Sumqayıt şəhərindən iki qardaş – Sərxan və İlham ... Vətəni canlarından artıq sevən, Vətən yolunda canlarından keçməyə hazır olan iki qardaş...
Torpaqlarımızın bir hissəsi işğal edildiyindən hər ikisi vətən, torpaq həsrətində olub. Tovuz döyüşlərindən sonra hər ikisi könüllü olaraq ordumuzun sıralarına yazılıblar. 2021-ci il yanvar ayının 16-da 23 yaşı tamam olacaqdı Sərxanın.
Sərxan Əliyev Aprel döyüşləri zamanı hərbi xidmətdə olub və həmin vaxt düşmənin növbəti təxribatlarınin qarşının alınmasında iştrak edib. Ayağından zədə alsa da, bir an belə olsun geri çəkilmək barədə düşünməyib.
Sentyabr ayının 27- dən isə qardaşı İlham Əliyevlə birlikdə vətənin azadlığı uğrunda döyüşlərə qatılıb. Ayrı-ayrı istiqamətlərdə döyüşlərdə olan qardaşların bu müddət ərzində bir-biri ilə əlaqəsi olmayıb, yalnız ailə ilə danışdıqda bir-birlərindən xəbər tutarmışlar.
Qəhərmanların anası Esmira Pərvanəliyeva deyir ki, Sərxan heç vaxt mənə yad nömrədən zəng etməzdi, atasına zəng edirdi və imkan olduqda mənimlə də danışardı: "Lakin şəhid olmamışdan iki gün qabaq mənim nömrəmə zəng etdi, evdə hamı ilə tək-tək danışdı."
Esmira xanım bildirir ki, narahat qaldım, axı Sərxan heç vaxt mənə yad nömrədən zəng etməzdi, yəqin nə isə olacaq. Elə həmin gündən iki gün sonra, oktyabr ayının 8- də Horadiz istiqamətin gedən döyüşlər zamanı Sərxan şəhid olub. Qardaşı İlham isə bu zamanlarda qaynar döyüşlərdə idi. Bir müddət sonra isə İlham Füzuli uğrunda gedən döyüşlərdə ayağından ağır yaralanaraq hospitala yerləşdirilib. Hazırda vəziyyəti kafi qiymətləndirilir.
Əliyev Sərxan İslam oğlu 16 yanvar 1998-ci ildə Sumqayıtda anadan olub. Ailədə 3 qardaş olublar. Sumqayıt şəhər 13 saylı orta məktəbi bitirdikdən sonra Goranboy rayon N saylı hərbi hissədə hərbi xidmətdə olub. Snayperçi olan Sərxan sərrast atıcı kimi tanınıb. 44 günlük müharibədə öz qorxmazlığı və rəşadəti ilə tanınan Sərxan ölümündən sonra "Vətən uğrunda" və "Füzulinin azad olunması uğrunda" medalları ilə təltif olunub.
Şəhid olmağı arzu edən Sərxan Əliyev həqiqətən də, öz istəyinə çatıb, ən yüksək zirvəyə - şəhidlik zirvəsinə yüksəlib...
Şəhidlərimiz Vətənini sevdi. Bu sevgi müqəddəs sevgidir. Bu sevgi sipərə dönən sinədir, bu sevgi Vətən yolunda qurban verilən "can"dır.
Şəhidlər ölməz, yaddaşlarda, əqidələrdə yaşayarlar. İllər keçsə də, unudulmaz, daim anılarlar. Şəhidlər torpağa deyil, ürəklərə tapşırılan sevgidir. Biz azadlığımızın, istiqlalımızın carçısı olan şəhidləri ən səmimi hiss və duyğularla anırıq!
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
