Sumqayıtda yaşayan məcburi köçkün kirayə pulunu ödəyə bilmədiyindən şikayətlənir.
Xeberle.com-un redaksiyasına şikayət məktubu ünvanlayan Cəbrayıl rayonundan məcburi köçkün olan Təranə Nəcəfquliyeva Sumqayıt şəhər 2-ci mikrorayon bina 22/57, mənzil 51 ünvanında 8 aylıq xəstə uşaqla şəraitsiz mənzildə kirayə yaşadıqlarını deyir:
"Övladım anadangəlmə qüsurludur və iki dəfə ağır əməliyyat keçirib. Əməliyyat üçün imkanımız çatmadığı üçün Heydər Əliyev Fonduna müraciət etmişdik və fondun dəstəyi ilə övladım əməliyyat olunub. Bir neçə aydan sonra yenidən əməliyyat keçirməlidir. Yoldaşım fəhləliklə məşğul olur. 200 manat kirayə haqqını da çox çətinliklə ödəyirik. Xəstə uşaqla bu şəraitsiz mənzildə yaşamağa məcburam".
T. Nəcəfquliyeva sosial yardım almaq üçün müraciət etdiklərini qeyd edib: "Övladımın ən azından dərmanlarını ala bilmək üçün sosial yardım düzəltmək istədik. Lazım olan sənədləri toplayıb göndərsəm də, hələ də bir cavab ala bilməmişik. Həm xəstə uşaq, həm də bu şəraitdə kirayədə yaşamaq bizim ailə üçün çox çətindir".
Məsələ ilə bağlı Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondu ilə əlaqə saxladıq. Fondun mətbuat katibi Sevinc Quluzadə Xeberle.com-a vətəndaşın müraciəti ilə bağlı araşdırma aparılıb məlumat veriləcəyini bildirdi.
Xədicə Səxavətqızı
Xəbərdən istifadə edərkən istinad etmək vacibdir.
