Sumqayıt şəhər Gənclər və İdman Baş İdarəsinin təşkilatçılığı ilə "N” saylı hərbi hissədə "Şahin” hərbi-idman oyununun şəhər birinciliyinin final turu keçirilib.
Xeberle.com xəbər verir ki, əvvəlcə Azərbaycan Respublikasının dövlət himni səsləndirilmiş, ölkəmizin ərazi bütövlüyü uğrunda canından keçmiş şəhidlərimizin əziz xatirəsi bir dəqiqəlik sükutla yad edilib.
Tədbirdə çıxış edənlər Sumqayıt şəhər Gənclər və İdman Baş İdarəsinin rəis müavini Rüfət Mahmudzadə, "N” saylı hərbi hissənin zabiti Rüstəm Məmmədov və Abşeron-Xızı Regional Təhsil İdarəsinin nümayəndəsi Oqtay Quliyev Ali Baş Komandan cənab İlham Əliyevin rəhbərliyi ilə rəşadətli ordumuzun 44 günlük Vətən müharibəsində əldə etdiyi şanlı qələbəsindən, gənc nəslin ordu sıralarına hazırlığında və vətənpərvərlik ruhunda tərbiyə olunmasında "Şahin” hərbi-idman oyununun müstəsna əhəmiyyətindən danışmışlar.
Daha sonra "Şahinlər” müxtəlif sınaq mərhələlərindən keçməklə öz bacarıqlarını nümayiş etdirmişlər. Yarışın yekun nəticələrinə əsasən, Təbiət Elmləri Təmayüllü Gimnaziya I, 4 saylı tam orta məktəb II, Texniki və Təbiət Elmləri Liseyi isə III yerə layiq görülmüşdür. Qalib komandalar fəxri fərmanlarla təltif edilmişdir.
Qeyd edək ki, şəhər birinciliyində qalib gələn komanda oyunların zona mərhələsində iştirak etmək hüququ qazanmışdır.
Xəbərdən istifadə edərkən istinad etmək vacibdir.
