"Gecələr səksəkə içində yatırıq. Qorxuruq ki, panellər başımıza uçsun''
Bu sözləri Xeberle.com-a Sumqayıt şəhər Haci Zeynalabdin qəsəbəsi, "Xəzri" yaşayış massivinin bir qrup sakini deyib. "Sexlərin altı" adlanan ərazidə gecəqondularda yaşayanlar bildiriblər ki, onlara ərazini tərk etmək barədə bildirişlər verilib: "Vəziyyətimizlə maraqlanan yoxdur, yaxınlıqda olan panellər hər an başımız uça bilər. 40 ildir bu gecə qondularda yaşayan 25-30 ailə imkansızlıqdan bu şəraitdə yaşamağa məcburdur. Lakin Fövqaladə Hallar Nazirliyindən bizim yaşadığımız əraziləri tərk etməyimiz bildirilib. Şəhər İcra hakimiyyəti də bizimlə maraqlanmır. Bu yaxınlarda yaranan səs - küydən bütün ailələr narahat olub, sanki yaxınlıqda mərmi partladı. Sexin panelləri qopub başımıza tökülür. 1968-ci ildən burada yaşayan ailələr var. İmkanı olan heç bir insan bu şəraitdə yaşamaz. Bizə bildirilir ki, ərazini tərk edin. Soyuqda, yağışda hara çıxaq axı? Vəziyyət isə günü -gündən daha təhlükəli hal alır.”
Sumqayıt şəhər İcra Hakimiyyəti Başçısının 1 saylı ərazi üzrə icra nümayəndəsinin müavini Vasif Qəhrəmanov Xeberle.com-a bildirilib ki, sözügedən əraziyə baxış keçirilib: "Fövqəladə Hallar Komissiyasının üzvləri gedib yerində baxıb, qiymət veriblər. Sakinlərə burada yaşamaqlarının təhlükəli olması barədə bildiriş verilib. Onlara ərazini tərk etmələri deyilməyib. Şəhər rəhbərliyi də həmin ailələrin yerləşdirilməsi ilə bağlı müvafiq tədbirlər həyata keçirməyi düşünür. Onları heç kəs evlərindən məcbur çıxarda bilməz. Lakin orada yaşamaqları da təhlükəlidir".
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
