Sentyabrın 27-də başlayan Vətən Müharibəsində şəhidlik zirvəsinə
ucalan qəhrəmanlardan biri də Xızı rayonunun Xələnc kənd sakini, 25
yaşlı kəşfiyyatçı gizir Natiq Əlimurad oğlu Verdiyevdir.
O, 5 fevral 1995-ci ildə Xızı rayonu
Xələnc kəndində anadan olub. 1 sentyabr 2001-ci ildə 9 illik Xızı rayon
Xələnc kənd məktəbində təhsil almağa başlayıb. 2010-cu ildə həmin
məktəbi bitirərək Sumqayıt Texniki Kollecində "Kompüter şəbəkələrinin və
hesablama texnikasının təmiri və servis xidməti" ixtisası üzrə
təhsilini davam etdirib. 2013-cü ildə təhsilini bitirərək Tərtərdə N
saylı hərbi hissədə həqiqi hərbi xidmətə başlayıb. 2015-ci ilin yanvar
ayında hərbi xidmətini başa vurub. 2016-cı ilin Aprel döyüşləri zamanı
könüllü olaraq orduya qoşulmaq qərarına gəlib və Bakıda 3 ay kurs
keçərək xidmətə başlayıb. Xüsusi Təyinatlı kəşfiyyat bölüyündə hərbi
xidmətini davam etdirib.
Bu il sentyabrın 27-də döyüş yoldaşları ilə birlikdə işğaldan azad
olunan Murov yüksəkliyinə bayrağımızı azan sədaları altında sancaraq,
xalqımıza ilk qələbə sevincini yaşadıb. Natiq çətin şərtlərdə, soyuq
havada 3 gün ac-susuz qalaraq bayrağı müdafiə edib və bayrağın müdafiəsi
uğrunda gedən döyüşlərdə oktyabrın 1-də qəhrəmancasına şəhid olub.
O, Vətən torpaqlarını azad, bütöv görmək istəyirdi. Elə bu amal
uğrunda da şəhidlik zirvəsinə ucaldı. Vətən Müharibəsində Xələnc
kəndinin ilk şəhidi olan Natiqin atası Əlimurad Verdiyev oğlunun uşaq
vaxtlarından hərbiyə maraq göstərdiyini və arzusuna çatdığını deyir:
"Şəhid olana qədər döyüşlər vaxtı onun harada olmasından xəbərimiz
olmamışdır. Şəxsən onunla danışa da bilmirdim. Soruşa da bilmirdim.
Hərbi sirr kimi yerini deyə bilmirdilər. Ancaq sonradan bildik ki o,
Murov yüksəkliyi uğrunda gedən döyüşlərdə şəhid olub. Çox səmimi idi,
mehriban idi, qayğıkeş idi. Ürəklərə yol tapardı. Eyni sözləri də orda
deyirlər ki, hamı ilə yaxşı ünsiyyət qururdu”.
Vətən borcunu öz canından üstün tutan balasının yoxluğuna hələ də
inanmayan bir ana var bu evdə... Səyyarə ana... Anası Səyyarə xanımla
hər dəfə danışanda "ağlama, başını dik tut, biz Vətən borcunu yerinə
yetirməyə gəlmişik” deyirmış şəhidimiz: "Ağlayırdım, dedi, ağlama. 28-i
bir dəfə zəng vurub deyib. Uşaqlar axtarmışdı onu ki, mama pisdir.
Danışdı, dedi, ağlama. Az qalıb gəlirəm. Ancaq deyirdi televizora bax,
yaxşı şeylər deyəcəklər. Fəxr duyuram oğlumla, qürur duyuram. Çünki öz
istədiyi yolu idi, öz istədiyi peşə idi, öz istədiyi iş idi. Amma ana
olaraq çətindir mənim üçün”.
25 yaşlı kəşfiyyatçı gizir oktyabrın 3-də Xələnc kənd
qəbiristanlığında dəfn edilib. Xidmət etdiyi müddətdə bir sıra fəxri
fərmanlarla mükafatlandırılan Natiq Verdiyev ölümündən sonra "Vətən
uğrunda” və "Suqovuşanın azad edilməsinə görə” medalları ilə təltif
edilib.
Xəbərdən istifadə edərkən istinad etmək vacibdir.
