Ədliyyə Nazirliyi ötən gün vəfat edən ehtiyatda olan polkovnik-leytenant Şahmurad Məmmədovun ölümü ilə bağlı məlumat yayıb.
Xeberle.com xəbər verir ki, bu barədə Ədliyyə Nazirliyinin İnsan hüquqları və ictimaiyyətlə əlaqələr İdarəsinin rəisi Aynur Sabitova feysbuk hesabında məlumat yayıb.
Onun sözlərinə görə, iyulun 7-də vətəndaş Şahmurad Məmmədov borclu olduğu məhkəmə qərarının icrası işi ilə bağlı Sumqayıt şəhəri İcra İdarəsində olarkən qəflətən halı pisləşərək dünyasını dəyişib:
"İdarənin əməkdaşları tərəfindən dərhal təcili tibbi yardım briqadası çağırılıb, habelə ona ilkin tibbi yardım göstərilib. Lakin buna baxmayaraq ürək xəstəliyindən əziyyət çəkən Ş.Məmmədovun həyatını xilas etmək mümkün olmayıb.
Baş vermiş qəfləti ölümlə əlaqədar Sumqayıt şəhər prokurorluğuna dərhal məlumat verilib və müvafiq araşdırma aparılır.
Bildirilir ki, məhkəmə qərarına əsasən Ş.Məmmədovun borcla bağlı ödənişi onun təqaüdünün (1.043 manat) cəmi 25 faizinə yönəldilib.
Ş.Məmmədov özü hərbçi olub, 1-ci Qarabağ müharibəsində iştirak edib”.
Qeyd edək ki, Sumqayıt şəhər məhkəməsinin KİV-lə əlaqələr üzrə məsul hakimi Azər İsmayılov bildirib ki, ehtiyatda olan polkovnik-leytenant Şahmurad Məmmədov Sumqayıt şəhər məhkəməsində deyil, Sumqayıt şəhər İcra Şöbəsində vəfat edib. Belə ki, mərhum pensiya kartındakı 100 manatı çıxarmağa gedəndə kartın bloklandığını görüb. Daha sonra məlum olub ki, kredit borcu ilə əlaqədar məhkəmə qərarına görə onun kartı bloklanıb. Buna etiraz olaraq İcra Şöbəsinə gedib və orada ürəyi partlayaraq ölüb.
Xəbərdən istifadə edərkən istinad etmək vacibdir.
