Nicat Nəbiyev 16 dekabr 2000-ci ildə Sumqayıt şəhərində anadan olub. Orta təhsilini Sumqayıt şəhərindəki 39 nömrəli orta məktəbdə alıb. Təhsilini peşə məktəbində davam etdirən Nicat "Avtomobil istismarı” ixtisasını bitirib.

2019-cu ilin iyun ayında hərbi xidmətə yollanıb. Goranboydan Ağdama kimi xidmət yolu keçib. Sentyabrın 27-də hərbi əməliyyatlar başlayandan ön cəbhədə olub. Oktyabrın 1-də minamyot qəlpəsindən şəhidlik zirvəsinə ucalıb.

Anası Əfsanə Əbülfətova oğlu haqqında bunları deyir: "Nicat 11 yaşından işləyib, həmişə ailəyə kömək etməyə çalışıb. Nicatdan başqa daha bir oğlum var. Mütəmadi telefonla danışırdıq. Ötən ilin yanvarında isə son görüşümüz olub”.

Şəhid anası Nicatla son danışığını belə xatırlayır: "Oktyabrın 1-də danışdım. Çox sakit tərzdə danışırdı və vəziyyətin yaxşı olduğunu deyirdi. Sanki həmin günü şəhid olacağını bilirmiş. Mənimlə danışandan bir neçə saat sonra düşmənin atdığı minamyot atışı nəticəsində alın hissəsindən qəlpə yarası alıb. Ağır yaralanan Nicat yerindəcə keçinərək şəhid olub".

Ə. Əbülfətova hələ Nicatın 5 yaşı olanda həyat yoldaşından ayrılıb. Ana Nicatı və qardaşı 3 yaşlı Samiri o vaxtdan tək böyüdüb: "Mən onları çox çətinliklərlə böyütdüm. Lakin bütün çətinliklərə baxmayaraq Nicatın ürəyində mərhəmət hissi, insanlara qayğı, kömək və yardım etmək duyğusu daha çox idi. Mən onunla ana bala deyil, dost, ən yaxın rəfiqəm kimi idim. Bütün sirrimi, sözümü onunla paylaşırdım, o da həmçinin mənimlə. Lakin döyüşdən, hərbi xidmətindən heç bir sirrini, çətinliyini mənimlə paylaşmazdı. Elə hər danışanda deyirdi, hər şey çox yaxşıdır. Uşaqlıq dostu Orxana deyərdi problemlərini, çətinliklərini. O da sağolsun, heç vaxt Nicatın istəklərinə laqeyd, biganə yanaşmayıb. Hətta Nicat döyüşlərə qatılan zaman mənə nəsə olsa dostum Orxana zəng etsəniz kifayət edər deyib və onun nömrəsini vermişdi”.

Ölümü ilə ölümsüzlük qazanan qəhrəman gənclər bu gün təkcə ailəsi deyil, onu tanıyan hər kəs qürur duyur.

Əfsanə Əbülfətovanın sözlərinə görə, şəhid oğluna görə, birdəfəlik ödəniləcək müavinət və aylıq sosial yardımlar təyin olunub. Bundan sonra ata və ana arasında mübahisə yaranıb. Nicatın atası Ramil dövlət tərəfindən veriləcək ödənişlərdən də ona da verilməli olduğunu tələb edib: "İki uşağa cəmi 80 manat aliment verən ata, onu da heç vaxt vaxtlı- vaxtında ödəməyib, qalmışdım məhkəmələrin yolunda. Uşaqların heç bir işində dəstək olmayıb, lakin Nicat şəhid olandan sonra ortaya çıxıb. Mən indi bilmirəm balamın dərdinə yanım, yoxsa atanın mənimlə pul davasına. Bildiyiniz kimi, ölkə başçısı şəhid və qazi ailələrinə xüsusi diqqət və qayğı göstərir. Bizə birdəfəlik ödəniləcək müavinətlər və aylıq sosial yardımlar təyin olunub. Uşaqlarının heç bir işində iştrak edib, qayğı və problemləri ilə maraqlanmayan ata mənimlə bu pulların davasını edir. Hər yerə müraciət edərək, mən şəhid atasıyam deyir. Hüquqşünaslarla danışıqlar aparıb, lazımi məhkəmə sənədlərini təqdim etmişəm. Hüquqşünaslarımız da sağolsunlar bu işlə yaxından maraqlanır, əllərindən gələn köməkliyi edirlər”.

Şəhidin adının belə məsələlərdə hallanmasını istəməzdik, amma ananın istəklərini nəzərə alaraq deyə bu məsələni də qeyd edəsi olduq. Hər halda şəhid Vətən uğrunda canını fəda edib, heç bir maddiyatı düşünmədən belə...

Xədicə Səxavətqızı