Problemləri özlərindən ağır olan bu sakinlər "Kürdəxanı Türməsi” kimi tanınan Bakı İstintaq Təcridxanasına yaxın ərazidə yaşayırlar.
Söhbət Abşeron rayonu Məmmədli kəndinin bir qrup sakinindən gedir. Kəndin infrastrukturu dəyişərək böyük bir qəsəbəyə çevrilsə də, nədənsə adıçəkilən yaşayış məskəni problemlərdən yaxa qurtara bilməyib: "Çirkab və kanalizasiya suları yol boyunca üzüaşağı axır. Ətraf sanki zibilxanaya bənzəyir. Yollar asfaltlanmadığından yağış yağanda kənddə palçıq əlindən tərpənmək olmur. İndiyədək kənd yollarının abadlaşdırılması üçün yerli icra orqanlarına müraciət etsək də, vəziyyət dəyişmir.
Sakinlərin öz hesablarına çəkdikləri çınqıl yol asfaltlanmadığı üçün dağılıb. Buna görə, onların şəhərə çıxışı çətinləşib. Yol probleminə görə təcili tibbi yardım maşınları belə çağrışa gəlməkdən imtina edirlər. Həmçinin, əraziyə avtobus marşurutu yoxdur. Taksi xidmətindən də yol probleminə görə səmərəli istifadə edə bilmirlər. Heç bir taksi həmin əraziyə gəlmək istəmir. Kanalzasiya ilə bağlı vəziyyət daha acınacaqlıdır. Bütün çirkab sular yaxınlıqdakı kiçik göllərə axıdılır.
Adı çəkilən ərazidə telefon və internet rabitəsinin də olmadığı bildirilir.
Sakinlər deyir ki, problemlərlə bağlı Abşeron Rayon İcra Hakimiyyətinə dəfələrlə müraciət etsələr də nəticəsi olmayıb. İcra hakimiyyəti problemin Avtomobil Yolları Dövlət Agentliyi və "Azərsu” Açıq Səhmdar Cəmiyyəti tərəfindən həll olunmasını bildirib. Adı çəkilən qurumlardan isə səs-səda yoxdur.
Məsələ ilə bağlı Abşeron rayon İcra başçısının Məmmədli kəndi üzrə icra nümayəndəsi Şiraslan Həsənovla əlaqə saxladıq. İcra nümayəndəsi sakinlərin şikayətinə belə aydınlıq gətirdi: "Məmmədli kəndində ümumiyyətlə kanalizasiya xətti çəkilməyib. Hər bir sakinin öz həyətində şambolar var, bundan istifadə edirlər. Proqrama salınıb, mərhələli şəkildə kanalizasiya xətləri çəkiləcək. Gələcəkdə dövlət tərəfindən nə vaxt vəsait ayrılacaq və kanalizasiya xətləri çəkiləcək, onu biz dəqiq bilmirik.
Mərkəzi yollarımız hamısı asfaltdır, ara yollar isə daş, çınqıldır.
2 marşrut xətti var, biri Yanardağdan Əzizbəyov istiqamətində. Digəri isə, Yanardağdan Binəqədi istiqamətində.
Hazırda kəndə rabitə və simsiz xətlərlə internet var. Təzə tikilmiş daha ucqar evlərə də vətəndaşların müraciəti əsasında çəkiləcək.
Kəndin bir hissəsində su 24 saat müddətində fasiləsiz, digər hissəsinə isə vaxtla verilir".
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
