Sumqayıt şəhərində 9 nömrəli məktəbin müəllimi, Azərbaycan Jurnalistlər Birliyinin üzvü, media mənsubu Vüqar Abdullayevin evindən oğurluq hadisəsi baş verib. Hadisə Yaşıldərə yaşayış massivi, 2-ci məhəllə, Ziba Əliyeva 28 ünvanında qeydə alınıb. Xeberle.com-a müraciət edən V.Abdullayev başına gələn hadisənin təfərrüatını danışıb. O qeyd edib ki, oğurluq hadisəsi 14 fevral tarixində, saat 15:15 radələrində baş verib. Mənzildən 15 min manat dəyərində qızıl-zinnət əşyaları, 7000 civarında pul oğurlanıb:
"28 ildən sonra bu mənzili kreditlə almışam. Övladım Vətən müharibəsinin iştirakçısıdır. Evimizdə oğurluq düşünülmüş şəkildə - planlı olub. Oğurluqdan əvvəl qayınanam rəhmətə getmişdi. Mənzildən 15 min manatlıq qızıl-zinnət əşyaları aparılıb. 4100 manat mərasim-hüzür dəftərinin içindən və 2500 manat oğlumun dolabından pul götürülüb. Oğurluq olmamışdan öncə hər gün məni güdüblər. 3-cü gündən öncə evimizin yaxınlığında arıq uzun oğlan gördüm. Uzaqdan gələndə onu sezdim. Mən yaxınlaşanda ərazidən uzaqlaşdı. Darvazaya çatanda gözücü məni aşağıdan yuxarı süzdü. Növbəti gün isə oğurluq hadisəsi baş verdi. Qonşunun həyətindən nərdivan qoyulub və həyətimizə keçid ediblər. Maraqlıdır ki, oğurluq baş verən zaman iki qonşunun da heç biri görməyib. Bıçaqla açıb giriblər. Oğurluq planlı şəkildə həyata keçirilib. Bir nəfər də evimizin yanında yerləşən marketin yanında gözləyib ki, kimsə gəlsə, xəbər versin. Mən qapıdan evə girən kimi tez onlara xəbər verilib. Necə tələsiblərsə, bıçağı da taxtın üzərində unudublar. İçəri girəndə şoka düşdüm. Hər yer dağınıq vəziyyətdə idi. Tez polisə zəng edib məlumat verdim. Sağ olsunlar, operativ şəkildə reaksiya verdilər. Hazırda istintaq aparılır”.
Oğurluq baş verən evdən fotoları təqdim edirik:
Elşən Yəhyayev
Xəbərdən istifadə edərkən istinad etmək vacibdir.
