Sosial şəbəkələrdə Sumqayıtlı əsgərin şəhid olması barədə xəbərlər yayılıb. Hacı Zeynalabdin  qəsəbəsindən iyul ayında hərbi xidmətə yollanan Yusif Həşimov 2 gün öncə dünyasını dəyişib. Lakin Yusifin təsadüfən ölməsi, yaxud şəhid olması ilə bağlı müfəssəl məlumat olmayıb.
Artıq Müdafiə Nazirliyi onun ölümü ilə bağlı rəsmi açıqlama yayıb. Xeberle.com məlumatı olduğu kimi diqqətinizə çatdırır.
Müdafiə Nazirliyinin mətbuat xidmətindən bildirilib ki, hərbi qulluqçumuzun kəşfiyyat-diversiya nəticəsində şəhid olması barədə sosial şəbəkələrdə yayılan xəbərlər həqiqəti əks etdirmir. "Bir daha bildiririk ki, bölmələrimiz kəşfiyyat-diversiya fəaliyyəti həyata keçirməyib və şəhid verməyib. Təəssüflə qeyd edirik ki, Azərbaycan-Ermənistan dövlət sərhədinin Tovuz rayonu istiqamətində yerləşən hərbi hissələrdən birində Silahlı Qüvvələrimizin hərbi qulluqçusu əsgər Həşimov Yusif Yunis oğlu oktyabrın 20-də səhər saatlarında qeyri-döyüş şəraitində həlak olub”, məlumatda qeyd olunur.
 
Müdafiə Nazirliyi bildirir ki, hadisə ilə bağlı Hərbi Prokurorluq tərəfindən cinayət işi başlanıb və ölüm faktının baş verməsi səbəbləri araşdırılır: "Bir daha xatırladaq ki, ordumuzla bağlı həqiqətə uyğun olmayan məlumatların dəqiqləşdirilmədən sosial şəbəkələr vasitəsilə yayılması bilavasitə düşmənin maraqlarına xidmət edir”.

P.S. Yusif Həşimov hərbi xidmətə çağırılmamışdan öncə facebook sosial şəbəkəsində son statusunu yazıb. Maraqlıdır ki, gənc özünü də xidmətə getməsi ilə əlaqədar bədbin status yazıb.