Sumqayıt Şəhər Polis İdarəsinin əməkdaşlarının xüsusi karantin rejimi ilə əlaqədar keçirdikləri nəzarət-profilaktik tədbirlər zamanı aktiv koronavirus xəstəsi şəhər ərazisində yerləşən restoranlardan birində keçirilən toy mərasimində iştirak etmək istəyən zaman onun qarşısı alınıb.
Xeberle.com-un məlumatına görə, toyda iştirak edən digər şəxslərin həyatını təhlükə altına qoyan Ağcabədi rayonu Təzəkənd sakini 1996-cı il təvəllüdlü Ehtiram Qasımovun COVID-19 testinin nəticəsi pozitiv olduğu üçün ona ev şəraitində müalicə təyin edilib, sanitar-karantin qaydaları izah olunub. Lakin o, qaydaları pozaraq yaşadığı ünvanı tərk edib və infeksiyanın yayılmasına şərait yaradıb. Həmin şəxs Sumqayıtda yerləşən "Park Palace" restoranına daxil olarkən polis əməkdaşları tərəfindən saxlanılıb.
E. Qasımov barəsində Sumqayıt Şəhər Polis İdarəsində araşdırma aparılır.
Qeyd edək ki, 25 yaşlı gənc Sumqayıta əmisi qızının toy mərasimində iştirak etmək üçün gəlibmiş.
Xəbərdən istifadə edərkən istinad etmək vacibdir.
