  hətta şəhərimizə gələn qonaqlarda da təəccüb doğurur.  Bunlara misal olaraq Elmar (Elmarın kruqu), Səməd  və Pioner marketləri göstərmək olar.

Hələlik bu qədər. Xeberle.com olaraq sumqayıtlılar üçün bu tipdə yazılara davam edəcəyik. Bizi oxumağa davam edin