Sumqayıt şəhər Məhəmməd Füzuli adına 15 saylı tam orta məktəbə övladlarını dərsə aparan valideynlər xoşagəlməz halla qarşılaşıblar.

Xeberle.com-a həmin məktəbin valideynləri tərəfindən verilən məlumata görə, hadisə bu gün, saat 08:10 radələrində baş verib. Belə ki, sözügedən məktəbin həyətinə daxil olan valideynlərə içkili vəziyyətdə olan orta yaşlı bir kişi hədə-qorxu gəlməyə başlayıb və qarşı tərəfdən reaksiya gəlmədiyini görərək araq şüşəsini onların qabağında yerə çırpıb.

Məsələ ilə bağlı Sumqayıt şəhər 15 saylı tam orta məktəbin direktoru Elmira Yaqubova ilə əlaqə saxladıq. E.Yaqubova hadisənin məktəbin həyətində baş vermədiyini bildirdi: "Həmin valideynlər nəyə görə uşaqlarını məktəbə qoyub hasardan kənarda söhbət edirlər ki, küçədən gedən kimsə də onlara nəsə etsin. Bizdə mühafizə xidməti olmasa da, işçilərimiz mühafizə işi ilə məşğul olurlar.Əgər öhdəsindən gələ bilmədiyimiz hər hansı bir hadisə baş verərsə, biz 102 polis xidməti ilə əlaqə saxlayır və ya sahə müvəkkilinə müraciət edirik. Bunu hamı bilir ki, məktəbin həyətyanı sahəsi hasara alınmamışdı. Mən öz şəxsi vəsaitimlə, qardaşlarımın köməyi ilə sənədləşdirmə işləri apararaq məktəbə hasar çəkdirdim. Bu gün baş verən hadisə isə məktəbin həyətində deyil, hasardan kənarda baş verib”.

Elnarə Salamova

Xeberle.com