Heydər Əliyevin anadan olmasının 92 illiyi münasibətilə Sumqayıt Bələdiyyəsinin və Sumqayıt şəhər Gənclər və İdman Baş İdarəsinin təşəbbüsü və birgə təşkilatçılığı ilə Şahmat-dama Məktəbində şəhərin məhəllə və mikrorayon sakinlərinin üç gün davam edən şahmat və dama üzrə şəhər birinciliyi yarışları başa çatIB.

Maraqlı və gərgin idman mübarizəsi şəraitində keçən turnirdə Sumqayıtın müxtəlif məhəllə və mikrorayonlarından olan 70-ə qədər həvəskar idmançı iştirak etmişdir. Beynəlxalq Şahmat və Dama Federasiyalarının mövcud qaydalarına uyğun olaraq dairəvi sistem üzrə keçirilən şahmat yarışlarında şəhərin Yeni yaşayış massivi üzrə məhəllə komitələrinin kişi idmançıları rəqiblərinə böyük üstünlüklə qalib gəliblər. Şahmatçılardan Rövşən Mehrəliyev daha yüksək nəticə göstərərək 1-ci, Şərarir Əvəzov 2-ci, Əli Hüseynov isə 3-cü yerləri tutublar.

Qadınlar arasında şahmat üzrə birinci yerə Rəfiqə Ağacanova, sonrakı 2-3-cü yerlərə isə müvafiq olaraq Mələk Şirinova və Tovuz Bayramova layiq görülüblər.

Dama üzrə yarışlarda isə ən yüksək nəticə ilə turnirin qalibi 15-ci məhəllə sakini Nizami Mürsəlov olub. 1-ci mikrorayon sakinləri Fuad Rəhimov 2-ci, Heydər Əsmətov isə 3-cü yerdə qərarlaşıblar. 

Sumqayıt Bələdiyyəsinin sədri, professor Əbülfəz Babayev qaliblərin təltif olunma mərasimində iştirak edərək, onları təbrik edib, hər birinə idmanda yeni nailiyyətlər, Azərbaycanı daha yüksək, mötəbər beynəlxalq yarışlarda uğurla təmsil etməyi, şahmatçıların  və dama ustalarının yeni, istedadlı gənc nəslinin yetişdirilməsi üçün səylərini artırmağı arzulayıb.

Qaliblərə Bələdiyyənin və Sumqayıt Gənclər və İdman Baş İdarəsinin fəxri-fərmanları, həmçinin pul mükafatları verilib.