Mehdi Hüseynzadə adına Sumqayıt şəhər stadionu şəhərin eyniadlı komandasının ixtiyarına verilməyəcək. Dünən dövlət başçısı İlham Əliyevin aparılan yenidənqurma işləri ilə tanış olduğu idman qurğusu bir müddət futbolsuz qalacaq.
1500 azarkeş tutumu olan "Kapital Bank Arena”ya sığınan "Sumqayıt” yola burada davam edəcək. Şəhər İcra Hakimiyyəti balansında olan əsas arena üçün yüksək icarə haqqı tələbi irəli sürdüyündən klub indiyə qədər oynadığı meydanın xidmətindən yararlanacaq.
Əslində, söhbət heç də icarə haqqında deyil. Stadion qüsurlu olduğundan "kimyaçılar”ın oyunlarının burada keçirilməməsi belə pərdələnir. Stadionun təmtəraqlı açılışının keçirilməməsinin səbəbi də budur. Yenidən qurulan arenanın işıqlandırma sistemində problemlər var, inzibati otaqlar, paltardəyişmə yerləri, hamam plansız hazırlanıb.
Bütün bunlar Mehdi Hüseynzadə adına stadionda çempionat oyunlarının təşkilinə əngəl yaradır. Xüsusilə gecə saatlarında burada matç keçirilməsi mümkünsüzdü.
Bizdə olan bilgi bundan ibarətdir. Həm "Sumqayıt” klubunun, həm də stadion rəhbərliyinin mövqeyini işıqlandırmağa hazırıq.
Xatırladaq ki, yenidən qurulan stadionun tamaşaçı tutumu 9502 nəfərdir. İdman qurğusunun ərazisi 6,8 hektardır. 22 sektordan ibarət stadionda 545 nəfərlik VİP və KİV tribunası da yaradılıb, ərazi abadlaşdırılıb, yaşıllıq zonaları salınıb. Tikilialtı sahədə cüdo, boks və karate zalları fəaliyyət göstərəcək. Burada, eyni zamanda, 2 trenajor otağı, 40 nəfərlik konfrans zalı, inzibati otaqlar, jurnalistlər, hakim, həkim, şərhçilər, məşqçilər üçün otaqlar və digər texniki-köməkçi otaqlar var.(Futbolinfo.az )

Xəbərdən istifadə edərkən istinad etmək vacibdir.