Onun 19 yaşı var. Sumqayıt şəhərinddə anadan olub. Sumqayıt şəhər 11 nömrəli orta məktəbi
bitirib. Hazırda "Odlar Yurdu" Universitetinin Ekologiya fakültəsində
II kursda təhsil alır.
Söhbət Xeberle.com informasiya portalının və Sumqayıt
Regional Mədəniyyət İdarəsinin Sumqayıt Dövlət Rəsm Qalereyasının birgə həyata
keçirdiyi "BAX!ş" adlı rəsm sərgisinin qalibi Fidan Həsənlidən gedir.
O, sərgidə "Arzuolunmaz görüş" adlı əsərlə iştirak edib və sosial şəbəkə
izləyicilərinin əksəriyyətinin səsini qazanaraq qalib olub.
Fidan Həsənli deyir ki, rəssamlıq sənətinə onda kiçik yaşlarından maraq yaranıb. Elə bu maraq Fidanı Sumqayıt Dövlət Rəsm Qalereyasına gətirib. Qalereyada
müxtəlif illərdə keçirilən bir sira sərgilərdə
iştirak edib. Xanım Həsənlinin ilk uğuru
hələ 9 yaşı olandan başlayıb. Həsənli 2010-cu ildə 1 İyun Uşaqların Beynəlxalq Müdafiəsi gününə
həsr olunmuş sərgidə öz əsəri ilə çıxış edib.
Bir il sonra isə onun çəkdiyi rəsm
Novruz Bayramına həsr olunmuş "Yurdumuza Bahar gəlir" adlı sərgini bəzəyib.
2013-cü ildə yay mövsümü ilə əlaqədar keçirilən sərgidə öz məharətini göstərib.
2019-cu ildə isə Sumqayıt şəhərinin 70
illiyinə həsr olunmuş sərgidə çıxış edib.
Fidan yalnız rəssamlığa maraq göstərmir, o eyni zamanda dekorativ tətbiqi
sənət üzrə də fəaliyyətini davam
etdirir.
Həsənli deyir ki, hiss etdiyi duyğuları sözlə ifadə etməyə gərək
yoxdur: "Çünki bunu zatən rəsmlərim ilə təsvir edirəm. Ümumiyyətlə, hisslərini
sözlə ifadə etməyi sevən bir insan olmamışam. Bəlkə də elə bu qapalı xasiyyətimə
görə rəssamlıq məni seçib. Amma onu deyim ki , yaradıcılıq prosesi mənim üçün
heç vaxt bəzilərinin xəyalındakı kimi "rəsm çəkirəm, həmişə zövq alıram və
dincəlirəm" şəklində olmayıb".
19 yaşlı Fidan rəssamlığın ilk növbədə ruhda olduğunu düşünənlərdəndir:
"İstedadlı, lakin təhsilin olmasa belə sənətin əsas qayda-qanunlarını öyrənmək vacibdir. Pablo Pikasso demişkən:
"Öncə qaydaları professional kimi öyrənin, sonra onları bir sənətçi
kimi qırın".
Klassiklərin əsərlərindən çox şey öyrəndiyini bildirən gənc rəssam
hələ sənət yolunda öz üzərində çox çalışmalı olduğunu vurğulayır.
Onun rəssamlıqla bağlı maraqlı fikirləri var: "Məncə, rəssamın
üzərinə düşən ən böyük iş öz dövrünün fəlsəfəsini tapmaqdır. İşlədiyi janrdan
asılı olmayaraq onu öz yaradıcılığında əks etdirən rəssam həmişə yadda qalır.
Tarixə nəzər yetirsək görərik ki, kim ki, dövrünün fəlsəfəsini əks etdirir,
onlar daha çox xatırlanır”.
F. Həsənlinin
böyük arzuları da var. O, beynəlxalq müsabiqələrdə Azərbaycanı təmsil etmək və
vətənə qalib olaraq dönməyi xəyal edir.
Xeberle.com
Xəbərdən istifadə edərkən istinad etmək vacibdir.
