Bildiyiniz kimi, 2022-ci ildə ali təhsil müəssisələrinə qəbul imtahanları başa çatıb.
Xeberle.com-un məlumatına görə ixtisas qrupları üzrə keçirilən imtahanda (blok imtahanı) Sumqayıtdan 10 abituriyent maksimal nəticə - 400 bal toplayıb. Onlardan biri də "İstedad” liseyinin məzunu Nihad Əliyevdir. Nihadla əlaqə saxlayaraq uğurlu nəticəsi barədə söhbətləşdik.
"İmtahana girəndə özümə güvənirdim, ilk imtahanda da, ikincidə də təxminən 1,5 saata bütün sualları cavablandırmışdım. 2-3 dəfə yenidən yoxladım. Cavablar çıxanda gözlədiyim nəticə olsa da, rəsmi cavabın öz yeri var deyə, sevindim".
Bunu müsabiqədə I ixtisas qrupu üzrə ali məktəblərə qəbul imtahanında ən yüksək nəticə göstərərək 400 bal toplayan Sumqayıt şəhər İstedad liseyinin məzunu Əliyev Nihad Elməddin oğlu deyib.
"Yaxşı nəticə göstərməyim gərgin əməyimin bəhrəsidir. Məzunlara tövsiyəm o olacaq ki, öz üzərlərində işləsinlər, amma həddən artıq çox işləmək də doğru deyil. Çünki müəyyən yerdən sonra çox oxuyanda əvvəl oxuduqların yaddan çıxa bilir, əsas zamanı düz planlaşdırıb, səylə çalışmaqdır. Valideynlərim də hər zaman mənə inanır, dəstək olublar. Onlar tərəfinən ali məktəbə qəbulla bağlı zərrə qədər də təzyiq, yaxud narazılıq hiss etmədim. Ən önəmlisi isə, özünə inamı itirməməkdir.”
Nihadın anası Məşiyeva Cəmilə də övladının yüksək nəticə əldə edəcəyinə inandıqlarını bildirib.
"Nihad ibtidai sinifdən əla qiymətlərlə oxuyub, öz üzərində həmişə çalışıb. 9-cu sinifin buraxılış imtahanında da yaxşı nəticə əldə etmişdi. Biz ona əvvəldən inanırdıq, özü də maksimum nəticə toplayacağına inanırdı. Biz valideynləri həmişə ona dəstək olmuşuq", - deyə C.Məşiyeva bildirib.
Qeyd edək ki, N.Əliyev 11-ci sinfin buraxılış imtahanında 257.5 bal yığıb. Nihad Bakı Ali Neft Məktəbinin kimya və neft qaz mühəndisliyi ixtisası üzrə təhsilini davam etdirmək niyyətindədir.
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
