Mayın 1-dən 3-dək İtaliyanın Verona şəhərində döyüş növləri üzrə dünya çempionatı keçirilib.
Xeberle.com-un məlumatına görə, çempionatda budo döyüş növləri üzrə Azərbaycan milli komandası da iştirak edib. Mundialda Azərbaycan Budo Döyüş Növləri Federasiyasının prezidenti Mahir Əhmədovun rəhbərliyi altında 15 idmançımız birincilik uğrunda mübarizə aparıb. İdmançılarımız Free kontakt, S-1, full-kontakt və əlbəyaxa döyüş növləri üzrə yarışıblar.Çempionatda, ümumilikdə, 20 döyüş növü üzrə yarışlar keçirilib.
Yarışlarda iştirak edən Ayxan Süleymanov 50 kq çəki dərəcəsində Free fayt ve full kontakt versiyası üzrə bütün rəqiblərini məğlub edərək İkiqat Dünya çempionu adını qazanıb. Qeyd edək ki, A. Süleymanov Sumqayıt şəhərinin yetirməsidir və 14 saylı orta məktəbin 8-ci sinif şagirdidir. Məlumat üçün bildirək ki, A. Süleymanov Budo Döyüş Növləri Federasiyasının vitse-prezidenti, Kikboksinq, K-1, Mau tay, Büdo döyüş növləri üzrə müxtəlif çempionatların qalibi, 5 dəfə Avropa, 7 dəfə isə Dünya çempionu Emin Süleymanovun oğludur.
Sumqayıt idmançısı 30 kq çəki dərəcəsində mübarizə aparan Saday Qasımzadə isə full kontakt versiyası üzrə fəxri kürsünün ən yüksək pilləsinə yüksəlib. Xatırladaq ki, ötən ilin iyul ayında Sadayın Dünya kubokunun qalibi olması təkcə ölkəmizin yox, Türkiyə mətbuatının da diqqətini cəlb etmişdi. Bundan başqa 8 yaşlı azərbaycanlı vunderkind Ukraynanın  Lvov şəhərində keçirilən dünya çempionatından  da vətənə qızıl medal gətirmişdi.Məlumat üçün bildirək ki, Sadayın məşqçisi qaydasız döyüş növü üzrə idmançı olan əmisi Natiq Qasımzadədir.  
91 kq çəki dərəcəsində rinqə çıxan Yusif Quliyev full kontakt versiyası üzrə çempionatın bürünc mükafatını qazanıb. İftixar Məhərrəmov isə 71 kq çəki dərəcəsində free kontakt versiyasında gümüş medalla kifayətlənməli olub.
Xeberle.com